ءبىلىم جانە عىلىم مينيسترلىگى مەكتەپتەن كەيىنگى جاڭا ەمتيحاندار تۋرالى كەڭىنەن ايتىپ بەردى
استانادا وتكەن باسپا ءسوز ءماسليحاتىندا ق ر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جاڭىل جونتايەۆا مەكتەپتەن كەيىنگى ەمتيحاندار تۋرالى ايتىپ بەردى، دەپ حابارلايدى قازاقپارات ءتىلشىسى.
دەپارتامەنت ديرەكتورىنىڭ ايتۋىنشا، بۇرىن ۇلتتىق ءبىرىڭعاي تەستىلەۋگە قاتىسقىسى كەلمەيتىن بالالار عانا مەكتەپ ەمتيحانىن تاپسىرسا، كەلەسى جىلدان باستاپ بارلىق مەكتەپ وقۋشىلارى قورىتىندى ەمتيحاندى تاپسىراتىن بولادى. سودان كەيىن ۇلتتىق ءبىرىڭعاي تەستىلەۋگە قاتىسىپ، جوعارى وقۋ ورنىنا ءتۇسىپ كورمەك.
«مەكتەپتە وتەتىن ەمتيحاننىڭ ءبىر ەرەكشەلىگى، 10-11 - سىنىپ وقۋشىلارىنىڭ جاراتىلىستانۋ- ماتەماتيكا مەن گۋمانيتارلىق باعىتتا ءبىلىم العاندارى ەسكەرىلىپ، ولار قاي باعىتتا وقىسا، سول باعىتتا ەمتيحان تاپسىراتىن بولادى. سۇراقتار دا سوعان ساي بولادى. ال ەمتيحاندارعا كەلەر بولساق، ءبىزدىڭ بالالارىمىز انا ءتىلى مەن ادەبيەتتەن ەسسە جازادى. وعان ءۇش ساعات بەرىلەدى. ەسسە ادەبي تاقىرىپتاردا بەرىلەدى، ول شاعىن كولەمدەگى پروزالىق شىعارمالار نەمەسە وقۋشىنىڭ ءوزىنىڭ جەكە ويىن بىلدىرەتىن ەركىن تاقىرىپتا جازىلادى»، - دەيدى ج. جونتايەۆا.
ەكىنشى ەمتيحان قازاقستان تاريحىنان تاپسىرىلادى. ول اۋىزشا وتەدى. اتالعان ەمتيحان بويىنشا بارلىق بيلەتتەردىڭ سانى 25-تەن اسپايدى. ءاربىر بيلەتتە 3 سۇراقتان بولادى.
«ەكى سۇراق قازاقستان تاريحىنىڭ تەورياسىن قامتيتىن بولسا، ءۇشىنشى سۇراق شىعارماشىلىق سۇراق بولادى. ول كەزدە كارتامەن جۇمىس ىستەۋ كەرەك. ءۇشىنشى ەمتيحان الگەبرا جانە اناليز باستامالارىنا ارنالعان. بۇل ەمتيحان جازباشا بولادى. وعان بەس استرونوميالىق ساعات بەرىلىپ وتىر. سەبەبى ول بەس تاپسىرمادان تۇرادى. تاپسىرمالارى ماتەماتيكالىق فاكتىلەردى، تۇسىنىكتەردى، تاسىلدەردى، ەسەپ شىعارۋ جانە لوگيكالىق تاپسىرمالاردى شەشۋگە ارنالادى دەپ كۇتىلۋدە. سونىمەن بىرگە، ورىس جانە باسقا دا تىلدەردە وقيتىن مەكتەپتەردە قازاق تىلىنەن تەست بولادى دەگەن جوسپار بار. وعان 80 مينۋت بەرىلەدى. 40 سۇراققا 40 ۇپاي بەرىلەدى»، - دەپ اتاپ كورسەتتى دەپارتامەنت ديرەكتورى. ال سوڭعى ەمتيحاننىڭ ءپانىن مەكتەپ وقۋشىسى ءوزى تاڭدايدى.
اۆتور: ارمان اسقاروۆ
