جاپون حالقى باقىت گۇلىن ءوسىرىپ، وعان ەلباسى ەسىمىن بەردى - كەسكىن
استانا. قازاقپارات - جاپون جۇرتى باقىت گۇلىنىڭ جاڭا ءتۇرىن ءوسىرىپ، وعان پرەزيدەنت نۇرسۇلتان نازاربايەۆتىڭ ەسىمىن بەردى، دەپ حابارلايدى 24.kz.
كۇنشىعىس ەلىنىڭ حالقى ءۇشىن حريزانتەمانىڭ ورنى ەرەكشە. ويتكەنى جاپونيانىڭ ەلتاڭباسىندا ءدال وسى گۇل بەينەلەنىپ، ەلدىڭ جانە يمپەراتوردىڭ كورىنىسى رەتىندە قالىپتاسقان.
سوندىقتان جاپوندىقتار جىلدا باقىت گۇلىنىڭ جاڭا تۇقىمىن ويلاپ تاۋىپ، ودان ءارى كورىكتى بولۋىنا كۇش سالىپ جاتىر. سوڭعى بەس جىلدان بەرى ەلۋ مىڭ گۇلدىڭ ىشىنەن ادەمىلىگىمەن ايگىلەنگەن حريزانتەمانىڭ ەندىگى اتاۋى - «پرەزيدەنت نازاربايەۆ». ونى كايدزۋكا قالاسىنىڭ بيلىگى جۇرتشىلىققا ارنايى تانىستىردى.
باقىت گۇلىنىڭ جاڭا ءتۇرى پرەزيدەنت نازاربايەۆ دەپ اتالادى. وسى ۋاقىتقا دەيىن بىردە-ءبىر الەمدىك ساياساتكەر مۇنداي قۇرمەتكە يە بولماعان. ەلباسىنىڭ ەسىمى بەرىلۋىندە ايتارلىقتاي قۇپيا جوق. جاپوندىقتار نۇرسۇلتان نازاربايەۆتى بەيبىتسۇيگىش پرەزيدەنت رەتىندە تانيدى. سول سەبەپتى بۇل اتاقتى ەلباسىعا لايىق كورگەن.
«ءبىز ەڭ جوعارعى سۇرىپتى گۇلگە نازاربايەۆ اتاۋىن بەرۋدى ءجون سانادىق. ويتكەنى سىزدەردىڭ پرەزيدەنتتەرىڭىزدىڭ بويىنان كەمەڭگەرلىكتى، دانالىقتى كورەمىز. جۇرت بۇل گۇلدى باقىتتىڭ جانە اقىلدىلىقتىڭ بەلگىسى دەپ بىلەدى. مىنە وسىنى ەسكەرىپ، سونداي-اق ەكى ەلدىڭ قارىم-قاتىناسىنىڭ ارى قاراي نىعايۋىن كوزدەپ، وسى اتاۋدى بەرۋدى ۇيعاردىق»، - دەيدى گۇل ءوسىرۋ ءوندىرىسىنىڭ پرەزيدەنتى جۋنسۋكە كيشيۆاكي.
بۇگىننەن باستاپ كومپانيا سايتىندا نازاربايەۆ دەپ اتالاتىن جاڭا برەند پايدا بولدى. ەندى ەلباسىنىڭ ەسىمىمەن جاپون حالقى كەڭىنەن تانىسادى. ءسويتىپ بۇل گۇل عاسىردان-عاسىرعا جالعاسىپ، ەل جادىندا ماڭگى قاتتالادى. جاپوندار باقىت گۇلىنىڭ تاريحىن جانە ولارعا بەرىلگەن اتاۋلارىن ەش ۋاقىتتا ۇمىت قالدىرعان ەمەس. ءتىپتى وسى حريزانتەما تۋرالى اڭىزدى اقيقاتقا بالايدى.
جاپون حالقىنىڭ اۋىزدان-اۋىزعا تاراعان اڭىزىنا سۇيەنسەك، ەرتەدە قىتايدى قاتال يمپەراتور بيلەگەن. كۇندەردىڭ-كۇندەرىندە ول تەڭىزدىڭ ارعى جاعىندا سيقىرلى گۇل بارىن بىلەدى. ونىڭ شىرىنىن ىشكەن ادام ماڭگى جاسايتىنىن ەستىپ، سول وسىمدىككە قالايدا قول جەتكىزۋگە تالپىنادى. ءبىراق ونى تەك جۇرەگى اق، سەزىمى پاك ادام جۇلۋ كەرەك بولادى. ءسويتىپ قىتاي بيلەۋشىسى گۇلدى اكەلۋگە 300 بوزبالا مەن بويجەتكەندى جونەلتەدى. الايدا ولار سول كەتكەن كۇيى قايتا ەلدەرىنە ورالمايدى.
ويتكەنى گۇلدىڭ ادەمىلىگىنە ءتانتى بولىپ، وسى ارالدى ماڭگى مەكەن ەتىپ قالىپ قويادى. سول ۋاقىتتان بەرى جاپون حالقىنىڭ بۇل گۇلگە دەگەن ءىلتيپاتى مەن ماحابباتى ەرەكشە. ءىس-شاراعا كەلگەن تۇرعىندار «پرەزيدەنت نازاربايەۆ» گۇلىنىڭ سۇلۋلىعىنا تاڭداي قاقتى. ۇزىندىعى 1 مەتر 85 سانتيمەتر بولسا، ديامەترى 30 سانتيمەتردەن اسادى. «مۇنداي ءىس-شارا ءبىزدىڭ قالادا جىلدا بولىپ تۇرادى. بىردە-بىرەۋىنەن قالىپ كورمەپپىن. وسى جولى ارينە ۇلكەن حريزونتەماعا كوزىم ءتۇستى. ادەمىلىك دەپ وسىنى ايت»، - دەيدى يزۋمي قالاسىنىڭ تۇرعىنى ياماموري توەكادزۋ.
1876-جىلى يمپەراتور مەيدزي گۇلدىڭ ادەمىلىگىن جوعارى باعالاپ، ابىرويىن اسىردى. دالىرەك ايتساق، ەڭ ۇلكەن ماراپاتتاردى حريزانتەمامەن بايلانىستىردى. سول ۋاقىتتان بەرى ول ناگرادا ساناۋلى ساياساتكەرگە تاپسىرىلعان. سونىڭ ءبىرى - ءبىزدىڭ ەلباسى نۇرسۇلتان نازاربايەۆ. 2008-جىلى يمپەراتور اكيحيتو قازاقستان رەسپۋبليكاسىنىڭ پرەزيدەنتىنە ۇلكەن لەنتاداعى حريزانتەما وردەنىن تاققان ەدى. وسىدان-اق باقىت گۇلىنىڭ باعاسىن باعدارلاي بىلۋگە بولادى.
