ءلايلا سۇلتان قىزى: ىشتەگىنى ولتىرگىم كەلمەيدى
ايتپاعىم ول ەمەس... ءتۇرلى تاعدىردىڭ كۋاسى بولىپ كەلەمىن. ومىردە دە، ەفيردە دە. مەن دە ەت پەن سۇيەكتەن جارالعان جانمىن عوي... جانىم اشيدى.
ءبىز ءومىردىڭ ءوزىن وزىمىزگە ىڭعايلاپ العىمىز كەلەدى. بولماي بارا جاتسا، تاعدىرمەن دە تايتالاسۋدان تارتىنبايمىز. امال قانشا قولىمىزدان كەلە بەرمەيدى. جەر بەتىندە قانشا ادام بولسا، سونشا تاعدىر بار. بىرەۋ قىستى سۋىعىنا بولا كىنالايدى، جەك كورەدى. قالىڭ كيىمدى كوتەرىپ ءجۇرۋدى كوپسىنەدى. جاقىندا ماعان ءبىر حات كەلدى (كەلەتىن حاتتار كوپ...). ەش وزگەرتۋسىز جاريالايىن: «ءلايلا اپاي، سالەمەتسىز بە؟! مەن ەكى بالانىڭ اناسىمىن. استانادا تۇرامىن. قىزىم ءبىرىنشى سىنىپتا وقيدى. وتە سەزىمتال. بىزدە كۇزدىڭ اياق كيىمى بولماي قالعاندا، ءبىر كىسىدەن بالاسىنىڭ قىسقارعان اياق كيىمىن 1000 تەڭگەگە ساتىپ الىپ بەردىك. سوندا قىزىمنىڭ: «ماما، وسىنى شەشپەيمىن. ەندى اياعىم توڭبايدى» دەپ قۋانعانى ءالى ەسىمدە...» حاتتىڭ سوڭعى جاعىن جازباي-اق قويايىن. ايتپاعىم، «بىرەۋ تويىپ سەكىرەدى، بىرەۋ توڭىپ سەكىرەدى» دەگەن عوي... بۇل ادامدارعا قىستىڭ كەلگەنى كادىمگىدەي مۇڭ. ءبىرىنشى توپ قالىڭ كيىنىپ، قورباڭداپ ءجۇرۋدى مۇڭ كورسە، بۇل جاندارعا توڭباي ءجۇرۋ ارمان...
ىشتەگىنى ولتىرگىم كەلمەيدى... ءۇمىتتى ايتام... نەگە دەيسىز بە؟! جاقىندا ءبىر بۇلدىرشىنمەن تانىستىم. جاسى نەبارى توعىزدا. ءۇش ايلىق قانا ءومىرى قالعان ەكەن... اتا-اناسى بايەك بولىپ، قىزىنىڭ بار ارمانىن ورىنداۋعا اسىعىپ ءجۇر... بالا ارماندارىنىڭ ءبىرى - «بالاپانعا» شىعۋ ەكەن. تىكەلەي ەفيرگە قوناق رەتىندە شاقىردىق. ءبىراز دايىندالىپتى... بالا عوي قاتتى قوبالجىعاننان جۇرەگىندەگى قۇرىلعى توقتاپ قالىپتى. ەفيرگە 1 ساعات قالدى دەگەندە تەلەفوننىڭ ارعى بەتىنەن بار كۇشىن جيناعان اكەنىڭ داۋىسى ەستىلدى... « قىزىم كومادا... ءبىز كەلە المايتىن بولدىق، كەشىرىڭىز...». جاۋاپسىز قالعان اڭگىمە... ەشتەڭە دەي المادىم، شامام دا كەلمەدى. كەلەسى كۇنى قايتا حابارلاسقان ەدىم. ەشكىم جاۋاپ بەرمەدى... ءومىرىنىڭ ءبارى الدا... پەرىشتە تاعدىر ۇزىلمەسە ەكەن... جو-وق، ۇزىلگەن جوق. ىشتەگىنى ولتىرگىم كەلمەيدى. ءۇمىتىمدى ۇزگىم كەلمەيدى. قۇرىلعىعا تاۋەلدى ەتىپ قويعان قۇرعىر جۇرەك ءالى دە سوقسا ەكەن. تىرشىلىك ءۇشىن كۇرەسسە دەيمىن...
