ەركە ەسماحان: ۇلىمدى ويلاعاندىقتان اكەسىنە قاتىستى كوپ جايتتى جاسىرىپ قالدىم
ءوز سوزىندە ول دوستىق پەن ماحابباتتان كوڭىلى قالعانىن ايتتى. دەسە دە، ءانشى بولاشاقتا ءوزىن تۇسىنەتىن، شىعارماشىلىعىنا ەركىندىك بەرىپ، ايالاپ وتەتىن ەر ازاماتتى كەزدەستىرەتىنىنە ۇمىتتەنەدى. ارتىنان جۇگىرىپ جۇرگەن جىگىتتەردىڭ بار ەكەنىن مويىنداعانىمەن، ەركە ءالى كۇنگە دەيىن ومىرلىك سەرىك بولاتىنداي ادامدى كەزدەستىرمەگەنىن ايتتى.
نازارلارىڭىزعا اتالمىش سۇحباتتان ءۇزىندى ۇسىنامىز.
- باعدارلامالارعا سۇحبات بەردىڭىز، ءساتسىز نەكەڭىز تۋرالى اشىق ايتتىڭىز. ەرتەڭ بالاڭىز ەر جەتىپ، انامدى كورەيىنشى دەپ YouTube جەلىسىنە كىرگەن كەزدە ءوزىنىڭ اكەسى تۋرالى اقپارات ءبىرىنشى شىعادى. ەسەيە كەلە، سول كەزدە ول «مەنىڭ اكەم وسىنداي بولعان با؟ » نەمەسە «ماما نەگە ايتتىڭىز» دەپ وكپەلەپ قالادى دەپ قورىقپايسىز با؟
- مۇمكىن سول كەزدە ۇلىم بارىپ سۇرايتىن شىعار اكەسىنەن: «نەگە سولاي ىستەدىڭىز؟ » دەپ.
- سول ءۇشىن ايتتىڭىز با؟
- سول ءۇشىن ايتقان جوقپىن. بۇل جەردە بالامدى ويلادىم. سونى ويلاعاندىقتان دا كوپ نارسەنى جاسىرىپ قالدىم. ول جەردە ايتىلعان نارسە تەك قانا شەت جاعاسى. قارا كۇيەنىڭ ءبارى ماعان جاعىلعان سوڭ، ءوزىمدى قورعادىم. ءاربىر پەندە، ءاربىر ادام ءوزىن قورعاۋى كەرەك وتىرىكتەن، جالادان. ول كىسىنىڭ ەڭسەسى تۇسەتىندەي ەشتەڭە ايتقان جوقپىن. تەك سول كىسىنىڭ جاساعان ىستەرى مەن قىلىقتارىن ايتتىم. شىندىقتى ايتتىم. مەنى وتىرىك ايتتى دەسە، ونى ار- ۇياتىنا قالدىردىم.
- ءسىز ول ادامعا قاتتى اشۋلى سياقتىسىز....
- جوق، اشۋلى ەمەسپىن. مەنىڭ باسىمنان وتكەن نارسە، مەنىڭ باسىمنان وتكەن سىناق، وتباسىمدا بولعان جاعداي سىزدەر ءۇشىن تەك اڭگىمە، تەك سۇراققا ارقاۋ. ال بۇل مەنىڭ باسىمنان وتكەن جاعداي. مەن ول كەزدە كىشكەنتاي قىز ەدىم. ەركە ەسماحان ەمەس، جاي عانا ەركە ەدىم.
- ەندى قاتەلەسپەۋ ءۇشىن قانداي ادامدى كەزدەستىرگىڭىز كەلەدى؟
- ءبىز پەندەمىز. مەن دە ايتا المايمىن الدىمدا نە كۇتىپ تۇرعانىن. ءتىپتى، قازىر وسى باعدارلامادان شىعىپ، كولىگىمە وتىرىپ كەتسەم، ءبىر ساعاتتان سوڭ نە بولاتىنىن مەن دە بىلمەيمىن. تەك قانا اللاعا سەنەمىن. ماعان قاراپ وتىرعان اكە- شەشەم، باۋىرلارىم بار. مەنى الپەشتەپ وسىرگەن، ونەرگە باۋلىعان. ءبىرىنشى كەزەكتە سول كىسىلەردىڭ ءۇمىتىن اقتاۋعا تىرىسامىن. ارينە، مەن انامىن. بالامنىڭ ءۇمىتىن اقتاۋعا تىرىسامىن. ەندى قۇرعان وتاۋىم ءومىرىمنىڭ سوڭىنا دەيىن بولادى دەپ تە ايتا المايمىن. مەن دە پەندەمىن، مەنى دە جاراتقان اللا. سول جاقتان قانداي بۇيرىق بولادى، سولاي بولادى.
- ەركە حانىم، مەنىڭ دە دوستارىمنىڭ اراسىندا ءسىزدى وتە قاتتى جاقسى كورەتىن جانكۇيەرلەرىڭىز بار. بارلىعى دەرلىك قانشا تالپىنسا دا سىزگە جاقىنداي الماي كەتتى. سوعان قاراعاندا ءسىزدىڭ تۇراقتى ماحابباتىڭىز تابىلعان سياقتى. مويىنداڭىزشى...
