استانادا بۇركىتشىلەردىڭ حالىقارالىق تۋرنيرى مارەسىنە جەتتى - فوتو
ەكى تاۋلىك بويى استانا قالاسىنىڭ ىرگەسىن دۇبىرگە بولەگەن ءداستۇرلى جارىستىڭ باس جۇلدەسى قاراعاندى وبلىسىنىڭ بۇركىتشىسى اقانوۆ دۋلاتقا بۇيىردى. جارىستىڭ سالتاناتتى اشىلۋىندا ق ر مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتىنىڭ ۇلتتىق سپورت باسقارماسىنىڭ باسشىسى ماقسات قويشىبايەۆ، ق ر ۇلتتىق سپورت تۇرلەرى قاۋىمداستىعىنىڭ ءبىرىنشى ۆيتسە-پرەزيدەنتى ەرلان وسپانوۆ جانە ۇلتتىق سپورت تۇرلەرىنەن مەملەكەتتىك جاتتىقتىرۋشى رامازان ساتتىبايەۆ ءسوز سويلەپ، ءداستۇرلى جارىسقا قاتىسۋشى بۇركىتشىلەرگە ساتتىلىك تىلەدى.
ق ر ۇلتتىق سپورت تۇرلەرى قاۋىمداستىعىنىڭ قولداۋىمەن قۇسبەگى كۇنتۋعان اقساقالدى ەسكە ءتۇسىرۋ ماقساتىندا بيىل ەكىنشى مارتە ۇيىمداستىرىلعان جارىستا باس-اياعى وتىزدان استام بۇركىتشى باق سىنادى.
جارىستا بۇركىتتى قولعا شاقىرۋ، ەركىن ۇشىرۋ جانە شىرعاعا سالۋ سياقتى سايىستار بويىنشا 22 بۇركىت ىرىكتەلگەن. قىرانداردىڭ قارىمى وسال بولمادى. الايدا، موڭعوليا جانە قىرعىزستان ەلدەرىنىڭ قۇسبەگىلەرى قويانعا بۇركىت سالۋ باسەكەسىنەن ءسۇرىندى.
اقتىق سىنعا تەك قازاقستاندىق بەس بۇركىتشى شىقتى. بابى كەلىسىپ، جۇتىنىپ شىققان بەس بۇركىتتىڭ ونەرى تۇلكىگە ءتۇسۋ كەزىندە دە دەڭگەيلەس بولدى. تورەشىلەر شەشىمىمەن جەڭىمپازدى انىقتاۋ ماقساتىندا بۇركىتتى قولعا شاقىرۋ سىنى قوسىمشا وتكىزىلدى. ءسويتىپ، ۇپاي سانىمەن قاراعاندى وبلىسىنان كەلگەن بۇركىتشى دۋلات اقانوۆ حالىقارالىق تۋرنيردىڭ باس جۇلدەسىن قانجىعاسىنا بايلادى.
ەكىنشى ورىن شىعىس قازاقستان وبلىسىنىڭ بۇركىتشىسى تاتتىمبەت كاپ ۇلىنا بۇيىردى. ال، ءۇشىنشى ورىندى باياناۋىلدىق بۇركىتشى بەكبولات ىسقاقوۆ يەلەندى. بۇركىتشىلەردىڭ حالىقارالىق تۋرنيرى جانە استانا قالاسىنىڭ اشىق بىرىنشىلىگىنىڭ جۇلدەگەرلەرى:
1- ورىن - دۋلات اقانوۆ (قاراعاندى وبلىسى)
2- ورىن - تاتتىمبەت كاپ ۇلى (شىعىس قازاقستان وبلىسى)
3- ورىن - بەكبولات ىسقاقوۆ (پاۆلودار وبلىسى)
4- ورىن - ايان سەيىتجان (الماتى وبلىسى)
5- ورىن - ارمان كۋشكاروۆ (اتىراۋ وبلىسى) 
