كۇن ساۋلەسىمەن جۇرەتىن قولاربالار

جاسىل جەلەگى ۇستىنەن اجىرامايتىن اجارلى قالادا قولارباسىمەن كوشەنى ەمىن- ەركىن ارالاپ بارا جاتقان مۇمكىندىگى شەكتەۋلى ازاماتتى كوردىك. كەر قۇنانعا مىنگەندەي سىرعىتىپ بارادى. ادەتتە، مۇنداي ادامدار دوڭگەلەك تارتپاسىن ەكى قولىمەن قوزعاپ ابىگەرگە تۇسەر ەدى، ال مۇندا قولاربا ءوزى ءجۇرىپ ءجۇر.

ماسەلەنىڭ ءمانىسىن قالا اكىمى ءابدىباقىت ماقۇلبايەۆتان سۇراعانبىز.

- بۇل كۇن ساۋلەسىمەن جۇرەتىن قولاربانى حالىقارالىق قازاق- تۇرىك ۋنيۆەرسيتەتىنىڭ كەنتاۋداعى بولىمشەسىندەگى ۇستازدار مەن ستۋدەنتتەر جاساعان، - دەيدى ءابدىباقىت ءتىللاباي ۇلى. - بىلاي ايتقاندا، قازاق-تۇرىك جاس عالىمدارىنىڭ جۇمىسى. قۋاتى 30 شاقىرىمعا دەيىن جەتەدى. بۇل قولاربالار «مەيىرىمدى جۇرەكپەن» اكسياسى كەزىندە توسەككە تاڭۋلى 20 ازاماتقا تابىستالعان. بىرەۋىنىڭ باعاسى - 800 دوللار شاماسىندا. ەمىن-ەركىن ءجۇرىپ جۇرگەن تاعدىرلاستارىن كورگەن جاندار «بىزگە دە الىپ بەرىڭدەر» دەپ وتىنۋدە. شامامىز كەلگەنشە سۇرانىستارىن قاناعاتتاندىرۋعا تىرىسامىز.

اللا تاعدىرىن سولاي قيىستىرعاننان كەيىن «ءومىر وسىمەن ءبىتتى» دەپ ءوزىن-ءوزى تاستاپ جىبەرۋگە، شاراسىزدىققا كوندىگۋگە بولمايدى.

جاس عالىمداردىڭ ەڭبەگى ارقاسىندا ولاردىڭ ەكىنشى ءومىرى باستالدى. «بارلىعىمىز بىردەيمىز، كەمسىتۋدى بىلمەيمىز» قاناتتى ءسوزىنىڭ توقتامى وسى.

باقتيار تايجان،

«ەگەمەن قازاقستان»

وڭتۇستىك قازاقستان وبلىسى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى