اقبوتا كەرىمبەكوۆا: ەسترادامىزدا ءوزىن- ءوزى ساتاتىن انشىلەر كوپ
ولاردىڭ ءبىرى بۇل قۇبىلىستى زامان تالابىنا ساي نارسە دەپ تۇسىندىرسە، ەكىنشىلەرى پروديۋسەرلەرىنىڭ قويعان تالابىن ايتىپ اقتالادى.
الايدا كوبىنەسە ەستراداداعى اعا بۋىن جانە ورتا بۋىن انشىلەرى مۇندايدى جاقتىرا بەرمەيدى. ساحناعا جارتىلاي جالاڭاش كۇيدە شىعاتىن قىزداردى اقبوتا كەرىمبەكوۆا مەن ايگۇل يمانبايەۆا دا ۇناتپايدى.
«كوبىنەسە ورىسشا باعىتتاعى ەسترادا جۇلدىزدارى اشىق- شاشىق كيىنەدى. ءبىراق قازىرگى قازاق جاس قىزدارىنىڭ اراسىندا دا بار. قازىر بىرەۋدىڭ پالەنشەسى، بىرەۋدىڭ تۇگەنشەسى جارتىلاي جالاڭاش شىعادى، ونى جاسىرماي-اق قويايىق، ءوزىن ءوزى ساتاتىن انشىلەر كوپ بىزدە. جالپى ونەردە بىلعانىپ جاتقان دۇنيە جەتەرلىك»، - دەدى اشىنعان كەرىمبەكوۆا 31 -ارنانىڭ «ايتا بەرسىن» باعدارلاماسىنا بەرگەن سۇحباتىندا.
بۇل ماسەلەنى ايتا- ايتا شارشاعان كەرىمبەكوۆا وسى جىلدىڭ باسىندا مادەنيەت جانە سپورت مينيسترىنە حات جولداعان بولاتىن. مينيستر ءوز كەڭەسشىلەرىمەن اقىلداسا وتىرىپ، تىيىم جايلى زاڭ جوباسىن ازىرلەپ، پارلامەنت قاراۋىنا ۇسىنعان ەدى. الايدا بۇل ماسەلە ايتىلعان جەردە قالىپ قويىپ، اياعىنا دەيىن شەشىلمەگەن ۇقسايدى.
اكتريسا ءارى ءانشى ايگۇل يمانبايەۆا دا ساحناعا شىعۋ مادەنيەتى زاڭمەن بەكىتىلسە دەگەن پىكىردە.
«مەملەكەت تاراپىنان ۇكىم شىعىپ، زاڭعا ەنسە، «ونەر ادامدارى ساحناعا وسىلاي شىعۋ كەرەك» دەپ ءدوپ باسىپ ايتىلسا، نەگە شىقپاسقا؟ ونىڭ دا ءوزىنىڭ ءبىر سۇلۋلىعى بار. ورامالدى دا ادەمىلەپ تاعىپ، كويلەكتى دە مىڭ قۇبىلتىپ جابىق قىلىپ كيىپ شىعۋعا بولادى. ساحناعا اشىق- شاشىق شىعۋعا ءزارۋ بولماسام، قۇشتار بولىپ تۇرعان مەن جوق. ءار ادام ءوزىنىڭ جاسىنا ساي كيىنىپ شىقسا، ونىڭ ءوزىنىڭ ءبىر سۇلۋلىعى بار»، - دەپ اتاپ ءوتتى ول.
