استانا اۋەجايىندا پوليتسيا موناكو ەلىنىڭ كوميسسارىن ءتۇن ىشىندە ۇستاعان
«پوليتسەيلەردىڭ ايتۋى بويىنشا، شەتەل ازاماتى 2016 -جىلعى قازان ايىنىڭ 26 سىنان 27 سىنە قاراعان ءتۇنى استانا قالاسى اۋەجايىندا بەلگىلەنبەگەن جەردە شىلىم شەگۋگە ارەكەت ەتكەنى ءۇشىن استانا قالاسى اۋەجايىنداعى جەلىلىك پوليتسيا بولىمىنە جەتكىزىلگەن»، - دەلىنگەن كولىكتەگى ىشكى ىستەر دەپارتامەنتىنىڭ باسپا ءسوز قىزمەتىنىڭ مالىمەتىندە.
بۇعان دەيىن موناكو كوميسسارىنا پوليتسيا ەشقانداي قۇجات تولتىرماستان 120 ەۆرو كولەمىندە ايىپپۇل سالماق بولدى دەگەن اقپارات تاراعان ەدى. ول پوليتسيالاردىڭ بىرەۋى 30، ەكىنشىسى 26 جاستا ەكەن. «سوتقا دەيىنگى تەرگەۋ بارىسىندا استانا قالاسى اۋەجايىندا بەلگىلەنبەگەن جەردە شىلىم شەگۋگە ارەكەت ەتكەنى ءۇشىن شەتەلدىك ازاماتتى استانا قالاسى اۋەجايىنداعى جەلىلىك پوليتسيا بولىمىنە جەتكىزگەن 1986 جانە 1993 ج. ج. تۋعان پوليتسيا قىزمەتكەرلەرىنەن قورعاۋعا قۇقىعى بار كۋاگەر رەتىندە سۇراق الىندى. قازىرگى ۋاقىتتا وسى ءىس تەرگەلۋ رەتتىلىگىن انىقتاۋ ءۇشىن قر بپ باس كولىك پروكۋراتۋراسىنا جىبەرىلدى»، - دەپ جاۋاپ بەرگەن كولىكتەگى ىشكى ىستەر دەپارتامەنتىنىڭ باسشىسى ا. قابىلوۆ.
ال، «تەمىرجول، اۋە جانە تەمىرجول كولىگىندەگى ءتارتىپتى قاداعالايتىن كولىكتەگى ىشكى ىستەر دەپارتامەنتىنىڭ قىزمەتكەرلەرى قوعامدىق ورىندا تەمەكى تارتقان ادامعا نەشە تەڭگە كولەمىندە ايىپپۇل سالا الادى؟» دەگەن سۇراققا ۆەدومستۆو: "اكىمشىلىك قۇقىق بۇزۋشىلىق تۋرالى قازاقستان رەسپۋبليكاسىنىڭ كودەكسىنىڭ 441-بابى بويىنشا جەكەلەگەن قوعامدىق ورىنداردا تەمەكى شەگۋگە تىيىم سالۋدى بۇزعاندارعا ءتيىستى اكىمشىلىك جاۋاپكەرشىلىكتەر بەلگىلەنگەن.
اتاپ ايتقانادا، قازاقستان رەسپۋبليكاسىنىڭ زاڭناماسىندا تەمەكى شەگۋگە تىيىم سالۋ بەلگىلەنگەن جەكەلەگەن قوعامدىق ورىنداردا تەمەكى شەگۋ - جەكە تۇلعالارعا ءۇش ايلىق ەسەپتىك كورسەتكىش مولشەرىندە (6363 تەڭگە) ايىپپۇل سالۋعا اكەپ سوعادى؛ وسى باپتىڭ ءبىرىنشى بولىگىندە كوزدەلگەن، اكىمشىلىك جازا قولدانىلعاننان كەيىن ءبىر جىل ىشىندە قايتالاپ جاسالعان ارەكەت - جەكە تۇلعالارعا التى ايلىق ەسەپتىك كورسەتكىش مولشەرىندە (12726 تەڭگە) ايىپپۇل سالۋعا اكەپ سوعادى؛ جۇمىس بەرۋشىنىڭ تەمەكى شەگۋ ءۇشىن ارنايى ورىندار ءبولۋدى كوزدەيتىن قازاقستان رەسپۋبليكاسىنىڭ زاڭناماسىن بۇزۋى، سونداي- اق بۇل ءۇشىن ارنايى بەلگىلەنبەگەن ورىنداردا تەمەكى شەگۋشىلەرگە شارالار قولدانباۋى لاۋازىمدى ادامعا - ون (21210 تەڭگە)، زاڭدى تۇلعالارعا قىرىق ايلىق ەسەپتىك كورسەتكىش مولشەرىندە (84840) ايىپپۇل سالۋعا اكەپ سوعادى»، دەپ جاۋاپ بەرگەن.
ال، "استانا ەكسپو-2017" ۇلتتىق كومپانياسىنىڭ باسپا ءسوز قىزمەتى ەكسپو كورمەسىندەگى موناكو پاۆيلونىنىڭ كوميسسارى دجۋلەن سەللاريو قازاقستاننان موناكوعا كەتىپ قالعانىن جەتكىزدى.
