تولىقمەتراجدى «ورالمان» فيلمىنىڭ اتاۋى كورەرمەن اراسىندا داۋ تۋدىردى - فوتو
اتالعان تۋىندى كورەرمەن كوڭىلىنەن شىعىپ، زالدا وتىرعان جۇرت كوزدەرىنە جاس الدى. ولار كورسەتىلىم اياقتالعان سوڭ، العان اسەرى مەن پىكىرلەرىن ءبولىستى.
بۇل تۋرالى "Stan.kz" حابارلايدى.
بۇگىن رەجيسسەر ءسابيت قۇرمانبەكوۆتىڭ «ورالمان» تولىقمەتراجدى كوركەم فيلمى بۇقارالىق اقپارات قۇرالدارى وكىلدەرىنە كورسەتىلدى. فيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا «قازاق فيلم» ا ق تۇسىرگەن. فيلم ق ر تاۋەلسىزدىگىنىڭ 25 جىلدىق مەرەيتويىنا ورايلاستىرىلعان. كينوتۋىندى ⅩⅩ عاسىردىڭ 30-جىلدارى تۋعان جەرىنەن كەتۋگە ءماجبۇر بولعان، الايدا ونداعان جىلدار وتكەن سوڭ ەلىنە قايتا ورالعان قانداستارىمىز جايلى.
جابىق كورسەتىلىم بارىسىندا فيلمدى ءتۇسىرۋشى توپ ءوز پىكىرلەرىن ءبولىستى. «قارجىلاندىرۋدىڭ كەشىكتىرىلۋىنە بايلانىستى بۇل فيلمنىڭ كورەرمەن قاۋىمعا جەتەر جولى ۇزاق ءارى كۇردەلى بولدى. دەسەك تە، قارجى ءبولىنىپ، ۇلكەن ەكرانعا شىقتى. كينو اتامەكەنىنە قونىس اۋدارۋدى ارماندايتىن قاراپايىم ادام تۋرالى. فيلم اۆتورىنىڭ ءبىرى رەتىندە، قازاق ءۇشىن وتان ۇعىمى كۇن كورىس قامى ىڭعايلى جەر ەمەس، بايتاق دالا ەكەندىگىن جەتكىزگىم كەلەدى»، - دەيدى فيلمنىڭ سەناري اۆتورى، كينودراماتۋرگ نۇرلان سانجار. وسى ورايدا، ەل ەسىندە «مەنىڭ اتىم قوجا» فيلمىندەگى قوجا ءرولىن سومداپ، ەل ەسىندە «قوجا» بولىپ جاتتالعان كينودراماتۋرگ انا ءتىلىن ءالى كۇنگە دەيىن بىلمەگەنى ءۇشىن قاتتى ۇيالاتانىن جەتكىزدى.
سونداي-اق رەجيسسەر ءسابيت قۇرمانبەكوۆ فيلمدى ساحنالاۋعا قالاي كەلگەندىگىن بايانداپ بەردى. «نۇرلان سانجاردىڭ سەناريىن قولعا العاندا، كوز الدىما تۋعان جەرىنە بەت العان ادامداردىڭ توزاقتان جۇماققا قاراي كەلە جاتقان كەيپى كەلە قالدى. ويتكەنى، مەنىڭ كەيىپكەرىم - اۋعانىستاننان قازاقستانعا قونىس اۋدارعان قانداسىمىز»، - دەيدى ءسابيت قۇرمانبەكوۆ.
العاشقى كورسەتىلىمنەن كەيىنگى جيىندا جۋرناليستەر مەن فيلم اۆتورلارىنىڭ اراسىندا ازداعان داۋ تۋدى. وعان تۋىندىنىڭ اتاۋى سەبەپ بولدى: باستاپقىدا «تورە-تام» دەپ اتالعان كينونىڭ اتاۋى ارتىنشا «ورالمان» دەپ اۋىستىرىلعان. ءبىر كورەرمەن مۇنى قۇپتاپ، جىلاپ العانىن ايتتى. ەندى ءبىرى كەرىسىنشە وسى ءسوزدىڭ جۇرەكتەرىنە باتاتىندىعىن، وزدەرىن جەرگىلىكتى قازاق قوعامىنان ءبولىپ جاتقانىن سەزىنگەندەرىن جەتكىزدى. ال ءسابيت قۇرمانبەكوۆ قازاق قوعامىن «شالا قازاق»، «ناعىز قازاق»، «ورالمان قازاق»، «جەرگىلىكتى قازاق» دەپ ءبولۋ ءۇشىن ەمەس، قايتا ولاردىڭ باسىن بىرىكتىرە ءتۇسۋ ءۇشىن تۇسىرگەنىن تىلگە تيەك ەتتى.
باستى ءرولدى سومداعان دۋلىعا اقمولدا ءوزىنىڭ كەيىپكەرى تۋرالى ءسوز قوزعاۋدان باس تارتتى. بۇعان اكتەردىڭ فيلمدى ءبىرىنشى رەت كورىپ وتىرعانى سەبەپ بولسا كەرەك. ءوزى دە ءۇش- ءتورت رەت قايتالاپ كورگەن سوڭ عانا وي قورىتاتىنىن جەتكىزدى.
سيۋجەتىنە كەلەر بولساق، فيلم ⅩⅩ عاسىردىڭ 30-جىلدارى قىزىل اسكەردىڭ جەندەتتەرىنەن اۋعانىستانعا قونىس اۋدارۋعا ءماجبۇر بولعان قازاق وتباسى تۋرالى. باس كەيىپكەر بازارباي قارتتىڭ ءبىر قىزى مەن ءبىر ۇلى سول جاقتا دۇنيەگە كەلەدى. بالالارى ەسەيىپ، وتباسىن قۇرادى. ۇلى ساپارقۇل ورىس باسقىنشىلارىمەن سوعىس كەزىندە مودجاحەتتەر جاعىندا سوعىسادى. جىلدار وتەدى. بازاربايدىڭ وتباسى قازاقستانعا كوشۋگە رۇقسات بەرەتىن كۆوتا الادى. بارلىعى جولعا جينالادى. تەك بازاربايدىڭ قىزى عانا تۋىستارىمەن بىرگە كوشە الماي، اۋعانىستاندا قالىپ قويادى. تاۋلى اۋىلدان شىققان وتباسىنى ۇزاق جول كۇتەدى. اقىرى ق ر شەكاراسىنا جەتەدى. قارتتىڭ ارمانى ورىندالىپ، تۋعان ەلىمەن قايتا قاۋىشادى. ول جەردى ءسۇيىپ، كوزىنە جاس الىپ، اتامەكەنىنە ورالعانىنا قۋانادى.
ميگراتسيالىق پوليتسيا وتباسىعا بايقوڭىر عارىش ايلاعىنا جاقىن ورنالاسقان تورە-تام اۋىلىنا جولداما بەرەدى. ولار وسىندا ءۇي سالىپ، جاڭا ءومىر باستاپ، ۇلكەن وتباسى بولعىسى كەلەدى. الايدا كوپ ۇزاماي بازارباي قارت دۇنيەدەن وتەدى. ساپارقۇل قيراپ قالعان اسكەري رادار عيماراتىن قايتا جوندەپ، ورنىنا مەشىت تۇرعىزادى.
«ورالمان» فيلمىنىڭ سەنارييىن كينودراماتۋرگ نۇرلان سانجار ءسابيت قۇرمانبەكوۆتىڭ قاتىسۋىمەن جازعان. كومپوزيتورى - ايدوس ساعات. فيلمنىڭ ءتۇسىرىلىم جۇمىستارىنا كينوستۋديانىڭ بۇرىنعى جوبالارىنا قاتىسىپ، تابىسقا جەتكەن، جۇكتەلگەن مىندەتتەرىن ابىرويمەن ورىنداپ شىققان كينوگەرلەر - رەجيسسەرلەر، وپەراتورلار، سازگەرلەر مەن سۋرەتشىلەر جۇمىلدىرىلعان.
فيلمنىڭ قالىڭ كورەرمەنگە كورسەتىلۋى كەشەۋىلدەي تۇسپەك. سەبەبى، تەك حالىقارالىق سايىستان جۇلدە العان تۋىندىلار عانا پروكاتقا شىعادى دەگەن شارت قويىلعان-دى. وسى ورايدا، ءتۇسىرىلىم توبى ونى اۋىل-اۋىل ارالاپ كورسەتۋگە ۋادە ءوتتى. ال ازىرگە الىپ قالالاردىڭ حالقىنا كينوتەاترلار ارقىلى قاشان كورسەتىلەتىنىن بەلگىسىز. دەسە دە، اتالعان تۋىندىنىڭ رەجيسسەرلەرىنە ونى فەستيۆالگە جولداۋ ۇسىنىسى تۇسكەن-دى. فيلم از ۋاقىت ىشىندە ءتۇسىرىلىپ، تولىق وڭدەلمەگەندىكتەن، اۆتورلار بۇل ۇسىنىستان باس تارتۋعا ءماجبۇر بولعان ەكەن.
