گولوۆكينگە سۋرەت سىيلاعان قانات نۇرتازين تاڭ قالارلىق تۋىندىلار سالىپ ءجۇر - فوتو
ءدال وسى وقۋ ورنىنىڭ قابىرعاسىندا جولىقتىرىپ، عاشىق بولعان بويجەتكەنمەن جۋىردا عانا وتاۋ قۇردى. ءۇش بالاسى بار قاراپايىم قازاق وتباسىنىڭ كەنجە ۇلى، ءوز كۇشىمەن مالايزيادا حالىقارالىق بيزنەس-مەنەدجمەنت ماماندىعى بويىنشا ءبىلىم الىپ كەلگەن جاس جىگىت.
بالكىم، قانات تۋرالى بۇل سيپاتتامانى 21- عاسىرداعى قىز-جىگىتتەر اراسىندا كوپ كەزدەسەتىن مىنەزدەمە دەرسىز.
ءبىراق، قاناتتى وزگە قاتارلاستارىنان ەرەكشەلەندىرىپ تۇرعان - ونىڭ تۋا بىتكەن تالانتى. قازاقپارات تىلشىسىمەن اڭگىلەمەسكەن قانات نۇرتازين «سۋرەت سالۋدىڭ جاڭا 100 ءادىسى» اتتى جوباسى تۋرالى كەڭىنەن اڭگىمەلەپ، ءوزىنىڭ سالعان ەرەكشە سۋرەتتەرىن كورسەتتى.
«جالپى، بۇل دارىنىمدى ءۇش جىل بۇرىن شىنداپ قولعا الدىم. ءۇش جىل بۇرىن مالايزيادا وقۋ ءتامامداپ كەلگەن سوڭ، ءبىراز ۋاقىت جۇمىس ىزدەپ ءجۇردىم. سول كەزدە بوس ۋاقىتىم كوپ ەدى. سۋرەت سالعىم كەلدى. ءبىراق، كوپ سۋرەتشىلەر سياقتى ەمەس، ەلدى ەلەڭ ەتكىزەر دۇنيە جاساعىم كەلدى. العاشىندا قاتتى قاعازدى تەسىپ سۋرەت سالا باستادىم. قولىم جاتتىققان سوڭ، جاپىراققا سۋرەت سىزىپ، ءشاي تۇيىرشىكتەرى، قۇم سياقتى نارسەلەرمەن سۋرەت سالا باستادىم. وسىلايشا، «سۋرەت سالۋدىڭ 100 جاڭا ءتاسىلى» اتتى جوبا ويىما كەلدى. 100 ءتاسىلدىڭ ەلۋگە تارتاسىن مەڭگەردىم، ەندى قالعان جارتىسىن ويلاپ ءجۇرمىن. ەلۋ ءادىستىڭ اراسىندا المانى ويىپ سالعان سۋرەتىم، شوكولادقا سالعان سۋرەتىم، جاپىراققا سىزعان بەينەلەر جەلىدە كوپ تاراپ كەتتى. مىنە، مەنىڭ باستامام وسى. قانداي ناتيجە بەرەرىن ۋاقىت كورسەتە جاتار»، - دەيدى قانات اڭگىمە باسىندا.
كوز قاراسا تويمايتىن جاپىراقتاعى مىنا سۋرەتتەر - قانات ءۇشىن ەڭ وڭاي ءتاسىل ەكەن. ەڭ قيىنى شەگە مەن ءجىپتىڭ كومەگىمەن سالعان سۋرەتىم بولدى، دەيدى قانات. شەگە قاعىپ، ونى جىپپەن وراعان كارتيناسىن قانات ەكى اپتادا اياقتاپ، اناسىنا سىيعا تارتقان ەكەن. بۇل كارتينامەن قاتار، ءبىزدى تاڭ قالدىرعان تاعى ءبىر جايت - قانات بۇعان دەيىن ەشقاشان سۋرەت سالماعان ەكەن. «ءتىپتى وقۋشى كەزىمدە سۋرەت ساباعىنىڭ تاپسىرماسىن اعام ورىنداپ بەرەتىن. ال، قازىر بولسا، مەنىڭ سۋرەتتەرىم ەلگە تانىلا باستادى. ءبىراز اقپارات اگەنتتىكتەرى ول سۋرەتتەردى جاريالاپ، الەۋمەتتىك جەلىدە حالىق جارىسا تاراتىپ جاتىر. جۋىردا ءتىپتى بريتانيا مەن رەسەي جۋرناليستەرى حابارلاسىپ، وسى ونەرگە قىزىعۋشىلىق تانىتتى»، - دەيدى قانات.