ەڭ اۋىرى - ول ءوزىنىڭ جالعان ومىردەگى تىرشىلىگىنىڭ شەكتەۋلى ەكەنىن سەزەدى. جۋرناليستەرگە «مەن سىزگە ءبىر قۇپيا ايتايىنشى، ءبىراق ونى مامام مەن پاپام بىلمەي-اق قويسىنشى... مەنىڭ كەۋدەمدە جۇرەك جوق. مەن جۇرەكسىز ءومىر ءسۇرىپ جاتىرمىن. جاقىندا مەن جاقسى جاققا كەتەمىن...» دەپتى. جۇرەگى بار جۇمىر باستى پەندەنىڭ ءوزى مۇنداي تازا، مۇنداي باقىتتى ەمەس بولار... ءسىزدىڭ كەۋدەڭىزدە 24 ساعات ۇزدىكسىز سوعىپ تۇرعان جۇرەگىڭىز بار. ءبىراق باقىتتى بولۋعا سوندا دا بىرنارسە كەدەرگى. نەگە؟! جۇرەكتى بولعاننان، جاقسى، قوعامعا دەمەي-اق قويايىن، وزىڭىزگە، ورتاڭىزعا قانشالىقتى پايدالىسىز...
«بالاپان» ارناسىنا شىعام دەپ كۇز تۋرالى تاقپاق جاتتاپتى... كۇز تاعدىرى كىشكەنتاي قىز تاعدىرىنا ۇقساپ تۇر عوي... ساباعىنان ۇزىلەردەي بولعان جاپىراق... كىشكەنتاي عانا تازا ءارى بەيكۇنا جاپىراق... اكە-شەشەسىنەن ءومىرىنىڭ از قالعانىن جاسىرادى ەكەن... بالا عوي. ولارعا كوزىندەگى قورقىنىشىن كورسەتكىسى كەلمەيدى. قازىر كىشكەنتاي پەرىشتەنىڭ تاعدىرى الەمدىك دونور بانكىنە تاۋەلدى، ارينە، اۋەلى اللاعا! قازاقستان بۇل جۇيەدە ءۇشىنشى ورىنداعى ەل ەكەن. ول دەگەنىڭىز ەۋروپا، امەريكا ەلدەرىنەن ارتىلدى، «ارتىق جۇرەك كىمگە كەرەك؟!» دەگەن جاعدايدا عانا قولجەتىمدى... قازىر اۋرۋحانانىڭ توسەگىنە تاڭىلىپ، ءالسىن-ءالسىن دەم الۋدا... قوشتاساتىن ءساتىن نە قايتا ومىرگە كەلەر شاعىن توسۋدا... ال كەۋدەدە بۇيرىقتى ورىندار تەمىر قۇرىلعى عانا...
وسىنداي تاعدىرلاردان كەيىن ءسىزدىڭ جۇمىستان شارشاعانىڭىز نەمەسە تولەنبەگەن كرەديتىڭىز، بولماسا وتباسىنداعى ۇساق-تۇيەك كيكىلجىڭ قانشالىقتى ءسىزدى كۇيرەتپەك؟! جەرگە جانشىپ تاستاي ما؟! ومىردەن تۇڭىلتە مە؟! ەندەشە ءسىز ءالسىزسىز! اۋرۋحانانىڭ تەمىر توسەگىندە تىرشىلىك ءۇشىن كۇرەسىپ جاتقان 9 جاسار قىزدان دا ءالسىزسىز!
ءۇمىت - جاڭانىڭ باستاۋى، ۇزىلگەننىڭ - جالعاسى. ول باردا ءبىر عاجايىپ بولاتىنداي. پەرىشتە تاعدىردىڭ ءالى دە جالعاسارىنا قاتتى سەنگىم كەلەدى... بىرەۋلەر ايفونىنىڭ جاڭارعانىن اڭسايدى، ال بىرەۋ بالاسىنىڭ اماندىعىن اڭسايدى. ال ءسىز نەنى اڭساپ ءجۇرسىز؟!
massaget.kz