- شىنى كەرەك، مەن وتە ماحابباتقا بەرىلىپ كەتەتىن اداممىن. بەرىلگەنىم سونشالىق، ءوزىمدى، جۇمىسىمدى ۇمىتىپ، سول ازاماتقا بارلىق ءومىرىمدى ارناپ كەتەمىن. كوڭىلىمدى ارنايمىن، بار ارمان- ماقساتىمدى سونىمەن بايلانىستىرىپ قويامىن. سول كەزدە نە اقساڭدايدى؟ مەنىڭ جۇمىسىم، ەكىنشىدەن، ءوزىمنىڭ ءارى قاراي قويعان ماقساتتارىم جوعالىپ كەتەدى. ويتكەنى سول ماحابباتپەن ماقساتتارىمدى تولىقتىرىپ قويامىن. ماعان قاجەت ەمەس نارسە سياقتى بولىپ تۇرادى. ال ءبىراق ۋاقىت وتە كەلە مەن ساحناسىز، ءانسىز، ونەرسىز ءومىر سۇرە المايتىنىمدى تۇسىنەمىن.
- دەمەك، سىزگە ءاردايىم ساحنادا بوستاندىق بەرەتىن، سىزگە تۇسىنىستىكپەن قارايتىن ازاماتتى تاپتىڭىز عوي؟
- تاپقان جوقپىن ءالى.
- الداماساڭىزشى، تاپتىڭىز عوي...
- تاپقان جوقپىن. شىنى كەرەك، ەشقانداي دا قىسىلمايمىن. جىگىتتەرمەن تانىسامىن، سويلەسەمىن، مەنى بىلمەيدى ەمەس، بىلەدى. وزدەرىڭىز ايتىپ وتقانداي، ءبارىن اشىپ وقىپ قاراپ الادى عوي. سويلەسەمىن، ارالاسامىن، ءبىراق ومىرلىك سەرىك بولاتىنداي ادامدى تاپقان جوقپىن. مۇمكىن، مەن باسقا كوزقاراسپەن، تۇراقسىزدىقپەن قارايتىن شىعارمىن. الدە ەر كىسىلەردەن كوڭىلىم قالعان با؟ مەن تولىق جاۋاپ بەرە المايمىن سەبەبى ءوزىم دە تۇسىنبەيمىن.
- جاس ەرەكشەلىگى ماڭىزدى ما؟
- ەشقانداي ماڭىزدى ەمەس. ەڭ باستىسى مەنى جاقسى كورىپ، ءسۇيىپ، ءتۇسىنىپ تۇرسا بولدى.
- ال تۇرمىستىق جاعدايى شە؟ قازىر ەركە الەۋمەتتىك جاعدايى جاقسى، گونورارى جوعارى انشىلەردىڭ قاتارىندا...
- جىگىتتەردەن سونداي جاعىنان قورقۋعا دا بولادى. سوناۋ اقتوبەنىڭ ار جاعىنداعى ىرعىز دەگەن جەردە تۋعان قاراپايىم ەركەنى جاقسى كورىپ تۇر ما؟ الدە تەك ساحنادا ۇنەمى كۇلىپ تۇراتىن، بارلىق جاعىنان ءوزىنىڭ جاعدايىن ءوزى جاساپ العان، دايىن قىزعا قىزىعىپ تۇر ما دەپ ويلايسىڭ ءبىر جاعىنان. سوندىقتان دا وتە قاراپايىم جىگىتتىڭ سەزىمى مىقتى بولسا قاراۋعا بولادى. ال ەگەر تۇرمىستىق جاعدايى جاقسى بولسا، ول ارتىقتىق ەتپەيدى عوي.
- ەركە، گاسترولدىك ساپارمەن كوپ جۇرەسىز. بالاڭىزعا كىم قارايدى؟
- بىلسەڭىزدەر، مەن بالامدى دۇنيەگە الىپ كەلگەننەن باستاپ ءوزىمنىڭ وتباسىم شىتىناي باستادى. سول كەزدەن باستاپ كىشكەنتاي ءمۇسلىمدى ناعاشى اجەسى باقتى. بۇگىندە ءمۇسلىم مەنىڭ اتا- انامنىڭ بالاسى. اقتوبەدە تۇرادى، قازىر بالا- باقشاعا بارىپ ءجۇر. الماتىعا كەلىپ تۇرادى. وڭتۇستىككە جىبەرمەيمىن.
- ەركە، پروديۋسەردەن كەتكەن انشىلەر كوپ. بايان ماقسات قىزى ءسىزدىڭ كەتكىڭىز كەلمەيتىنىن ايتقان ەدى؟
- شىن مانىندە كەتكىم كەلمەيدى. بۇل جەردە ءبارىبىر ىشكى دۇنيەم، ادامي قاسيەتىم وعان جىبەرمەيدى. كەتىپ قالۋ دا جامان نارسە ەمەس. ويتكەنى ادام قاناتىن كەڭگە جايىپ، ءارى قاراي ءوزىن ءوزى سىناعىسى كەلەدى. كەتكىم كەلمەيتىنى - مەن بايان ماقسات قىزىنا كەدەرگى كەلتىرمەيمىن، ول دا ماعان كەدەرگى كەلتىرمەيدى. ءبىز تاندەمدە، گارمونيادا جۇمىس ىستەيمىز. كەتكەن كەزدە ورتاداعى ءجىپ ۇزىلەتىندەي كورىنەدى.
- «ەسەنتاي production» ورتالىعىندا ءسىز ايلىققا جۇمىس ىستەيسىز بە؟
- جوق، ەشقانداي ايلىق جوق.
- ءسىزدىڭ نەگىزگى تابىس كوزىڭىز - توي. تويداعى تابىس كوزىڭىزدىڭ بەلگىلى ءبىر پايىزى پروديۋسەرلىك ورتالىققا باراتىن شىعار. قۇپيا بولماسا، قانداي مولشەردە ەكەنىن ايتىڭىزشى؟
- ءيا، پروديۋسەرلىك ورتالىققا تاپقان تابىسىمنىڭ جارتىسى تيەسىلى.
Stan.kz
