زاڭعار كارىمحان: وزگەنىڭ قاتىنىن ولەڭگە قوسا بەرۋگە بولادى
قۋانىش قوجاباي ۇلى جاس اقىننىڭ وسى ولەڭىندەگى ەتيكالىق جانە باسقادا كەمشىلىكتەرىنە سىنىن جازعان ەدى. ەندى مىنە اتالعان پىكىردىڭ دۇرىس ەمەستىگىنە زاڭعار كارىمحان ءوز ويىن ايتىپتى.
الدىمەن سوڭعى پىكىردى، سودان كەيىن قۋانىش قوجاباي ۇلىنىڭ سىنىن، ءارى قاراي ولەڭدى ۇسىنىپ وتىرمىز. وقىپ كورەلىك.
«كۇندەلىكتى ادەبي جاڭالىقتاردى قاداعالاپ وتىراتىن قاراپايىم وقىرماننىڭ ءبىرىمىن.
ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ماگيستراتۋراسىن بىتىرسەم دە، پەداگوگيكالىق عىلىمدار ماگيسترى بولا تۇرا ءوزىمدى سولاي ەسەپتەيمىن. 8- قاراشا كۇنى «ادەبيەت پورتالىنا» جاس اقىن امانجول جانايدىڭ «سالەم حات» اتتى اتتى ولەڭى جاريالانعان بولاتىن. بۇل ولەڭدى بۇرىندارى دا اۆتوردىڭ وزىنەن، الەۋمەتتىك جەلىدەن دە تالاي وقىدىم، كۋا بولعانمىن.
«وۋ، وزگەنىڭ قاتىنى، ءحالىڭ قالاي؟» دەپ باستالاتىن ولەڭ ءوزىنىڭ شىنايىلىعىمەن وقىرمان كوپشىلىككە ۇناعانى انىق. ماعان دا ۇنادى. سەبەبى، جاس كەزىندە ءبىر-ءبىرىن جاقسى كورىپ، ۋاعدا بايلاسىپ ءجۇرىپ، تاعدىردىڭ جازۋىمەن جولدارى ەكى ايىرىلعان ادامدار از با مىنا ومىردە. اقىن ولەڭى سولاردىڭ ءبىرتالايىنىڭ كوكىرەگىندە ماڭگىلىك قولامتالانىپ جاتقان اشى وكىنىشتىڭ قوزاسىن ۇرلەپ جىبەرگەندەي ەمەس پە؟ لايلىسىنە قوسىلا الماي ومىردەن باز كەشىپ زارلاپ وتكەن ءماجنۇندى ايتپاعاندا، ءوز جۇراعاتىمىز - ارقانىڭ ارداگەرى اقان سەرىنىڭ اقتوقتى تۋرالى تسيكلدەرىنىڭ ءوزى وسى تاقىرىپپەن وزەكتەس، ءتىپتى امانجول اقىنمەن مىنەزدەس جاتقانىن كىم جوققا شىعارسىن. بۇل ومىردە ءبارى ادام ويلاعانداي بولسا، ونى نەگە «بەس كۇندىك جالعان» دەپ ءجۇرمىز؟ بارلىعى ءبىز ويلاعانداي «يدەالنىي» بولسا، ولەڭ جازىپ نە كورىنىپتى؟
تاريحتاعى جالمۇقان مەن اقاننىڭ كەيىنىرەكتەگى دوستىعىنان حاباردارمىز، ءبىراق تا كەزىندە سەرىنىڭ اۋزىمەن ايتىلعان مىنا سوزدەر كۇللى قازاق دالاسىنا تاراعانى راس قوي:
بارەكەلدى اقتوقتى تاپقانىڭا،
جىبەكتەن شوق شەكەڭە تاققانىڭا.
بۇدان ارتىق قۇدايدان نە تىلەيسىڭ،
شولاق قاسقىر ءتۇسىپتى قاقپانىڭا.
سەرىنىڭ بۇل ولەڭ جولدارىمەن سالىستىرىپ قاراعاندا امانجول البىرت، جاس تا بولسا، ارتىق قادامعا، بيلەر تىلىمەن ايتقاندا «باس مىنەۋگە» بارماعان. ولەڭدە مۇنداي سيپاتتاۋ جوق.
اقتوقتى، كەتكەنىڭ بە شىنىمەنەن،
بال بەردىڭ تالاي جەردە تىلىڭمەنەن.
