ماقپال ءجۇنىسوۆا ابايسىزدا شاھيزادانىڭ كونسەرتىنىڭ سەناريىن بۇزدى
بۇل تۋرالى 31 - ارنانىڭ «ايتا بەرسىن» باعدارلاماسىندا ايتىلدى.
بىرنەشە كۇن بۇرىن وتكەن شاھيزادانىڭ كونسەرتى ءوز كوڭىلىنەن شىقپادى. ايتۋىنشا، كوپتەگەن كەمشىلىك بولعان. كونسەرت اراسىنداعى ۇزىلىستەر دە جيىلەپ كەتكەن كورىنەدى. مۇنىمەن قاتار، حالىق ءارتيسى ماقپال ءجۇنىسوۆا بىلمەستىكپەن كەشتىڭ سەناريىن وزگەرتىپ جىبەرگەن. دەسە دە، شاھيزادا ءدال وسىنداي انالاردى ەرەكشە قۇرمەتتەيتىنىن ايتىپ جاتىر.
«ءاربىر جاسالعان ءىستىڭ ارتىقشىلىقتارى مەن كەمشىلىكتەرى بولادى. كورەرمەن بايقاماسا دا، مۇنى مەن بايقادىم. ولار كەشتىڭ سوڭىنا دەيىن كەتپەي وتىردى. سوعان قاراعاندا ۇناعان شىعار دەپ ويلايمىن. ءوز كەشىمە ارى كەتسە، ءۇش دەگەن باعا قويار ەدىم. شىنىمدى ايتسام، ءوزىم ريزا ەمەسپىن. ويتكەنى، ۇنەمى ىزدەنىس ۇستىندەگى انشىلەردىڭ قاتارىنانمىن. ەشۋاقىتتا شەتتە قاراپ وتىرمايمىن. «سول كەزدە بىلاي جاساۋىمىز كەرەك ەدى» دەگەن سەكىلدى ويلار بولادى. «تويدىم، بولدىم، قويدىم، مەن كەرەمەتپىن» دەپ تە ايتپايمىن»، - دەيدى ول.
ءانشىنىڭ كوڭىلىنە قاياۋ تۇسىرگەن تاعى دا بىرنارسە بولدى. جالعىز نەمەرەسى كاۋسارعا جوسپارلانىپ قويعان تۇساۋكەسەر ءراسىمى شاھيزاداسىز ءوتتى. رەسپۋبليكا سارايىندا تۇساۋكەسەردى سالت- داستۇرىمىزگە ساي وتكىزۋدى ارمانداعان ءانشى قادىرلى قوناعىن كورەرمەن قاتارىنان الىپ كەلەمىن دەگەنشە ماقپال اپاي الا ءجىپتى كەسىپ، نەمەرەسىنىڭ تۇساۋكەسەرىن جاساپ جىبەردى. دايىندىق جوعارى دەڭگەيدە وتسە دە، كونسەرت شاھيزادا جوسپارلاعانداي بولمادى. ول ارەڭ دەگەندە كيىمىن اۋىستىرىپ، اراسىندا ءبىراز شارشاپ قالدى. ونىڭ ۇستىنە ەكى ساعاتقا سوزىلعان كونسەرت تولىقتاي جاندى داۋىستا وتكەن ەدى.
«مەن بايقاماي قالسام دا، تۇساۋىن ۇلكەن انالار كەسىپ جاتىر عوي. ماعان ودان ارتىق نە كەرەك؟ ! سوسىن الگى ۇلكەن انامىز، قۇداعيىمىز كىشكەنە كىدىرىپ قالدى. نەگىزى تۇساۋىن سول كىسى كەسۋى كەرەك ەدى. ياعني، ەكى جاقتان ەكى انا كەسۋى كەرەك ەدى. وسى سەكىلدى كەمشىلىكتەر بولىپ جاتتى»، - دەيدى شاھيزادا.
