باس پروكۋرور بالالاردى زورلاۋ ماسەلەسى بويىنشا ۇندەۋ جاريالادى

«كوپ جاعدايدا قىلمىسكەرلەردىڭ ارام نيەتىن جۇزەگە اسىرۋعا نەگىزگى سەبەپ - ەرەسەكتەردىڭ مۇقياتسىزدىعى. ساناسى تولىق بەكىمەگەن، ءار نارسەگە سەنگىش، كونگىش جاس بالا سىرتتان كەلەر قاۋىپتى قايدان ءبىلسىن؟ سوندىقتان قاراۋسىز قالعان ءبۇلدىرشىن - قىلمىسكەرگە وڭاي ولجا. بالالارىمىزدىڭ دەنى ساۋ، ءومىرى قاۋىپسىز بولسىن دەسەك، بىرىنشىدەن، ءاربىر اتا-انا ساق بولۋى قاجەت. ۇيدە، اۋلادا، مەكتەپتە، دەمالىس ورىندارىندا، جالپى قاي جەردە بولماسىن بالانى ۇنەمى باقىلاۋدا ۇستاڭىز.

ەكىنشىدەن، جەتكىنشەكتەر قورلىقتى كوبىنەسە تانىسى، ءتىپتى جاقىنى، اكەسى، اعاسى سياقتى ادامداردان كورەدى. بالاعا ءتيىسۋ، الداۋ، كۇشتەۋ ارەكەتىن كورسەڭىز، دەرەۋ 102 گە حابارلاسىپ، شارا قولدانىڭىز.

ۇشىنشىدەن، كەيدە بولعان ءىستى ايتپايمىز، جاسىرامىز، ۇيات بولادى دەيمىز. بۇل دۇرىس ەمەس. ونىمەن قىلمىستىڭ جاسىرىن، سوزىلمالى تۇرگە اينالۋىنا كومەكتەسەمىز. سوندىقتان بالاڭىزدىڭ نامىسى اياققا تاپتالسا، ءۇنسىز قالماڭىز. بىردەن قۇقىق قورعاۋ ورگانىنا حابارلاڭىز. تورتىنشىدەن، بالانىڭ ارالاسىپ جۇرگەن ورتاسى قانداي، قاي جەرلەرگە ءجيى بارادى، ينتەرنەتتە كىممەن دوس، قانداي سايتتاردا وتىراتىنىن بايقاپ ءجۇرىڭىز. بالامەن ءجيى، اشىق اڭگىمەلەسۋ - ونى ازعىنداردان قورعاۋدىڭ ەڭ ءتيىمدى امالى.

بەسىنشىدەن، قاۋىپتى جاعدايدا نە ىستەۋ كەرەكتىگىن بالاعا ءتۇسىندىرىپ ۇيرەتكەن ءجون. ونداي اقپاراتتى ينتەرنەتتەن جانە جاقىن ارادا ىسكە قوسىلاتىن «پروكۋروردىڭ 100 كەڭەسى» دەگەن موبيلدىك قوسىمشادان الۋعا بولادى. مۇنداي قىلمىستاردىڭ الدىن الۋ ءۇشىن تەك مەملەكەتتىڭ شارالارى جەتكىلىكسىز. وعان ءارقايسىسىمىز جەكە جانە بۇكىل قوعام بولىپ قارسى تۇرايىق!»، - دەدى ج. اسانوۆ.

باس پروكۋروردىڭ ايتۋىنشا، بۇگىندە ەلىمىزدە جىنىستىق قىلمىس جاساعاندارعا قاتىستى 20 جىلعا دەيىن نەمەسە ءومىر بويىنا باس بوستاندىعىنان ايىرۋ جازاسى قولدانىلادى. ولاردىڭ جازاسى جەڭىلدەتىلمەيدى. سوتتالعاندار ۋاقىتىنان بۇرىن بوساتىلمايدى، امنيستياعا جاتپايدى، ولارمەن ەشقانداي پروتسەستىك كەلىسىم جاسالمايدى. جازا مەرزىمىن تولىق وتەيدى. مۇنداي قىلمىسكەرلەر بالالارمەن جۇمىس جاساۋ قۇقىعىنان ءومىر بويىنا ايىرىلادى. بۇدان بولەك، 2018 -جىلعى 1 -قاڭتاردان باستاپ حيميالىق كاستراتسيا قولدانىلماق. بۇل دەگەنىمىز قىلمىسكەرلەردى ارنايى ءدارى- دارمەكتەردى قابىلداۋعا ماجبۇرلەيدى. سونداي-اق قۇقىقتىق ستاتيستيكا كوميتەتىنىڭ infopublic.pravstat.kz سايتىندا پەدوفيلدەردىڭ كارتاسى ىسكە قوسىلدى. وندا ولاردىڭ فوتوسۋرەتى مەن انكەتاسى بار. بۇل سەرۆيستى كەز كەلگەن ادام ەركىن پايدالانا الادى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى