قازاقستان پرەزيدەنتىمەن كەزدەسۋىم جەمىستى بولدى - جاپونيا پرەمەر-ءمينيسترى
بۇل تۋرالى ق ر پرەزيدەنتى نۇرسۇلتان نازاربايەۆپەن كەزدەسكەننەن كەيىنگى بىرلەسكەن مالىمدەمە بارىسىندا جاپونيا پرەمەر-ءمينيسترى سيندزو ابە ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«بۇگىنگى كەزدەسۋ بارىسىندا اشىق پىكىر الماسۋ بولدى. ونىڭ ىشىندە ورتالىق ازياعا قاتىستى ماسەلەلەر قوزعالدى. كەزدەسۋ جەمىستى ءوتتى. كەلەسى جىلى قازاقستان ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى بولادى. بۇگىنگى كەزدەسۋدە حالىقارالىق ماسەلەلەر بويىنشا دا جەمىستى پىكىر الماسىلدى»، - دەدى ابە.
سونىمەن قاتار ول ك ح د ر-دىڭ يادرولىق- زىمىران باعدارلاماسى ماسەلەسىنە قاتىستى دا الداعى ۋاقىتتا ىنتىماقتاستىقتا بولۋ ۋاعدالاستىعىنا قول جەتكىزىلگەندىگىن اتاپ ءوتتى. «بۇعان قوسا، ەكى ەل يادرولىق سىناقتاردى جالپىعا ورتاق تىيىم سالۋ شارتىنىڭ كۇشىنە ەنۋىنە جاردەمدەسۋ جونىندەگى كونفەرەنسيانىڭ تەڭ ءتوراعاسى رەتىندە تىعىز ىنتىماقتاستىقتا. مەن پرەزيدەنت نازاربايەۆتىڭ وسى جولعى ساپارى اياسىندا حيروسيماعا باراتىندىعىن قولدايمىن. جاپونيا بۇل سالادا قازاقستانمەن الداعى ۋاقىتتا دا بەلسەندى ىنتىماقتاسۋعا دايىن. مەن پرەزيدەنت نازاربايەۆپەن بىرلەسىپ، جاپونيا مەن قازاقستان اراسىنداعى قارىم- قاتىناستى بەلسەندى دامىتۋ ءۇشىن كۇش جۇمساۋعا نيەتتىمىن»، - دەدى جاپونيا پرەمەر-ءمينيسترى.
اۆتور: مارلان جيەمباي
