پاۆلودار وبلىسىندا سابيگە قويىلعان باتۋ-حان ەسىمى ۇلكەن داۋ تۋدىردى
ايتۋلارىنشا، ادام ەسىمىندە سىزىقشا بولماۋى ءتيىس. ازان شاقىرىپ قويعان اتتى قالاي دا راسىمدەيمىز دەگەن وتباسى مەن ماماندار اراسىنداعى داۋدىڭ ءتۇيىنى قالاي شەشىلەتىنىن بىلە الماي وتىر، - دەپ حابارلايدى ك ت ك تەلەارناسى.
اقسۋداعى احمەتجانوۆتار وتباسىندا قىركۇيەكتىڭ اياعىندا دۇنيەگە ءسابي كەلدى. قۋانعان اكەسى ۇلىنا باتۋ-حان ەسىمىن قويعان بولاتىن. الايدا التىن وردانىڭ ۇلى حانىنىڭ اتىن قۇجاتقا جازۋ مۇمكىن بولماي شىقتى. حالىققا قىزمەت كورسەتۋ ورتالىعىندا قوسارلانعان ەسىمدى، ياعني، باتۋ جانە حان سوزدەرىن دەفيس ارقىلى ارقىلى جازۋعا بولمايدى دەپ، ارىزدارىن كەرى قايتارعان.
«مىنە بالا قىرقىنان شىقتى، نە قۇجات جوق، اۋرۋحاناعا بارا الماي جاتىرمىز. اي سايىن تولەتەنەتىن اقشانى دا سونى الا الماي وتىرمىز. باسقالارعا سىزىقشاسىن قويىپ جازىپ بەردى. ال ماعان كەلگەندە تىرەلىپ قالدى»، - دەيدى اقسۋ قالاسىنىڭ تۇرعىنى التىنبەك احمەتجانوۆ.
حالىققا قىزمەت كورسەتۋ ورتالىعى ماماندارىنىڭ ۋاجىنە وتاعاسىنىڭ كونگىسى جوق. شىڭعىس حان نەمەرەسىنىڭ ەسىمىن ۇلىم قالاي دا ەنشىلەۋى ءتيىس دەيدى. ال ا ح ا ج ماماندارى ادام ەسىمىنە دەفيس قويۋدىڭ زاڭعا قايشى ارەكەت ەكەنىن العا تارتادى.
«تىركەۋ تۋرالى وتىنىشىندە ول ازامات بالانىڭ اتىن دەفيس ارقىلى جازباقشى بولعان. «نەكە جانە وتباسى» كودەكسىنە سايكەس بالانى تىركەگەن كەزدە بالانىڭ اتى ەكى اتپەن قويىلۋعا بولادى، ءبىراق تا سىزىقشا ارقىلى قويۋعا بۇل كودەكس بويىنشا رۇقسات ەتىلمەيدى»، - دەيدى اقسۋ قالاسى ازاماتتىق حال اكتىلەرىن تىركەۋ ءبولىمىنىڭ باس مامانى جانداربەك تورەبەكوۆ.
ال كودەكستەن مۇنداي تىيىمدى ىزدەپ تاپپاعان اتا-انا بۇدان سوڭ تالاپ ارىزىن الىپ، پروكۋراتۋراعا بارعان. تەكسەرىستى باستاعان قۇزىرلى ورگان ءبىر اي ۋاقىت وتكەنىمەن جارىتىپ جاۋاپ بەرمەپتى. الايدا بۇل جاعدايعا ءبىزدىڭ ارنانىڭ ءتۇسىرىلىم توبى ارالاسقان سوڭ داۋلى ماسەلە ءاپ- ساتتە شەشىمىن تابا كەتتى. ياعني تىلشىلەر كەتىسىمەن نارەستە قۇجاتتى بولدى. كادردا بايقاعاندارىڭىزداي باتۋ-حان ەسىمى سىزىقشا ارقىلى جازىلعان.
وبلىستىق ادىلەت دەپارتامەنتى ماماندارىنىڭ ايتۋىنشا، زاڭعا سايكەس جاڭا تۋعان نارەستەگە قوسارلانعان ەسىمدى بەرۋگە بولادى. ال ەسىمدەردىڭ بولەك نەمەسە اتا-انانىڭ قالاۋى بويىنشا دەفيس ارقىلى جازۋعا رۇقسات بەرەتىن زاڭدا ارنايى تارماق بار ەكەن. تەك مۇنى اقسۋلىق ماماندار بىلمەگەن سىڭايلى. ال ءبىر جارىم اي ساندالعان احمەتجانوۆتار اۋلەتى ەندى بۇل جايتقا قاتىستى حال اكتىلەر بولىمىنەن تۇسىنىكتەمە كۇتەدى. ەش جاۋاپ بولماعان جاعدايدا بالاسىنىڭ قۇقىعىن بۇزعانداردى سوتقا بەرمەك.
