تۇرمەدەن شىققان پەدوفيلدىڭ بۇرىنعى قىلمىسقا قايتىپ بارمايتىنىنا ەشكىم كەپىلدىك بەرمەيدى - باس پروكۋراترۋا
الايدا ولاردىڭ بوستاندىققا شىققاننان كەيىن بۇرىنعى قىلمىسقا قايتىپ بارمايتىنىنا ەشكىم كەپىلدىك بەرە المايدى، دەپ حابارلايدى قازاقپارات.
ا. كراۆچەنكونىڭ ايتۋىنشا، پروكۋرورلار الەمدىك تاجىريبەنى، سونداي- اق وسى سالاداعى عىلىمي زەرتتەۋلەردى زەردەلەپ شىقتى. سويتسە، بۇگىندە سەكسۋالدىق قىلمىستارمەن كۇرەسۋدىڭ امبەباپ جۇيەسى جوق. اتالعان پروبلەما تولىعىمەن زەرتتەلمەگەن. دەگەنمەن، پەدوفيلدىك ارەكەتتى الدىن الۋدىڭ ەكى جولى بار. بىرىنشىدەن، قىلمىسكەردىڭ ارەكەتىن الدىن الا بولجاپ وتىرۋعا بولادى. الايدا ول ءۇشىن ۇلكەن الەۋمەتتىك- پسيحولوگيالىق دايىندىق قاجەت. ال ەكىنشى ادىسكە سايكەس، بالانىڭ قاۋىپسىزدىك شارالارىنا باسا نازار اۋدارعان ءجون.
ءبىراق اتالعان ءادىستىڭ ەكەۋىن دە ىسكە اسىرۋ ءۇشىن بارلىق ادامداردىڭ قوعام بولىپ اتسالىسقانى قاجەت.
«ءبىز ءاربىر قىلمىستى جان- جاقتى زەردەلەپ شىقتىق. ءسويتىپ، جىنىستىق قىلمىستارمەن كۇرەسۋدىڭ نەگىزگى ماسەلەلەرىن انىقتادىق. بىرىنشىدەن، جىنىستىق قىلمىستار ءۇشىن سوتتالعاندارمەن جۇمىس ىستەۋ كەرەك.
قازىرگى كەزدە ونداي ادامداردىڭ پسيحولوگيالىق پورترەتى جاسالمايدى. ءبىز ولاردىڭ قىلمىسقا نە سەبەپتى بارعانىن، قانداي پسيحولوگيالىق اقاۋلىقتىڭ بولعانىن دا بىلمەيمىز. شەتەلدە پەدوفيلدەردى جان-جاقتى زەرتتەپ، جاساعان قىلمىسقا قايتىپ بارا ما، جوق پا، وسى ماسەلە تەرەڭ زەردەلەيدى. قازىرگى كەزدە قازاقستان تۇرمەلەرىندە ادام زورلاعان 1229 قىلمىسكەر وتىر. بۇگىن بە، ەرتەڭ بە، ولار بوستاندىققا شىعادى. ءبىراق ولارمەن ەشقانداي پروفيلاكتيكالىق جۇمىس جۇرگىزىلمەيدى»، - دەدى ا. كراۆچەنكو بۇگىن باس پروكۋراتۋرادا وتكەن جيىندا. وسىعان بايلانىستى پروكۋرورلار جىنىستىق قىلمىس جاساعان ازاماتتاردى ارنايى پسيحولوگيالىق تەكسەرىستەن وتكىزىپ، ءتيىستى ەمدەۋ شارالارىن ۇيىمداستىرۋدى ۇسىنىپ وتىر. ال دارىگەرلەردىڭ كەڭەستەرى نەگىزىندە قىلمىسكەردىڭ جازانى وتەۋ مەرزىمىن قاراستىرۋ قاجەت. اۆتور: ارمان اسقاروۆ
