وڭتۇستىك كورەيادا ەلباسى تۋرالى كىتاپتىڭ تۇساۋكەسەرى بولىپ ءوتتى
ءىس-شارا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ وسى ەلگە رەسمي ساپارىنىڭ قارساڭىندا، قازاقستان باسشىسىنا فيلوسوفيا قۇرمەتتى دوكتورى عىلىمي دارەجەسى بەرىلۋ ءراسىمى بولادى دەپ كۇتىلىپ وتىرعان ەنسە ۋنيۆەرسيتەتىندە ءوتتى. ەنسە ۋنيۆەرسيتەتى - كورەيانىڭ بايىرعى جوعارى وقۋ ورىندارىنىڭ ءبىرى.
ول 1885-جىلى اشىلعان. قازىرگى كەزدە ەنسە ۋنيۆەرسيتەتى وسى ەلدەگى ءۇش جەتەكشى ۋنيۆەرسيتەتتەردىڭ قاتارىنا كىرەدى، ونىڭ قۇرامىندا 17 كوللەدج، 121 فاكۋلتەت جانە 18 زەرتتەۋ ينستيتۋتى بار.
ەنسەدە 50 مىڭنان استام ستۋدەنتتەر ءبىلىم الادى. تۇساۋكەسەرگە قازاقستان تاراپىنان كىتاپتىڭ اۆتورى ماحمۇت قاسىمبەكوۆ، كورەيا رەسپۋبليكاسىنداعى ق ر توتەنشە جانە وكىلەتتى ەلشىسى دۋلات باقىشيەۆ، ق ر پارلامەنتى سەناتىنىڭ دەپۋتاتى اسقار بەيسەنبايەۆ، ق ر پرەزيدەنتى كەڭسەسى باستىعىنىڭ ورىنباسارى باقىتجان تەمىربولات، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ، قازاقستانداعى كورەيلەر قاۋىمداستىعىنىڭ ۆيتسە- پرەزيدەنتى گەرمان كيم قاتىستى.
كورەيا تاراپىنان ەنسە ۋنيۆەرسيتەتىنىڭ پرەزيدەنتى كيم يونگ حاك، «سينچحون سيەۆەرانس» كلينيكاسىنىڭ باس ديرەكتورى لي بەن سوك، چوندجۋ ۋنيۆەرسيتەتىنىڭ پرەزيدەنتى حان يانگ سۋ، كورەيا قورشاعان ورتا قاۋىمداستىعىنىڭ پرەزيدەنتى چوي بيۋن ۆحان، ەنسە ۋنيۆەرسيتەتىنىڭ پروفەسسور-وقىتۋشىلار قۇرامى مەن ستۋدەنتتەر، ساراپشىلار، جۋرناليستەر قاتىستى. تۇساۋكەسەرگە جينالعان جۇرتشىلىق كىتاپتى جىلى قابىلدادى.
ءىس-شاراعا قاتىسۋشىلاردىڭ جالپى ورتاق پىكىر بويىنشا قازاقستان باسشىسى تۋرالى كورەي تىلىندە باسىلعان كىتاپ ەكى ەل اراسىنداعى رۋحاني-مادەني بايلانىستاردى ودان ءارى نىعايتۋعا لايىقتى ۇلەس قوسادى. قازاقستان پرەزيدەنتى تۋرالى ءومىرباياندىق كىتاپ بۇدان بۇرىن قازاق، ورىس، اعىلشىن، اراب، نەمىس، ۆەنگر، سەرب تىلدەرىندە جارىق كورگەن بولاتىن.
بۇل كىتاپتى ن. ءا. نازاربايەۆتىڭ ءومىرى مەن قىزمەتىن رەسمي تاريحي-عۇمىرنامالىق زەرتتەۋدىڭ العاشقى تاجىريبەسى دەۋگە بولادى. مۇندا ونىڭ قاراپايىم اۋىلداعى جاسوسپىرىم كەزىنەن باستاپ، ۇلت كوشباسشىسىنا دەيىنگى ءومىر جولى باياندالادى.
باسىلىمدا باستى نازار ن. ءا. نازاربايەۆتىڭ ساياسي ءومىربايانىنا اۋدارىلعان، ول قازاقستاننىڭ ХХ-ХХІ عاسىرلار ارالىعىنداعى دامۋى كەزىندە بولىپ وتكەن درامالىق جانە ادەتتەن تىس وقيعالار مەن پروتسەستەردىڭ اياسىندا بەرىلگەن.
اۋقىمدى مۇراعات ماتەريالدارىنىڭ نەگىزىندە ازىرلەنگەن ءومىربايان قازاقستاننىڭ ەڭ بەرتىنگى تاريحى بويىنشا ەلەۋلى قۇجاتتاما كوزى بولىپ تابىلادى. كىتاپتا فوتوسۋرەتپەن بەزەندىرۋدىڭ باي ماتەريالدارىمەن بىرگە، جەكە قۇجاتتاردىڭ ءتۇپ نۇسقالارىمەن تەڭدەس كوشىرمەلەرى العاش رەت ۇسىنىلادى. ال مۇنىڭ ءوزى وقىرماننىڭ سۋرەتتەلەتىن وقيعالار اۋانىنا تولىعىراق قانىعۋىنا سەپتىگىن تيگىزەدى.
بۇل باسىلىمعا ونىڭ اۆتورى قازاقستان رەسپۋبليكاسى پرەزيدەنتى كەڭسەسىنىڭ باستىعى، ساياسي عىلىمدار دوكتورى، پروفەسسور ماحمۇت قاسىمبەكوۆ ەكەنى تۋرالى دەرەك ەرەكشە قۇندىلىق بەرەدى، ول كوپ جىلدار بويى مەملەكەت باسشىسىنىڭ تىكەلەي قاراماعىندا قىزمەت اتقارىپ، پرەزيدەنتتىك ينستيتۋتتى زەرتتەۋمەن كاسىبي تۇرعىدا اينالىسىپ كەلەدى.
ونىڭ عىلىمي جانە شىعارماشىلىق قورىندا پرەزيدەنتتىك ينستيتۋتقا، ن. ءا. نازاربايەۆتىڭ ساياسي قىزمەتىنە ارنالعان عىلىمي مونوگرافيالار، وقۋ قۇرالدارى، كوپ تومدىق باسىلىمدار، پۋبليتسيستيكالىق جيناقتار، كوپتەگەن ماقالالار بار.
