نيكولاي ميللەر پاۆلودار وبلىسىندا مەشىت سالىپ جاتىر
بۇعان دەيىن وسى اۋىلدا ءبىر دە ءبىر قۇلشىلىق ەتەتىن ورىن بولماعان، دەپ حابارلايدى pavlodarnews.kz. گولۋبوۆكا اۋىلىنىڭ اكىمى نۇرلان احمەتوۆتىڭ ايتۋىنشا، ەرتىس اۋدانى گولۋبوۆكا اۋىلىنداعى «اباي» ج ش س- نىڭ باسشىسى نيكولاي ميللەر كەلەسى جىلى اۋىلداستارىنا تاماشا تارتۋ جاساۋدى كوزدەپ وتىر.
قازىرگى تاڭدا قوس عيبادات ءۇيىنىڭ قۇرىلىس جوباسى جاسالعان. كاسىپكەر رەسەيگە ىسساپارمەن بارعان كەزدە مۇنداي عيبادات ۇيلەردى سالۋدىڭ ءتيىمدى جولدارىمەن تانىسىپ قايتقان. عيماراتتاردىڭ قۇرىلىسىمەن اينالىسۋعا قازان قالاسىنان ارنايى ماماندار كەلەدى دەپ كۇتىلۋدە. كاسىپكەر مەشىت پەن شىركەۋ قۇرىلىسىنا ءوز ەسەبىنەن 120 ميلليون تەڭگە قاراجات بولگەن. - كاسىپكەر بىلتىر اۋىلعا باسسەين مەن تۇرعىندار دەمالىپ وتىراتىن ورىن سالۋدى باستاعان بولاتىن. قۇرىلىس جۇمىسى كەلەر جىلى اياقتالادى دەپ كۇتۋدەمىز. سونىمەن قاتار، بيىل 4 پاتەرلى ەكى ءۇيدىڭ قۇرىلىسى اياقتالدى. وندا الىس اۋىلداردان كەلگەن جاس ماماندار تۇرادى. جالپى، ءبىزدىڭ اۋىلدا 1000 نان استام ادام تىرشىلىك كەشۋدە. ونىڭ 200 ى وسى سەرىكتەستىكتە جۇمىس ىستەيدى، - دەيدى نۇرلان احمەتوۆ.
ايتا كەتەرلىگى، "اباي" ج ش س- نىڭ باسشىسى نيكولاي ميللەر ءوزى تۇراتىن گولۋبوۆكا اۋىلى تۇرعىندارىنىڭ يگىلىگىنە جىل سايىن 100 ميلليون تەڭگە بولەدى. سونىمەن قاتار، بيىل جەكە كاسىپكەر اۋىلدىڭ كىرەبەرىس جولىن جوندەپ، 1954 -جىلى تىڭ يگەرۋشىلەردىڭ قۇرمەتىنە سالىنعان ساياباققا جاڭعىرتۋ جۇمىستارىن جۇرگىزگەن. دەمالىس ورنىنا جاياۋ جۇرگىنشىلەر جولىن سالىپ، اعاش وتىرعىزىپ، ەلەكتر شامدارىن تارتقان.
