قازاقستاندا بالالاردى مىندەتتى ۆاكسيناتسيالاۋ ەنگىزۋ ۇسىنىلدى
دەپ حابارلايدى قازاقپارات.
«تاعى ءبىر ماسەلە - بالالاردى ۆاكسيناتسيالاۋ. وتكەن جولى باس پروكۋرور باستاعان جۇمىس توبىنىڭ جۇمىسى بارىسىندا مىناداي پروبلەما انىقتالدى - ءدىني سەبەپتەرگە بايلانىستى بالالارعا ۆاكسيناتسيا جاسالماۋدا.
سوندىقتان مەنىڭ ويىمشا، بالاباقشاعا نەمەسە مەكتەپكە قابىلدار الدىندا بالالاردى مىندەتتى ۆاكسياناتسيادان وتكىزۋ قاجەت نەمەسە ونىڭ جاسالعاندىعى جونىندە انىقتاما سۇراتۋ كەرەك. مەنىڭشە، حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكس اياسىندا وسى سۇراقتى قاراستىرعان دۇرىس بولادى»، - دەدى بەردىبەك ساپاربايەۆ ۇكىمەت باسشىسى باقىتجان ساعىنتايەۆقا قاراتىپ ايتقان سوزىندە.
ەسكە سالا كەتەيىك، بيىل ءوزىن دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باس گومەوپاتى رەتىندە تانىستىرعان مارينا تارگاكوۆانىڭ ادامدارعا ەكپەدەن باس تارتۋ تۋرالى الەۋمەتتىك جەلىلەر مەن مەسسەندجەرلەر ارقىلى تاراتىلعان بەينەجازۋ تۇرىندەگى لەكسياسى قازاقستاندا قىزۋ تالقىلانعان بولاتىن. كەيىن «باس گومەوپاتتىڭ» ەكپەدەن باس تارتۋ تۋرالى ينتەرنەتتە تاراتىلعان اقپارات شىندىققا جاناسپايتىندىعىن رەسمي بيلىك جاريا ەتتى. ءبىراق قازىردىڭ وزىندە حالىق اراسىندا ەكپە جاساتۋ قاجەت پە، جوق پا دەگەن ساۋالعا ديسكۋسسيالار ءجۇرىپ جاتىر.
اۆتور: جاسۇلان جولدىبايەۆ