دەگەنمەن، نەگىزگى جۇمىسى نازاربايەۆ ۋنيۆەرسيتەتىندەگى قانات ازىرگە ءبىرجولا سۋرەت ونەرىنە كەتپەي جۇرگەنىن ايتىپ وتىر.
«بۇل ارينە مەنىڭ جەكە پىكىرىم، دەگەنمەن، قازىر ءبىزدىڭ قوعام بۇنداي ونەردى بەرىلە قابىلداي المايتىن سياقتى. بىلەرىم، مەن سالىپ جۇرگەن سۋرەتتەر ساتۋ جاعىنا كەلگەندە وتە جوعارى سۇرانىسقا يە بولماي وتىر. كىم ءبىلسىن، ءبىر تاپسىرىستان ءبىر تاپسىرىسقا دەيىن عانا ءومىر سۇرۋگە تۋرا كەلسە... سوندىقتان، ازىرگە نەگىزگى جۇمىسىمنان قول ۇزبەيمىن»، - دەيدى جاس تالانت.
ءبىر جاعىنان، قانات نازاربايەۆ ۋنيۆەرسيتەتىندەگى جۇمىسىنىڭ اياسىندا شەت ەلگە ءجيى ساپارلاپ تۇرادى ەكەن. قاي جەرگە بارسا دا، قازاقستانمەن بايلانىستىرا وتىرىپ، سۋرەت سالۋ قاناتتىڭ كادىمگى حوببيىنا اينالىپتى. «قاي جەرگە بارسام دا قازاقستانعا قاتىستى دۇنيە جاساعىم كەلەدى.
مىسالى، ۆاشينگتوندا ءجۇرىپ، الماعا التىن ادامنىڭ سۋرەتىن سالدىم، لوندونعا بارعاندا الماعا كيىز ءۇيدىڭ سۋرەتىن ويىپ سالدىم. سودان كەيىن، سول قالانىڭ كورىكتى جەرىن ارتقى كورىنىس قىلىپ تاڭداپ، ءوزىمنىڭ تۋعان ەلىمنىڭ ءبىر بەينەسىن كادرعا ءتۇسىرىپ الامىن. شەتەلدىكتەر وزدەرىنە تانىس جەردەگى بەيتانىس ەلەمەنتتەرگە قاتتى تاڭ قالادى. تەك شەت ەلدە ەمەس، قازاقستاننىڭ تۇكپىر تۇكپىرىنە بارسام دا، تۋعان جەرىمنىڭ تاڭعاجايىپ تابيعاتىن سۋرەتكە سالامىن»، - دەيدى ەگەمەندىكتىڭ قۇرداسى.
ايتا كەتەيىك، قانات وتباسىنىڭ كەنجە بالاسى. الدىندا ۇلكەن اپكەسى مەن اعاسى بار. «اتىمدى اتام قويىپتى. 1991-جىلى قازاقستان ەگەمەندىگىن الىپ جاتقاندا سولتۇستىك قازاقستان وبلىسى ستەپنياك اۋىلىندا تۋىپپىن. كەيىن شۋچينسك قالاسىنا، ال، 1998-جىلى العاشقى تاسى ەندى قالانعان استاناعا كوشىپ كەلىپپىز. قازىر اكەم جەكە كاسىپپەن اينالىسادى، انام، ق ر پارلامەنتىنىڭ شارۋاشىلىق بولىمىندە جۇمىس ىستەيدى»، - دەيدى قانات.
اۆتور: كەنجەكەي توقتامۇرات قىزى
