قازاقستان پرەزيدەنتى كەنوتاف ەسكەرتكىشىنە گۇل دەستەسىن قويۋ راسىمىنە قاتىستى
سونىمەن قاتار مەملەكەت باسشىسى بەيبىتشىلىك مەموريالدى مۋزەيىنىڭ جادىگەرلەرىن كورىپ شىقتى، دەپ حابارلايدى قازاقپاراتتىڭ ارناۋلى ءتىلشىسى حيروسيمادان.
الدىمەن نازاربايەۆتىڭ قۇرمەتىنە «زامان- اي» ءانىن حور ورىنداۋشىلارى قازاق جانە جاپون تىلىندە ورىندادى. بۇگىنگى كۇنى بۇل ءان قازاقستاننىڭ يادرولىق سىناق الاڭىن جابۋ جولىندا كۇرەسكەن ازاماتتار قوزعالىسىنىڭ سيمۆولىنا اينالعان. مۇنان بولەك، قازاقستان پرەزيدەنتى مۋزەيدىڭ قۇرمەتتى قوناقتارىنا ارنالعان كىتابىنا ەستەلىك جازبا قالدىردى.
ايتا كەتەرلىگى، كەنوتاف ەسكەرتكىشى 1945 -جىلى حيروسيما قالاسى اتوم بومبالاۋى سالدارىنان تولىقتاي جويىلىپ كەتكەن بۇرىنعى ناكادزيما اۋماعىنداعى بەيبىتشىلىك مەموريالدى ساياباعىندا ورنالاسقان. جىل سايىن 6 - تامىزدا جاپونيانىڭ رەسمي تۇلعالارى مەن شەتەلدىك قوناقتاردىڭ قاتىسۋىمەن اتوم بومبالاۋىنان قازا تاپقانداردى ەسكە الۋعا ارنالعان شارا وتكىزىلىپ تۇرادى. بەيبىتشىلىك مەموريالدى مۋزەيى دە وسى ساياباقتا ورناتىلعان. ول نەگىزگى جانە شىعىس كورپۋسىنان تۇرادى. باس كورپۋستا جاپونيانىڭ اتوم بومباسىنا ۇشىراۋىمەن بايلانىستى جارىلىستىڭ زۇلمات زارداپتارىن پاش ەتەتىن ماتەريالدار قويىلعان. ال شىعىس كورپۋسى اتوم بومبالاۋدىڭ العىشارتىنا، جاپونيانىڭ ەكىنشى دۇنيەجۇزىلىك سوعىسقا قاتىسۋىنا جانە جالپى يادرولىق عاسىر تۋرالى جالپى اقپاراتتارعا ارنالعان.
اۆتور: مارلان جيەمباي
