قازاقستان ارنايى جانە يندۋستريالدى ايماقتاردى جاپون كومپانيالارىنىڭ باسقارۋىنا بەرۋگە دايىن - نازاربايەۆ

 بۇل تۋرالى بۇگىن جاپونيانىڭ جەتەكشى بيزنەس وكىلدەرىمەن كەزدەسكەن ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپاراتتىڭ ارناۋلى ءتىلشىسى توكيودان.

مەملەكەت باسشىسى قازاقستاندا 10 ارنايى ەكونوميكالىق ايماق جانە 20 يندۋستريالدى ايماق جۇمىس ىستەيتىندىگىن اتاپ ءوتتى. ا ە ا قاتىسۋشىلارىنا جەڭىلدىكتەر مەن رۇقسات بەرۋ پروتسەدۋرالارىن وڭايلاتۋ توپتامالار ۇسىنىلسا، ال يندۋستريالدى ايماققا قاتىسۋشىلاردى مەملەكەت قاجەتتى ينفراقۇرىلىممەن قامتاماسىز ەتەتىندىگىن ايتتى.

«ءبىز جاپوندىق كومپانيالارعا ارنايى جانە يندۋستريالدى ايماقتاردا جوبالارىن جۇزەگە اسىرۋ ءۇشىن الاڭ ۇسىنۋعا دايىنبىز. مۇنان بولەك، مۇنداي ايماقتاردى جاپوندىق كومپانيالاردىڭ باسقارۋىنا بەرۋ مۇمكىنشىلىگىمىز دە بار»، - دەدى نازاربايەۆ.

سونىمەن قاتار قازاقستان پرەزيدەنتى «ەكسپو-2017» دۇنيەجۇزىلىك كورمەسى الاڭىندا استانا حالىقارالىق قارجى ورتالىعى قۇرىلعاندىعىن، ونىڭ نيۋ- يورك، سينگاپۋر، دۋباي سىندى قارجى ورتالىقتارىنىڭ ەڭ ۇزدىك تاجىريبەسىن وزىنە سىڭىرگەندىگىن ايتتى. «بىزدە ول ورتالىق ءۇشىن ارنايى زاڭ قابىلدانعان. اعىلشىن قۇقىعى قولدانىلادى، ءىس اعىلشىن تىلىندە جۇرگىزىلەدى. سونىمەن قاتار ءبىزدىڭ جەتەكشى قارجى ورتالىقتارى رەتىندەگى توكيونىڭ دا تاجىريبەسى قىزىقتىرادى»، - دەدى ەلباسى.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى