مۇناي باعاسى گەوساياسي جاعدايلارعا وتە تاۋەلدى - ۇكىمەت باسشىسى

بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا ق ر پرەمەر-ءمينيسترى باقىتجان ساعىنتايەۆ ءمالىم ەتتى. ماجىلىسمەندەر «2017-2019-جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تالقىلاۋدا، دەپ حابارلايدى قازاقپارات.

«جۇمىسىمىزدى باستاماس الدىندا، ياعني ءبىر ساعات بۇرىن مۇنايدىڭ باعاسى 46 دوللار بولسا، ال قازىر ا ق ش- تاعى پرەزيدەنتتىك سايلاۋ قورىتىندىسى كەزىندە قازىر باعا 44 دوللارعا ءتۇسىپ وتىر. اتاپ ايتقاندا، مۇناي باعاسى گەوساياسي جاعدايلارعا وتە تاۋەلدى. بۇعان قوسا، يراكتاعى، سيرياداعى بولىپ جاتقان جاعدايلار دا اسەرىن تيگىزىپ جاتىر. وزدەرىڭىز بۇگىنگى تالقىلاۋعا سالىپ وتىرعان ءۇش جىلدىق بيۋدجەتكە قارايتىن بولساق، وندا كىرىستەر بولىگىنىڭ 45 پايىزى نەگىزىنەن مۇناي سالاسىنان كەلىپ تۇسەتىن قارجىعا تيەسىلى. سول سەبەپتەن، ءبىز بيۋدجەتتى جوبالاعان كەزدە مۇناي جانە مەتالل باعاسىنا ساقتىقپەن قاراپ وتىرمىز. الايدا، ەلباسىنىڭ تاپسىرماسى بار، وسىعان سايكەس بۇنداي جاعدايعا قاراماستان، حالىقتىڭ الدىنداعى بارلىق الەۋمەتتىك مىندەتتەمەلەر تولىق قالپىندا ساقتالادى»، - دەدى ۇكىمەت باسشىسى.

ب. ساعىنتايەۆتىڭ سوزىنە قاراعاندا، ەكونوميكامىزدىڭ 27 پايىزى «كولەڭكەلى» جانە ونى وسىدان شىعارۋ ءۇشىن ءتيىستى قادامدار اتقارىلۋدا. سونىمەن قاتار ول ۇلتتىق قوردىڭ جاڭا تۇجىرىمداماسى دايىندالىپ جاتقانىنا توقتالا كەلە: «ول جاقىن ارادا ازىرلەنەدى. بۇل جەردە ۇلتتىق قور قارجىسىن جۇمساپ قانا قويماي، جوسپارلاۋدىڭ جاڭا جولى ەسكەرىلەدى»، - دەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى