قازاقستاندىقتاردىڭ كوبىسى مەككەدە قايتىس بولعان اتا- اناسىن سول جەردە جەرلەيدى

حابارلايدى قازاقپارات ءتىلشىسى.

 «ۇستىمىزدەگى جىلى  3000 قازاقستاندىق قاجىلىققا باردى. ەندى، ول جەرگە بارعاننان كەيىن ءتۇرلى جاعدايلار بولىپ تۇرادى. ءبىر كىسىلەردىڭ دەنساۋلىعى ناشارلايدى. بىرەۋلەر اداسىپ كەتەدى، ەكىنشىلەر ءتولقۇجاتىن جوعالتىپ الادى. ونىڭ بارلىعى بىردەن سول جەردە شەشىلەدى. سەبەبى ءبىز پوليتسيامەن تىعىز جۇمىس جاسايمىز»، - دەپ اتاپ كورسەتتى قازاقستاننىڭ ساۋد ارابياسىنداعى توتەنشە جانە وكىلەتتى ەلشىسى باقىت باتىرشايەۆ.

 ونىڭ ايتۋىنشا، جىل سايىن قاجىلىققا باراتىن قازاقستاندىقتاردىڭ ىشىندە 5-8 ادام قايتىس بولىپ جاتادى. ولاردىڭ دەنى - جاسى كەلگەن كىسىلەر. دەگەنمەن، بيىلعى قاجىلىقتا ونداي جاعدايلار بولعان جوق. قاجىلىققا بارعان قازاقستاندىقتاردىڭ بارلىعى امان- ەسەن ەلگە ورالدى.

«ەندى، ادام قايتىس بولعان جاعدايدا ونىڭ تۋعان- تۋىسقاندارى «مەككەدە جەرلەيمىز» دەسە، سول جەردە قالدىرا الادى. ەلگە الىپ كەلسە دە بولادى. ءبىراق وسى ۋاقىتقا دەيىن قازاقستاندىقتاردىڭ 95 پايىزى قاجىلىقتا قايتىس بولعان تۋىستارىن قاسيەتتى مەككەدە جەرلەگەندى ءجون كوردى. شىنى كەرەك، ءبىر قاجىلىق ماۋسىمىندا كوپ ادام قايتىس بولادى عوي. ءۇش ميلليونعا جۋىق ادام كەلەدى. ارينە، جاعداي كوپ. سوندىقتان ارنايى جەرلەر بار، ءبارى تەگىن. جەرلەۋ راسىمدەرىن دە ساۋد ارابياسى ءوزى تولەيدى. بارلىعى تەگىن»، - دەپ اتاپ كورسەتتى ەلشى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى