حاسەنوۆ ءوز قىزمەتىنەن ءالى بوساتىلعان جوق - مىرزاحمەتوۆ

ونىڭ ايتۋىنشا، ساقتاش حاسەنوۆ ءوز قىزمەتىنەن ءالى بوساتىلعان جوق، دەپ حابارلايدى قازاقپارات ءتىلشىسى ۇكىمەت ۇيىنەن.

«ول زاڭدى بۇزدى. بۇل - ونىڭ جەكە جاۋاپكەرشىلىگى. دەمەك، زاڭ بويىنشا جاۋاپ بەرۋى ءتيىس. قازىر تەرگەۋ ءجۇرىپ جاتىر. ونىڭ كىناسى دالەلدەنەتىن بولسا، مينيسترلىك ونى نە ءۇشىن قورعاۋى ءتيىس؟ ارينە، بۇنداي فاكتىنىڭ ورىن الۋى - وكىنىشتى جاعداي. سەبەبى مينيسترلىك ۆەتەرينارلىق قىزمەتتى كۇشەيتەمىز دەپ جاتقاندا ءدال وسى سالادا ونداي ارەكەتتىڭ بولعانى ورىنسىز»، - دەدى ا. مىرزاحمەتوۆ.

 ءمينيستردىڭ ايتۋىنشا، حاسەنوۆتىڭ قاتىسۋىمەن ەلىمىزگە جەتكىزىلگەن قۇس ەتىنەن قاۋىپتەنۋدىڭ قاجەتى جوق. سەبەبى اتالعان تاۋاردىڭ بارلىعى ءتيىستى تەكسەرۋ شارالارىنان وتكەن. «كەز كەلگەن اۋىل شارۋاشىلىعى ونىمدەرى ءتيىستى تارتىپپەن تەكسەرىلەدى. سوندىقتان ول ەتتىڭ ىشىندە قاۋىپتى ءونىم بار دەپ ايتۋعا بولمايدى. حاسەنوۆتىڭ ءوزى قىزمەتىنەن ءالى بوساتىلعان جوق. سەبەبى وسىنداي جاعدايدا سوت شەشىمى شىقپاي، ونى جۇمىستان بوساتۋعا بولمايدى. سوڭعى ءسوزدى سوت ايتادى. ارينە، بۇگىندە اۋىل شارۋاشىلىعى سالاسىندا اتقارىلىپ جاتقان جۇمىستار كەزىندە وسىنداي جاعدايدىڭ ورىن العانى وكىنىشتى»، - دەپ اتاپ كورسەتتى مينيستر.

 ەسكە سالا كەتسەك، 4 - قاراشادا سىبايلاس جەمقورلىققا قارسى ءىس- قيمىل ۇلتتىق بيۋروسى پارا الدى دەگەن ايىپپەن ق ر اۋىل شارۋاشىلىعى مينيستىرلىگى  ۆەتەريناريالىق باقىلاۋ جانە قاداعالاۋ كوميتەتىنىڭ ءتوراعاسى ساقتاش حاسەنوۆتى ۇستاعان بولاتىن. ونىڭ زاڭسىز قامقورلىعىمەن وسى جىلعى ناۋرىز بەن قازان ارالىعىندا ەل اۋماعىنا 7,4 مىڭ توننادان استام قۇس ەتى اكەلىنگەن جانە سول قىزمەتى ءۇشىن ءىرى كولەمدە پارا العان دەپ ايىپتالىپ وتىر.

 اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى