كەيكى باتىردىڭ باسىنىڭ قايدا جەرلەنەتىنى انىقتالدى
سەناتور سەرىك اقىلبايدىڭ ايتۋىنشا، جاقىندا وتكەن مەملەكەتتىك كوميسسيانىڭ وتىرىسىندا كەيكى باتىردىڭ جەرلەۋى ماسەلەسى قارالدى. «سول جەردە كەيكى باتىردىڭ سۇيەگىن ونىڭ تۋعان جەرى قوستاناي وبلىسى امانگەلدى اۋدانىنىڭ تاستى اۋىلىندا جەرلەۋ تۋرالى شەشىم قابىلداندى.
سول جەردە بوس تۇرعان مازار بار. ونى باتىردىڭ تۋعان- تۋىستارى تۇرعىزعان ەدى. كەيكى باتىردىڭ ەل تاريحىندا الاتىن ورنىن سونداي- اق، ول ارقىلى قازىرگى جاستاردى پاتريوتتىق رۋحتا تاربيەلەۋدىڭ ماڭىزدىلىعىن ەسكەرە وتىرىپ، باتىرعا ساي ەسكەرتكىش جاساپ، كەيكى باتىردىڭ مەموريالىن تۇرعىزۋ ۇيعارىلدى»، - دەيدى س. اقىلباي.
ايتا كەتەيىك، 1916 -جىلعى ۇلت ازاتتىق كوتەرىلىستىڭ داڭقتى قولباسشىلارىنىڭ ءبىرى، اتاقتى مەرگەن كەيكى باتىر تورعاي دالاسىندا پاتشالىق رەسەيدىڭ وتارلاۋ ساياساتىنا، كەيىن «قىزىلدارعا» قارسى سوعىسقان. بولشيەۆيكتەر ونى ۇستاعاننان كەيىن ايۋاندىقپەن ولتىرگەن. سودان باتىردىڭ باس سۇيەگى ۇزاق ۋاقىت بويى پەتەربورداعى مۋزەيدە ساقتالىپ كەلدى.
اۆتور: ارمان اسقاروۆ
