ادىلەت مينيسترلىگى نارەستەگە قوسارلى ەسىم بەرۋدىڭ زاڭدىلىعى تۋرالى تۇسىنىكتەمە بەردى
بالانىڭ ەسىمى اتا- انانىڭ نەمەسە بالانىڭ باسقا دا زاڭدى وكىلدەرىنىڭ كەلىسىمى بويىنشا بەرىلەدى. اكەسىنىڭ اتى اتا-انانىڭ نەمەسە بالانىڭ باسقا دا زاڭدى وكىلدەرىنىڭ تىلەگى بويىنشا ونىڭ اكەسى بولىپ كورسەتىلگەن تۇلعانىڭ اتى بويىنشا بەرىلەدى.
قوسارلى اتتى بەرۋگە ات جەكە جازىلاتىن، ەكى اتتان كوپ بولمايتىن كەزدە رۇقسات ەتىلەدى. اكەسىنىڭ اتى قوسارلى بولعان جاعدايدا اكەسىنىڭ اتى بالاعا سول اتتىڭ بىرەۋى بويىنشا نەمەسە اكەسىنىڭ ەكى اتى بىرگە جازىلعاندا بەرىلەدى. بالالارعا قوسارلى اتتى جازۋعا رۇقسات بەرۋ تۋرالى نورما 2011 -جىلى كودەكستى قابىلدانعان كەزدەن باستاپ ەنگىزىلدى.
قولدانىستاعى زاڭنامادا اتتاردىڭ اراسىنا سىزىقشا بەلگىسىن قويۋعا تىيىم سالىنباعان. «كودەكستە ازاماتتاردىڭ قوسارلى تەگىنىڭ سىزىقشا ارقىلى جازىلۋى (مىسالى، نەكەگە تۇرۋدى تىركەگەن كەزدە) تۋرالى نورمالار قامتىلعان. اتالعان جاعدايدا، كودەكستىڭ 5-بابىنا سايكەس وسىنداي قاتىناستاردى رەتتەيتىن، ولاردىڭ مانىنە قايشى كەلمەيتىن نورمالار بار ۇقساس زاڭ قولدانىلادى. وسىعان بايلانىستى، تىركەۋشى ورگاننىڭ ارەكەتتەرى قولدانىستاعى زاڭناما تالاپتارىنا سايكەس كەلمەيدى دەپ پايىمدايمىز.
قازاقستان رەسپۋبليكاسى پرەزيدەنتىنىڭ 2014 -جىلعى 25 -تامىزداعى №898 «قازاقستان رەسپۋبليكاسىنىڭ مەملەكەتتىك باسقارۋ دەڭگەيلەرى اراسىندا وكىلەتتىكتەردىڭ اراجىگىن اجىراتۋ جونىندەگى شارالار تۋرالى» جارلىعىنا سايكەس، ادىلەت سالاسىندا ازاماتتىق حال اكتىلەرىن تىركەۋ فۋنكتسيالارى قازىرگى ۋاقىتتا جەرگىلىكتى جەرلەردە اكتىلەردى تىركەۋدى جۇزەگە اسىراتىن جەرگىلىكتى اتقارۋ ورگاندارىنا بەرىلگەنىن نازارعا الۋ كەرەك»، - دەپ اتاپ وتىلگەن ق ر ادىلەت مينيسترلىگى مالىمەتىندە.
2012 -جىلدان باستاپ 2016 -جىلعى 31 -قازانعا دەيىنگى ارالىقتا دۇنيەگە كەلگەن نارەستەلەرگە بارلىعى 9858 قوسارلى ات بەرىلگەن، ونىڭ 2261 ى سىزىقشا ارقىلى جازىلسا، 7597- ىنە مۇنداي بەلگى قويىلماعان. ەسىمدەردىڭ جازىلۋىنا قارسى داۋ ايتۋ بويىنشا ازاماتتاردان وتىنىشتەر كەلىپ تۇسپەگەن. كودەكستىڭ 257-بابىنا سايكەس، ازاماتتاردىڭ تەگىن، اتىن جانە اكەسىنىڭ اتىن وزگەرتۋدى تىركەۋشى ورگاندار 13 نەگىز بويىنشا جۇرگىزەدى.
نەگىزدەردىڭ اتالعان تىزبەسى تۇپكىلىكتى بولىپ تابىلادى. ازاماتتار ءوزىنىڭ اتىن وزگەرتۋ مۇمكىندىگىنە وعان جەتكىلىكتى نەگىزدەر بولعان كەزدە يە بولادى. وتىنىشكە دەرەكتەردى وزگەرتۋ قاجەتتىگىن راستايتىن قۇجاتتار قوسا بەرىلۋى ءتيىس. ءوتىنىشتى قاراۋ ناتيجەسى بويىنشا تىركەۋشى ورگان ءتيىستى قورىتىندىنى دايىندايدى، تىركەۋ تىكەلەي سونىڭ نەگىزىندە جۇرگىزىلەدى. سونىمەن قاتار اتالعان ماسەلە بويىنشا قۇقىق قولدانۋ تاجىريبەسى زەردەلەنگەننەن كەيىن وسى سالاداعى قىزمەتتى رەگلامەنتتەيتىن نورماتيۆتىك قۇقىقتىق اكتىلەرگە وزگەرىستەر مەن تولىقتىرۋلار ەنگىزۋ قاجەتتىگى قارالاتىن بولادى.
اۆتور: رۋسلان عابباسوۆ