باسىڭدى سارى ميدا كەسىپ الىپ،
ومىرىمشە داۋلاسسامشى قۇنىڭمەن.
داريانىڭ قايراڭىنداي قالقا بالا،
زارلانىپ ءان شىرقايمىن ۇنىممەنەن.
ءبىز وسى ولەڭ ارقىلى اقان سەرىنىڭ ارۋاعىن تەربەتىپ، ءمىنىن قازايىق دەپ وتىرعان جوقپىز، جاي عانا سالىستىرۋ تۇرىندە تىلگە تيەك ەتىپ وتىرمىز. دەمەك، «سۇيگەن ادامىنا قوسىلا الماۋ» تاقىرىبى ءار زاماندا، ءار كەزەڭدە ءار ءتۇرلى سيپاتتا جىرلانىپ كەلگەن، جىرلانا دا بەرەدى. امانجولدىڭ ولەڭى دە سونىڭ ءبىرى كورىنىسى عانا.
وسى جەردە امانجول ولەڭىنە قاتىستى اۋەلگىدە الەۋمەتتىك جەلىدە، ىلە- شالا اتالعان پورتالدا جاريالانعان، ءوزىم كوپتەن بىلەتىن قۋانىش قوجاباي ۇلى دوسىمنىڭ «مىنەزى تاسىپ بارا جاتسا نەسىپبەكتى سىناسىن» اتتى ويتالقى ماقالاسىنا قاتىستى بىرەر پىكىر ءبىلدىرۋدى ءجون كوردىم. الدىمەن، اۆتوردىڭ ماقالاسىنان ءبىرشاما كولەمدى ءۇزىندى بەرەلىك: «امانجولدىڭ ولەڭى ءۇشىن مەن ۇيالدىم. اقبەرەن ەلگەزەك «ولەڭدەرى جاقسى ەكەن. مىنەزدى ەكەن» دەگەن پىكىر قالدىرىپتى. مەن جاقسى ولەڭ وقي المادىم، مىنەز ەمەس، توعىشارلىق كوردىم».
ارينە، اقىن ولەڭىن وقىعان وقىرماننىڭ ۇيالۋ، شاتتانۋ، وكىنۋ، ت. ب. سەزىمدەردى باستان كەشەتىنى راس. ولەڭگە «جاقسى» نەمەسە «جامان» دەپ باعا بەرۋ دە ءار وقىرماننىڭ ەركىندەگى دۇنيە. وسى تۇرعىدا قۋانىش اتالعان ولەڭنىڭ ەتيكالىق- ەستەتيكالىق تۇرعىدا تالعامعا ساي ەمەس دەپ باعا بەرۋىنە دە ەشقانداي سىن ايتا المايمىن. دۇرىس، پىكىر، سىن ايتىلسىن. مۇنىمەن «ءوز ءسوزىم - وزىمدىكى» دەگەن پرينتسيپكە سالعان دۇنيە دەپ توقتايمىن.
قۋانىش پىكىرىندە ءبىرىنشى جولداعى «وزگەنىڭ قاتىنى» دەگەن ارتىقتاۋ كەتتى دەيدى. ولاي ەمەس، مەنىڭشە. ويتكەنى امانجول «بىرەۋدىڭ قاتىنى» دەپ جازعان جوق، ولاي بولسا، «ءوز» دەگەن سوزدەن شىعارعانى سول ادامنىڭ ءوزىنىڭ تاعدىرىنا دا قاتىسى بار ەكەنىن ءبىلدىرىپ تۇر عوي. «سۇلۋلىقتى ءبىرىنشى بايقايتىن - اقىندار. قاسىرەتكە تەرەڭ كۇڭىرەنەتىندەر دە اقىندار. جالپاق جۇرتقا اقىننىڭ سۇلۋلىقتى كورە ءبىلۋى، ءسۇيۋى، ادەمى جەتكىزە ءبىلۋى ۇنايدى. سول سۇلۋلىقتىڭ بىرەۋى - ايەل زاتى»، - دەپ ويىن ارى قاراي ساباقتاپتى قۋانىش دوس.
وسى جەردە قۋانىش وزىنە ءوزى قايشى كەلىپ وتىرعان جوق پا؟ ءومىر ءاردايىم قۋانىشتى سۇلۋلىقتان نەمەسە سۇرقاي قاسىرەتتەن تۇرمايتىنى سياقتى، اقىننىڭ ولەڭى دە ءارقاشان «جىپتىكتەي» ياعني «يدەالنو- مورالنىي» بولمايدى عوي. ءومىردىڭ ءوزى سولاي. وقىس ويلى، توسىن وقيعالى، جاقسى ولەڭ تۋۋى ءۇشىن اقىنعا مىنەز كەرەكتىگى - ادەبيەتتەگى اكسيومالاردىڭ ءبىرى. امانجول ءوزى ومىرىندەگى قاسىرەتتى دەمەي-اق قويايىن، كۇيىكتى كۇيىن جىر تىلىمەن ورگەن ەكەن. ياعني، قۋانىشتىڭ تىلىمەن ايتقاندا «قاسىرەتكە تەرەڭ كۇڭىرەنىپ» وتىر.
قۋانىشتىڭ «امانجولعا تۇرمىسقا شىقپاعان قىزدىڭ مىناۋ ولەڭدى وقىعان سوڭ وكىنەتىنىنە كۇمانىم بار. بوسقا كەتكەن ۋاقىتىنا وكىنۋى مۇمكىن. تۇرمىسقا شىقپاعانىنا قۋانۋى عاجاپ ەمەس. جالپى، ەتيكا، مورال دەگەن دۇنيەلەر بار. امانجول اقىننىڭ سونى بىلگەنى ءجون-اۋ» دەپ ءۇستىرت بولجام جاساپ جاريالاۋىنىڭ ءوزى ەتيكاعا جاتا ما، مورالدىق قۇقىعى بار ما دەگەن وي تۋاتىنى انىق. سوسىن «وتباسىنىڭ شىرقى بۇزىلادى» دەپ قۇرعاق مورال وقۋدىڭ قاجەتى جوق. بۇل بۇرىنعى، كونەرگەن ءتاسىل. ادەبيەتكە شىنايىلىق جاراسادى.
ماقالادا ەتيكا، مورال تۋرالى ۇلكەن اكسەنت بەرىلگەن ەكەن، ەندەشە قۋانىش دوستىڭ ماقالاسى ارقىلى وسى ماسەلەنى ارى قاراي قاۋزايىق. «ال مىنەزى تاسىپ بارا جاتسا، ءتىلىپ تۇسەتىندەي ولەڭ جازسىن. ءوزىنىڭ «پوەت پەسەننيك» دەگەن اتاعى ازداي، ارتىنا ءبىر توپ سونداي اقىن قالدىرۋعا تالپىنىپ جۇرگەن نەسىپبەكتى سىناسىن!» - دەيدى قىزدى-قىزدىمەن اۆتور.
مەن جاس پەرى امانجولدىڭ دا، نەسىپبەك ايت ۇلىنىڭ دا ەكى تۋىپ ءبىر قالعانى ەمەسپىن. تەك جاس اقىننىڭ دا، اعا اقىننىڭ دا ءتىلىپ تۇسەتىندەي بولماسا دا، سەلت ەتكىزەتىندەي ولەڭدەرى بارلىعىنا كۋا، كىتاپ پاراقتاعان، عالامتور اقتارعان وقىرمانى عانامىن.
قازاق پوەزياسىندا وزىندىك ورنى بار، تەك تاۋەلسىزدىك جىلدارىنان بەرى قاراي ون التى بىردەي كەسەك پوەما جازعان نەسىپبەك اقىندى «پوەت-پەسەننيك» دەپ تومەنگە سىرعىتقان قۋانىش قوجاباي ۇلىنىڭ بۇل قىلىعى ءوزى ايتقان قانداي ەتيكاعا جاتادى، بۇدان قانداي مورالدىق دەڭگەيدى كورەمىز؟ ادەبيەتىمىزدە سالماق دارەجەسى دەڭگەيلەستەردىڭ، بوكس تىلىمەن ورىسشا ايتقاندا «تياجەلوۆەستەردىڭ» اراسىندا ءوتىپ جاتاتىن پولەميكالاردىڭ بارى راس. ءبىراق، كەز كەلگەن قازاق اۋىز وزىمدىكى ەكەن دەپ ەل الدىندا جۇرگەن ازاماتتارعا وسىلاي «ات قويىپ، ايدار تاعا بەرسە» نە قادىر- قاسيەتىمىز قالادى؟
نەسىپبەك انگە ءماتىن جازاتىن جەڭىل اۆتورلاردىڭ قاتارىندا ەمەس نەگىزى، ونىڭ بالالار اقىنى رەتىندە كوپ ەڭبەك ەتكەنى، تاۋەلسىزدىكتى جىرلاۋداعى ەپيكالىق قۇلاشى قازىرگى كەزدە كوپ اقىنداردا جوق. كەڭ تىنىس، ەركىن كوسىلۋ، سيۋجەتتەردىڭ جىمداسۋى، وقۋداعى جەڭىلدىگى - نەسىپبەكتى ۇلكەن اقىن ەكەندىگىن، تەرەڭ اقىن ەكەندىگىن، شىن شەبەر ەكەندىگىن مەنىڭ ءسوزىمسىز دە تانىتادى. ءتىپتى ونى «ساراي اقىنى»، «جاعىمپاز» دەپ جۇرگەندەر دە ونىڭ «بايتەرەك» پوەماسىن دۇرىس ءارى تولىق وقىماعاندار. وعان تالاي كوزىم جەتكەن.
ال ەندى نەسىپبەك اقىن مەن قۋانىش دوستىڭ اراسىنان قانداي قارا مىسىق جۇگىرىپ وتكەنىن، نەنى بولىسە الماعان قىجىلى بارىن مەن بىلمەيمىن. «وسەتىن ەلدىڭ بالاسى ءبىرىن ءبىرى باتىر دەر، وشەتىن ەلدىڭ بالاسى ءبىرىن ءبىرى قاتىن دەر» دەگەن ءبىزدىڭ قازاق. «مورال» دەمەكشى، ەگەردە وسى سوزدەرى دالەلدى بولماسا، قۋانىش مىرزانىڭ ءوزى مورالدىق زيان جاساپ وتىرعان جوق پا؟ «ەپيگرامما جازسىن، ارناۋ جازسىن، ايتەۋىر مىنەزىن كورسەتسىن سوعان» دەپ جاس بالانى اتاسىنداي كىسىگە ايداپ سالۋ - قاي ەتيكاعا جاتادى، قۋانىش؟
«ال، ايەلگە مىنەز كورسەتۋ كىمنىڭ قولىنان كەلمەيدى؟ «قاتىن» دەپ كىم اقىرا المايدى؟ مىنەزدى ايەلگە ەمەس، ەركەككە كورسەتۋ كەرەك، جاۋلاسساڭ جىگىتپەن جاۋلاس!» دەيسىڭ تاعى. باۋىرىم- اي دەيىن، قازىرگى كۇنى ايەلىنە مىنەز كورسەتە الاتىن، «قاتىن» دەپ اقىراتىن ەركەك، شىنىن ايتسام، اسا كوپ ەمەس-اۋ دەپ كۇدىكتەنەمىن...
«قاتىن» دەگەن ءسوزدىڭ قازاقتان باسقا تۇرىك حالىقتارىنىڭ بارىندە جاعىمدى سيپاتتا قولدانىلاتىنى ءوز الدىنا بولەك اڭگىمە. بۇل جەردە دە امانجول اقىننىڭ بۇل ءسوزى قولدانۋداعى پوەتيكالىق رەڭكى، ولەڭنىڭ ەموتسيالىق سيپاتىن تانىتۋداعى بايلامى دۇرىس قوي.
مۇرىنىن دا بەت قىلىپ كەتەر ەدىم،
بۇل قالادان الىستاۋ ءۇيى نەگە؟! -
دەگەننەن ارتىق ەركەككە قانداي مىنەز كورسەتۋى كەرەك؟
«ەشكىم «اقىن بولامىن» دەپ اقىن بولمايدى. كوكىرەك كوزى بىردەڭەنى كورگەن سوڭ، جۇرەگى سەزگەن سوڭ شىعارادى ولەڭدى» دەگەن ءسوزىڭ كوڭىلگە قونادى. كوڭىلگە قونۋ از، ءتىپتى وتە دۇرىس ايتىلعان ءسوز.
قۋانىش دوستى ءوز باسىم جوعارى باعالايمىن: الدى- ارتىن ساراپتايتىن ءبىلىمى بار، اقىل مەن اشۋىنا يە بولاتىنداي پاراساتى جەتەدى، قاي ىسكە سالساڭ دا مۇقالماس ازاماتتىعى ايقىن. بۇرىنىراقتا «كوكشەتاۋدا ءجۇز جىگىت بار، ءبىراق سول ءجۇز جىگىتكە تاتيتىن ءبىر جىگىت بار، ول - قۋانىش» دەگەن ءسوزىم - ءسوز، پىكىرىم - پىكىر. ءسوزدىڭ توقەتەرىن ايتقاندا، ايتار ءسوزىمىزدى، جازار پىكىرىمىزدى ەموتسيانىڭ جەتەگىنە ەرمەي، ەكشەپ- جۇپتاپ بارىپ جولدايىق. اشى سىن بولماسىن دەمەيمىن، سىن بولۋى كەرەك. ونسىز شىنايى شىعارما دا بولمايدى.»
تومەندە قۋانىش قوجاباي ۇلىنىڭ «سالەم حات» ولەڭى تۋرالى وقىرماندارعا جازعان پىكىرى:
قۋانىش قوجاباي ۇلى: مىنەزى تاسىپ بارا جاتسا نەسىپبەكتى سىناسىن
امانجول جاڭاي دەگەن اقىن جىگىتتىڭ «سالەم حات» دەگەن ولەڭىن «ادەبيەت پورتالى» جاريالاپتى. ولەڭ بىلاي باستالادى: وۋ، وزگەنىڭ قاتىنى، قالىڭ قالاي؟ «امانجولدىڭ ولەڭى ءۇشىن مەن ۇيالدىم. اقبەرەن ەلگەزەك «ولەڭدەرى جاقسى ەكەن. مىنەزدى ەكەن» دەگەن پىكىر قالدىرىپتى. مەن جاقسى ولەڭ وقي المادىم، مىنەز ەمەس، توعىشارلىق كوردىم. اقىننىڭ قاراپايىم پەندەدەن ايىرماشىلىعى نەدە؟ اقىن جەردەگى جاپىراقتان ۇزىلگەن ءومىر كورەدى، اسپاننان بەيبىتشىلىك، اق تۇستەن پاكتىك ت. ب. جالعاسا بەرەدى. سۇلۋلىقتى ءبىرىنشى بايقايتىن اقىندار. قاسىرەتكە تەرەڭ كۇڭىرەنەتىندەر دە اقىندار. جالپاق جۇرتقا اقىننىڭ سۇلۋلىقتى كورە ءبىلۋى، ءسۇيۋى، ادەمى جەتكىزە ءبىلۋى ۇنايدى. سول سۇلۋلىقتىڭ بىرەۋى - ايەل زاتى.
امانجولعا تۇرمىسقا شىقپاعان قىزدىڭ مىناۋ ولەڭدى وقىعان سوڭ وكىنەتىنىنە كۇمانىم بار. بوسقا كەتكەن ۋاقىتىنا وكىنۋى مۇمكىن. تۇرمىسقا شىقپاعانىنا قۋانۋى عاجاپ ەمەس. جالپى، ەتيكا، مورال دەگەن دۇنيەلەر بار. امانجول اقىننىڭ سونى بىلگەنى ءجون-اۋ. ال مىنەزى تاسىپ بارا جاتسا، ءتىلىپ تۇسەتىندەي ولەڭ جازسىن. ءوزىنىڭ «پوەت پەسەننيك» (ءان ءماتىنىنىڭ اقىنى - رەد.) دەگەن اتاعى ازداي، ارتىنا ءبىر توپ سونداي اقىن قالدىرۋعا تالپىنىپ جۇرگەن نەسىپبەكتى سىناسىن! ەپيگرامما جازسىن، ارناۋ جازسىن، ايتەۋىر مىنەزىن كورسەتسىن سوعان. ال، ايەلگە مىنەز كورسەتۋ كىمنىڭ قولىنان كەلمەيدى؟ «قاتىن» دەپ كىم اقىرا المايدى؟ مىنەزى ايەلگە ەمەس، ەركەككە كورسەتۋ كەرەك، جاۋلاسساڭ جىگىتپەن جاۋلاس!
قازىر بىرەۋدەن «جاڭگىر حان كىم؟» دەپ سۇراساڭ ماحامبەتتىڭ:
حان ەمەسسىڭ، قاسقىرسىڭ،
قاس الباستى باسقىرسىڭ،
دوستارىڭ كەلىپ تابالاپ،
دۇشپانىڭ سەنى باسقا ۇرسىن! - دەگەن ءتورت جول ولەڭىن ايتىپ بەرەدى.
