استانا اكىمى كوشەلەردى تاڭەرتەڭ-كەشكە ءوزى تەكسەرىپ تۇرۋعا ۋادە ەتتى - فوتو
«قايىرلى تاڭ. مىنە، قالانى قالىڭ قار باستى. ءبىز قالانىڭ قارىن تازالاۋ ءۇشىن تەحنيكامىزدى تەكسەرىپ، ءتيىستى مارشرۋتتار سىزىپ، دايىن وتىردىق. دەمالىس كۇندەرى 21 م م قار جاۋدى، قالا بويىنشا 369 كولىك 26.200 تەكشە مەتر قار تازالاندى»، - دەگەن اكىم اۋا رايىنىڭ كۇرت بۇزىلۋى جۇمىستى قيىنداتىپ جىبەرگەنىن جەتكىزدى.
«الايدا، كۇن رايىنىڭ كۇرت بۇزىلۋى جاعدايدى قيىنداتىپ جىبەردى. ەڭ الدىمەن ايتارىم، قالادا جول- كولىك وقيعالارى كوبەيىپ كەتتى. بۇگىن تاڭەرتەڭ ەلوردادا وسىنداي 26 فاكت تىركەلدى، جالپى كۇنىنە 100 گە جۋىق كولىك سوقتىعىستارى تىركەلىپ تۇر. كوپ جاعدايدى، كولىكتەردىڭ ارا قاشىقتىقتى ساقتاماي، جول تايعاق ەكەنىنە قاراماستان، جىلدامدىقتى ازايتپاي ءجۇرۋى سەبەپ بولىپ وتىر. جول پوليتسياسى مەن ساقتاندىرۋ كومپانياسىنىڭ وكىلى كەلگەنشە دە تالاي ۋاقىت ءوتىپ، جول كەپتەلىسىن ۇزارتا تۇسەدى.
ايتپاقشى، بىرنەشە كۇن بۇرىن ماسكەۋدە دە قالىڭ قار جاۋدى، ول قالادا سول كۇنى 900 جول كولىك وقيعاسى تىركەلگەن»، - دەيدى ماسكەۋ مەن استانانى سالىستىرعان ءا. يسەكەشەۆ. بۇگىن ۇكىمەت باسشىسى باقىتجان ساعىنتايەۆتان قالاداعى كەپتەلىسكە بايلانىستى ەسكەرتۋ العان اكىم ەندى قالا كوشەلەرىن تاڭەرتەڭ- كەشكە ءوزىم تەكسەرىپ تۇرامىن دەپ ۋادە بەردى. «كوممۋنالدىق قىزمەتتەر كۇشەيتىلگەن رەجيمدە جۇمىسىن جالعاستىرا بەرەدى. جانىما وسى سالاعا جاۋاپتى ورىنباسارىمدى، اۋدان اكىمدەرىن ەرتىپ الىپ، قالا كوشەلەرىن ءوزىم تاڭەرتەڭ- كەشكە جەكە تەكسەرىپ شىعامىن. قالا تۇرعىندارى ۋاقىتشا قولايسىزدىقتارعا تۇسىنىستىك تانىتۋلارىڭىزدى سۇرايمىن»، - دەدى اكىم.
اۆتور: كەنجەكەي توقتامۇرات قىزى
