جول اپاتىنان قازاقتىڭ اقىن قىزى قازا تاپتى
اپاتتا ءتورت ادام قازا تاۋىپ، تاعى ءبىرى جاراقات العان، دەپ حابارلايدى قازاقپارات.
پاۆلودار وبلىسى ىشكى ىستەر دەپارتامەنتىنىڭ اقپاراتىنا سۇيەنسەك، جول اپاتى وبلىستاعى ءتورتقۇدىق ەلدى مەكەنىنىڭ ماڭىندا ورىن العان. سوققىنىڭ قاتتى بولعانى سونشالىق، Lada Priora كولىگىنىڭ ىشىندەگى ءۇش ادام وقيعا ورنىندا ءتىل تارتپاستان قازا تاپقان. ال، سول كولىكتە وتىرعان 30 جاستاعى جولاۋشى ايەل مەن 41 جاستاعى ازاماتتى جەدەل جاردەم شۇعىل تۇردە اۋرۋحاناعا اكەتكەن. الايدا، اۋرۋحاناعا جەتە سالا 30 جاستاعى ايەل دە قازا تابادى.
ەڭ وكىنىشتىسى، وسى جول اپاتى قازاقتىڭ جاس اقىن قىزى، ءانشى، سازگەر- الماگۇل جۇگىنىسوۆانىڭ دا ءومىرىن قيىپ كەتتى. اقىندار مەن انشىلەر، ءوڭىردىڭ مادەني قايراتكەرلەرى، مارقۇمنىڭ دوس- جاراندارى مەن شاكىرتتەرى الەۋمەتتىك جەلىدە الماگۇل جۇگىنىسوۆانى ەسكە الىپ، قايعىرۋدا.
الماگۇل جۇگىنىسوۆا 1982 -جىلى اقتوبە وبلىسى، قارابۇتاق اۋدانى، ارالتوعاي اۋىلىندا تۋعان. ەكىباستۇز قالاسىنداعى №25 قازاق قىزدار گيمنازياسىن (1999 ج.)، س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىن قازاق ءتىلى مەن ادەبيەتى جانە اعىلشىن ءتىلى ماماندىعى بويىنشا بىتىرگەن (2004 ج. ). ەكىباستۇز قالاسىنداعى «اتامۇرا» مادەنيەت ورتالىعىندا 2005 -جىلدان بەرى كوركەمدىك جەتەكشى بولىپ قىزمەت ىستەدى. «جاس تولقىن» جاس اقىندار كلۋبىنىڭ جەتەكشىسى، تالىمگەر ۇستاز رەتىندە شىعارماشىل جاستاردى ونەرگە باۋلىپ، تاربيەلەۋگە زور ەڭبەك ءسىڭىردى.
اقىننىڭ «الما گۇلدەگەندە» جىر جيناعى جارىق كورگەن (2015 ج. ). الماگۇل باۋىرجان قىزى - حالىقارالىق، رەسپۋبليكالىق، وبلىستىق ايتىستاردىڭ بىرنەشە مارتە جەڭىمپازى، جۇلدەگەرى، پاۆلودار وبلىسى اكىمىنىڭ گرانتى (2010 ج. )، «جىگەر» جاستار سىيلىعى (2010 ج. )، «قازاقستان رەسپۋبليكاسى تاۋەلسىزدىگىنىڭ 20 جىلدىعى» مەرەكەلىك مەدالى (2011 ج. )، ەكىباستۇز قالاسى اكىمىنىڭ قۇرمەت گراموتاسى (2013)، تۇركىتىلدەس حالىقتاردىڭ دۇنيەجۇزىلىك Ⅱفەستيۆالى /تۇركيا، ەرزۋرۋم/ (2009 ج.)، تۇركىتىلدەس حالىقتاردىڭ 21-عاسىر اقىندارى مەيرامى /تۇركيا، انكارا/ (2012 ج. )، «ۇلى جىبەك جولى اقىندارىنىڭ پوەزيا كەشتەرى» ح فەستيۆالى /تۇركيا/ (2013 ج. ) العىس حاتتارىمەن ماراپاتتالعان.
مارقۇمنىڭ سوڭىندا زەينەتكەر اناسى جانە كامەلەت جاسىنا جەتپەگەن ءمادينا مەن ءىنجۋ اتتى ەكى ءبۇلدىرشىنى قالعان. قازىر جول پوليتسياسى وسى وقيعاعا قاتىستى سوت الدى تەرگەۋ باستاپ، ءبىرقاتار ساراپتامالار تاعايىندادى.
اۆتور: كەنجەكەي توقتامۇرات قىزى