بۇگىندە ورالدىڭ قاق تورىندە جاڭگىر حان اتىنداعى ۋنيۆەرسيتەت بار ەكەندىگى، ونىڭ قازاققا كومەكتەسۋ جولىن باسقالاي تاڭداعاندىعى، مەدرەسە اشقاندىعى تۋرالى ايتىلمايدى. نەگە؟ كىم كىنالى؟ ەشكىم كىنالى ەمەس. جاڭگىر حان دۋالى اۋىز، مىنەزدى ماحامبەتتىڭ قاھارىنا ۇشىرادى. بولدى. اقىن قۇدىرەتى وسىندا. اقىندى حالىقتىڭ باسىنا كوتەرەتىنىنىڭ ءمانىسى دە وسى. دۋلات پەن جاياۋ مۇسانىڭ ولەڭدەرىندەگى شورماننىڭ بالالارى، باراق سۇلتان سەكىلدى كەيىپكەرلەر جامان بولماعان.
ءبىراق ولاردىڭ بۇكىل ءىسىن اقىننىڭ ءبىر شۋماق جىرى شايىپ كەتتى. ساكەن «وزگە ءسوزدىڭ پاتشاسى - سەنىڭ ءسوزىڭ، ءيا بار بول بۇل دۇنيەدە، ياكي جوق بول» دەيدى. ءسوز قۇدىرەتىن تۇسىنەتىندەر ءبىلىپ جۇرەر. ەشكىم «اقىن بولامىن» دەپ اقىن بولمايدى. كوكىرەك كوزى بىردەڭەنى كورگەن سوڭ، جۇرەگى سەزگەن سوڭ شىعارادى ولەڭدى. ءبىراق سول ولەڭدى جەتكىزۋ ءتىلدىڭ ءىسى. سوندىقتان «تىلگە جەڭىل، جۇرەككە جىلى تيەتىن» ولەڭ شىعارا ءبىلۋ كەرەك. زامانداسىما اباي مەن ماعجان سەكىلدى اۋليە بول دەپ وتىرعان جوقپىن. ۇقساپ باققاننىڭ ايىبى جوق دەگەن دۇنيە مەنىڭ پىكىرىم!
امانجول جاڭاي:
سالەم حات
وۋ، وزگەنىڭ قاتىنى، قالىڭ قالاي؟
بۇل حاتتى دا قالارسىڭ قابىلداماي!..
مەنەن قالعان جۇرەكتىڭ نالاسىن دا،
جاراسىن دا جاتىر-اۋ جارىڭ جالاي!
قالاي ءوزى، ءۇي بولعان وڭاي ما ەكەن،
تىنىشتىقتى بۇرىنعى توناي ما ەكەن؟
بىرگە تۇسكەن سۋرەتتىڭ ءبارىن جىرتىپ،
ءومىر ءسۇرىپ جاتىرمىن، سولاي، كوكەم!
«ەر- قوساي» دەپ قويىپسىڭ اتىن ۇلدىڭ،
قالى قالاي كىشكەنتاي باتىرىڭنىڭ؟
ەسىك جاققا جەتە مە جۇماق ءيسى -
بەسىك جاقتان اڭقىعان ءاتىرىنىڭ؟!
بوستاندىقتىڭ شىعارماي بيىنە دە،
جارىڭ قالاي، قىزعانىپ كۇيىنە مە؟
مۇرىنىن دا بەت قىلىپ كەتەر ەدىم،
بۇل قالادان الىستاۋ ءۇيى نەگە؟!
ولەڭ- ءومىر وسى ەدى باستان كەشكەن،
ساعان دەگەن كوڭىلىم - استاڭ- كەستەڭ!
ازى قالدى سەن جايلى ەستەلىكتىڭ،
الدەقاشان ءبىز جايلى قاشقان-دى ەستەن.
توتەپ بەرىپ سان ءتۇرلى كۇش- اعىنعا،
مەن ءوزىڭسىز، بىلمەيمىن، ۇشامىن با؟
...سەزىپ ءجۇرمىن سەن ءالى ساعىناسىڭ -
كۇيەۋىڭنىڭ جاتىپ اپ قۇشاعىندا...
adebiportal.kz
سايتقا ازىرلەگەن بەيسەن سۇلتان ۇلى
