ەلباسىنا باتا بەرگەن اقساقالدىڭ بولجامى تۋرا كەلدى

وسى كەزدەردە مەن ول كىسىنىڭ جانىندا جيىرەك بولىپ، كوڭىلىن اۋلاۋعا تىرىساتىنمىن. ءومىردىڭ تەپەرىشىن كوپ كورگەن اتامىز تاعدىردىڭ بۇل سىناعىنا دا سىر بەرمەۋگە تىرىسىپ، بىزگە ىشكى كۇيىگىن بىلدىرتپەۋگە تىرىساتىن. كەيدە ءتۇن بالاسى كوز ىلمەي، دوڭبەكشىپ جاتقانىن دا سەزەم. ءوزى باستاپ ءتىل قاتپاسا، ءبىزدى بالەندەي سوزگە ارالاستىرمايتىن. ءتىپتى، ءتورت-بەس ساعات بويى ءۇن-ءتۇنسىز وتىرىپ الاتىن كەزدەرى بولۋشى ەدى.

ءبىر كۇنى جادىراي ءتۇسىپ:

- ماعان الاڭداما، مەن ءالى ۇزاق ءومىر سۇرەم. جانە ءبىر قىزىق كۇتىپ تۇر، - دەپ ءسوز باستادى.

- ونىڭ ءمانىسى قالاي؟ - دەگەن سۇراعىما اتامىز ەشقانداي جاۋاپ قاتپاي قويدى. «ۇزاق جاساۋ-جاساماۋى - ءبىر اللانىڭ ءىسى، ال، كۇتىپ تۇرعان قىزىق نە بولدى ەكەن؟» دەپ ىشتەي سان-ساققا وي جۇگىرتتىم دە قويدىم.

وسى وقيعادان سوڭ دا تالاي ۋاقىت ءوتتى. سەكسەن بەسكە، توقسانعا كەلگەن مەرەيتويلارىندا مۇمكىندىگىنشە تويلاپ جۇردىك. ءبىراق، الگى كۇتىپ تۇرعان قىزىقتان ەشقانداي حابار بولمادى. سودان، 1991-جىلى ارحات كەڭشارىنان اتاعا سالەم بەرۋگە كەلگەنىمدە، ول ماعان:

- ءاي، كولەمباي! الگى كۇتىپ تۇرعان قىزىعىڭ بولايىن دەپ تۇر. ول ەشقانداي تۋىستىڭ توي-تومالاعى ەمەس، مەن قازاقستاننىڭ قازىرگى پاتشاسىنا باتا بەرەتىن بولدىم. بۇدان ارتىق ماعان دا، ساعان دا قانداي قۋانىش كەرەك بولسىن. قاراعىم، باتا دەگەنىمىز - حالىقتىڭ وزىمەن بىرگە جاساپ كەلە جاتقان ەجەلگى مۇراسى. ۇلتتىق مادەني يگىلىكتەردىڭ ىشىندە ەلدىڭ ەڭ رۋحاني قازىناسى. بىلگەن ادامعا باتانىڭ ءمان-ماعىناسى، قادىر-قاسيەتى ايرىقشا باعالى. باتا - حالىق بويىندا عاسىرلار بويى مىسقالداپ جينالعان ناقىل جيىنتىعى، دانالىق قورىتىندىسى، ادامگەرشلىك ەرەجەسى. سوندىقتان دا باتا - حالىقتىق تىلەك. باتا بەرۋشىنى دە، باتا الۋشىنى پاراساتتىلىققا، ىزەتتىلىك، باتىلدىق، وجەتتىككە، ۇلكەن تابىستارعا جەتىپ، ەل-جەرىن قورعاي بىلەتىن ناعىز ەر بولۋعا شاقىرادى. ال، حانعا باتا بەرۋ ماعان مۇلدە بولەك جاۋاپكەرشىلىك جۇكتەپ، تەڭدەسى جوق سەنىم ارتىلىپ وتىر، - دەپ كوڭىلدەنە سويلەدى.

ءسويتىپ، شاكىر اتامىز ەلباسىنا باتا بەرۋگە الماتىعا اتتاندى. سوندا اتامىزعا جولسەرىك بولعان ازاماتتار: «اقساقال، باتاڭىزدىڭ مازمۇنى قانداي؟» دەپ سۇراسا: «قۇداي اۋزىما نە سالسا، سونى ايتام» دەپ ناقتى جاۋاپ بەرمەي دىڭكەلەتكەن كورىنەدى. قولىنا نە قالامساپ، نە قاعاز ۇستاماعان بەتتە پرەزيدەنتكە باتا بەرىپ قايتقانى ەسىمىزدە. ەلگە ورالعان سوڭ ءساتىن كەلتىرىپ:

- اتا، وسى ون ميلليون قازاقتىڭ ىشىنەن تۇڭعىش پرەزيدەنتىمىزدىڭ باتا جونىندە سىزگە توقتالعانىن قالاي باعالايسىز؟ - دەپ سۇراعانىمدا:

- ءاي، كولەمباي، سەن مەنىڭ وسى ءسوزىمدى ەسىڭە مىقتاپ ساقتا. ايتقاندارىم تۋرا كەلەتىنىن مەن ەمەس، سەن كورەتىن بولاسىڭ. نۇرسۇلتان - عالامات ستراتەگ، ول ءالى الىسقا شابادى. مەن سياقتى قازاقتا شال از دەيمىسىڭ؟ ول مەنەن باتا الىپ وتىرعان جوق، اباي تۋعان توپىراقتان، ۇلىلار مەكەنىنەن باتا الىپ وتىر، - دەپ ەدى.

كولەمباي الىمبەك ۇلى،

ابەن ۇلى اتىنداعى مۇراجاي قىزمەتكەرى

Stan.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى