كورىنبەي كەتكەن جۇلدىزدار قازىر نەمەن اينالىسىپ ءجۇر
ەندى 2000- جىلداردىڭ ءوزى ءبىر تاريح. جاڭا عاسىر باستالىپ، ميللەنيۋمدىك قيالعا بەرىلىپ، جاڭا ومىردەن جاڭا لەپ كۇتكەنىمىز ەستەرىڭىزدە مە؟ ال كوڭىلدى ديسكوتەكالار مەن قىزىقتى تويلار شە؟ شاما-شارقىمىز كەلگەنشە بارلىعىمىزدىڭ جاڭالىققا ۇمتىلعانىمىز راس. وسى تۇستا جارقىراپ شىققان انشىلەر ءقازىر قايدا ءجۇر؟
بۇل تۋرالى «ايەل باقىتى» باعدارلاماسىندا ايتىلدى.
وكتەم التاي ساحنادان ءجيى كورىنبەسە دە، اندەرى تويلاردا جۇرەدى. ءبىر كەزدەرى تانىمال بولعان وكتەم مىرزا ءدال قازىر شاكىرت تاربيەسىمەن اينالىسىپ ءجۇر ەكەن.
«ماعان الەۋمەتتىك جەلى ارقىلى حابارلاسىپ، اندەرىمدى ءوزىمنىڭ ورىنداپ شىققانىمدى سۇراپ جاتادى. كوبىنەسە جاس انشىلەرگە كوڭىلدەرىنىڭ تولمايتىندىعىن ايتادى. مەن ونەردەن ەشقايدا كەتكەن جوقپىن. ءار نارسە ءوز ۋاقىتىمەن بولادى. ءبىر شەتىنەن جاسىما دا بايلانىستى ءسال دەمالىپ، جاستاردىڭ تاربيەسىمەن اينالىسىپ جاتقان جايىم بار. ال جاڭا اندەردى ۇنەمى جازىپ جۇرەمىن»، - دەيدى ءانشى.
جۇلدىزداردى جاققان Superstar جوباسىنىڭ ساحنا سىنىنا شىداپ، قاتاردان قالماعاندارى ساحنادا ءجۇر. العاشىندا بۇل بايقاۋدا 16 مىڭ ءوتىنىمنىڭ ىشىنەن 5563 ى ىرىكتەلىپ، ارتىنشا 100 ى الماتىعا جولداما العان بولاتىن. اتالعان جوباعا 2005 -جىلى ەرمەك مەدەنوۆ تە قاتىسقان ەدى.
«2005 -جىلى مەن 19 جاستامىن. الماتىعا كونسەرۆاتورياعا وقۋعا كەلگەنىمدە، جاڭاعى بايقاۋ تۋرالى ەستىدىم. وسىدان كەيىن ساكسافون اسپابىنا ءتۇرلى مۋزىكا جازدىم. الايدا ولاردى جارىققا شىعارۋ ماسەلەسى قيىندىق تۋدىرىپ جاتىر. كەزىندە ايدانانى مەن Superstar جوباسىنا قاتىسقان كەزدە «ەرمەكتىڭ قارىنداسى» دەپ ايتاتىن. قازىر كەرىسىنشە مەنى ايدانانىڭ اعاسى رەتىندە تانيدى. بۇل ءسوز مەنى ەش رەنجىتپەيدى. ال جەكە ومىرىمدە بارلىعى جاقسى. ۇيلەندىم، ءبىر ۇلىم بار. ەسىمىن باتىرحان دەپ قويدىم. ونىڭ شۇكەنوۆ اعامىزعا ۇقساعانىن قاتتى قالادىم. جارىم ماقپال ونەردە بولماسا دا، مۋزىكانى وتە جاقسى تۇسىنەدى. بۇكىل ءومىرىم مۋزىكامەن بايلانىستى بولعاندىقتان، وسى سالانى تاڭداعانىما ءبىر ساتكە دە وكىنگەن ەمەسپىن»، - دەيدى ەرمەك مەدەنوۆ.
اتالعان بايقاۋدا الماس كىشكەنبايەۆ پەن رومان كيم باق سىناسقان-دى. ولار وزگە ۇمىتكەرلەردەن وزا شاۋىپ، جۇرتتىڭ نازارىنا ىلىكتى. تورەشىلەردەن جاقسى پىكىرلەر ەستىدى. الايدا باس جۇلدە الماسقا بۇيىردى. ول بۇگىندە تانىمال ءانشى. ال رومان كيم ەلىمىزدە كورىنبەي كەتتى. ونىڭ تەك «زاراتۋشترابەند» توبىندا ءان سالعانىن بىلەمىز.
«قازىر الماتى قالاسىندا تۇرىپ جاتىرمىن. مەملەكەتتىك ۇيعىر تەاترىنىڭ ءارتيسىمىن. ۆوكالدان ساباق بەرەمىن. از ۋاقىت ىشىندە ءبىراز جۇلدەگە يە بولدىم. جەكە ومىرىمدە ادەتتەگىدەي بارلىعى جاسقى. ديانا ەسىمدى قىزىم 5 جاستا. ولەڭ وقىپ، ءان ايتادى. وزىمە كەلەتىن بولسام، تەلەديدارعا شىعۋعا اسا قۇمارتپامىن. سەبەبى، مەن تەك مۋزىكاشىمىن. كونسەرتكە بارسام، تەك جاندى داۋىستا ءان ايتامىن. بولاشاقتا كوگىلدىر ەكرانعا شىعىپ تا قالارمىن»، - دەيدى رومان كيم.
Superstar جوباسىنىڭ تاعى ءبىر تۇلەگى قايرات تۇنتەكوۆتىڭ بىرنەشە جىل بۇرىن باسى داۋعا قالعان- دى. ول جۇرت پەن ب ا ق وكىلدەرى تاراپىنان قولداۋ تاپپاعان سوڭ، ساحنادان كەتۋگە ءماجبۇر بولدى. ءانشىنىڭ ءوزى ءالى كۇنگە دەيىن جۋرناليستەرگە رەنجىپ جۇرگەنىن جاسىرمايدى.
«ونەر جولىن تاڭداعانىما ەش وكىنبەيمىن. كەرىسىنشە، قۋانىشىم شەكسىز. العاشىندا Superstar جوباسىنا وتە المادىم. ءبىراق، ەكىنشى رەت تالاپتانىپ بارعانىمدا جەڭىسكە جەتتىم. ەش وكىنىش جوق. جوبا بارىسىندا قولىمىزدا ناشار تەلەفون بولسا دا، ءبىر- بىرىمىزگە داۋىس بەرەتىن ەدىك. ال جەكە كونتسەرت بەرۋ جوسپاردا بار. ءۇنتاسپا ازىرلەپ جاتىرمىن. بۇيىرسا، قازاقستان بويىنشا تۋر ۇيىمداستىرماقپىن»، - دەيدى قايرات تۇنتەكوۆ.
ونەر جولىن تاڭداعانى ءۇشىن وكىنبەيتىندەردىڭ قاتارىندا ءمولدىر اۋەلبەكوۆا دا بار. ءانشى بۇگىن دە ساحناعا شىعۋعا اسا قۇلشىنىپ تۇرماعانىن ايتادى. سەبەبى، ول انا باقىتىن سەزىنۋگە اسىعىپ ءجۇر. «مەنىڭ ول كەزدە تاجىريبەم از بولدى، سول سەبەپتى جەڭبەدىم. نەبارى 17-18 جاستا ەدىم. ارينە، وتپەي قالعان كەزدە، جىلاپ، ىشتەي وكىندىك. دەسە دە، بۇل جوبا ءبىز ءۇشىن ۇلكەن تاجىريبە بولدى. جوبادان كەيىن تويعا شىقتىم. ءبىر تويدان 500 دوللار الاتىن ەدىم. ءقازىر اۋىز تولتىرىپ ايتاتىنداي جاڭالىق جوق. دەكرەتتىك دەمالىسقا دايىندالىپ ءجۇرمىن. ال ونەرگە قاتىستى جوسپارلارىمدى كەيىنگە قالدىردىم»، - دەيدى ءمولدىر اۋەلبەكوۆا.
Superstar جوباسى كوپتەگەن جاس ءانشى ءۇشىن ونەرگە اپارار التىن كوپىر بولدى. ءبىرى شەبەرلىگىن شىڭداپ، ساحناعا جولداما السا، ءبىرى تانىمالدىلىققا ۇمتىلدى. ايدوس تا ءبىر كەزدەرى «دو- ماجور» توبىنىڭ ءانشىسى ەدى. قازىر استانا قالاسىنداعى تەاترلاردىڭ ءبىرىنىڭ ءبيشىسى. تۇراقتى جۇمىسى بولسا دا، ايدوس ۇلكەن ساحنانى ساعىنىپ جۇرگەنىن ايتادى.
«قازىر «دو- ماجور» توبى جوق، ءبىراق ونى قاتتى ساعىندىم. ءۇش كۇننەن كەيىن ادام كورگە دە ۇيرەنەدى دەمەكشى، قازىر كوندىگىپ قالدىم. ونىڭ ۇستىنە مەن ءبىرىنشى كۋرس وقىپ ءجۇرىپ، وسى توپتا ءان سالعان ەدىم. ءقازىر توپتان كەتكەنىمە 4 جىلداي بولىپ قالىپتى. ارتىنشا «دو- ماجور» توبى قايتا قۇرىلدى. مەن سول توپتا ءان سالعانىم ءۇشىن ەش وكىنبەيمىن. وزىمە قاجەت ساباق الدىم. ال جىگىتتەرمەن ءالى كۇنگە دەيىن تۋعان باۋىرلارداي ارالاسامىز»، - دەيدى ءانشى ايدوس.
2000-جىلدارى «بۇلبۇل قۇسىم» ءانى حيت بولعان ەدى. بۇل ءان ءالى كۇنگە دەيىن ەل اۋزىندا ءجۇر. الايدا ورىنداۋشىسى نۇرجان كورىنبەي كەتتى. «مەن ءۇشىن حيت اندەر - جۇرەكتەن جۇرەككە جەتەتىن اندەر. ءبىز حالىقتىڭ وزىنەن شىققان ءاندى وزىنە قايتارىپ بەرە الۋىمىز كەرەك. جۋىردا ءىليا جاقانوۆ اتامىز «ەندى قازاقتا كلاسسيكالىق ءان تۋمايدى» دەپ جازىپتى. ءبىراق، سەبەبىن ايتپاعان ەكەن. راسىمەن دە، بۇگىنگى اندەر تويعا ارنالىپ جازىلىپ، ءماتىنى «جەڭىلدەپ» كەتتى. ءبىر جاعىنان مۇنداي اندەر ەندى جازىلمايدى دەپ تە تۇبەگەيلى كەسىپ ايتا المايمىن. ءالى تالاي تالانتتىڭ دۇنيەگە كەلەتىنى ءسوزسىز. ماعان سالسا، تويعا ارنالعان اندەردى ايتپايتىن ەدىم. كۇنكورىستىڭ قامىمەن ايتۋعا ءماجبۇرمىن»، - دەيدى نۇرجان قالجان.
