ارىستا اقىندار ايتىسى ءوتتى
ەڭسە تىكتەگەن بالاسىنان ەڭكەيگەن قارياسىنا دەيىن سۋىرىپ سالما اقىنداردى تىڭداۋدان جالىققان ەمەس. توپىراعى كيەلى ارىس قالاسىندا جىل سايىن ءداستۇرلى تۇردە وبلىستىق جاس اقىندار ايتىسى وتكىزىلىپ كەلەدى، دەپ جازادى و ق و اكىمدىگىنىڭ باسپا ءسوز قىزمەتى.
كەشە قالالىق ىشكى ساياسات جانە «جاستار رەسۋرستىق ورتالىعى» ك م م- ءنىڭ ۇيىمداستىرۋىمەن ءداستۇرلى ايتىستىڭ شىمىلدىعى اشىلدى.
قالالىق مادەنيەت ۇيىندە قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي «ەلىمنىڭ باقىتىن تەربەتكەن - تاۋەلسىزدىك» تاقىرىبىندا وبلىستىق دەڭگەيدە جاس اقىندار ايتىسى ءوتتى.
قالا اكىمى م. قادىربەك ايتىستى اشىپ، جاس اقىندارعا ساتتىلىك تىلەدى. سونداي-اق، ايتىسكەر اقىن كاريما ورالوۆا جاس اقىندارعا ارناۋىن ايتتى. تابان استىندا تاۋىپ ايتىپ، ءسوز ونەرىنىڭ ءىنجۋ-مارجانىن ۇتىمدى جەتكىزە بىلگەن اقىندارعا ج. بايگۋتتيەۆا اتىنداعى «ونەر» مەكتەبىنىڭ ديرەكتورى ج. سەيىتبەكوۆ، ارىس قالالىق تىلدەردى وقىتۋ ورتالىعىنىڭ قازاق ءتىلى جانە ادەبيەتى ءپانىنىڭ ءمۇعالىمى ز. دوسىمبەكوۆا، اقىن-ۇستاز ر. سۇلتاناليەۆا قازىلىق ەتتى.
ءدۇبىرلى ايتىستا اقىندارامىز تاۋەلسىزدىكتىڭ 25 جىلدىعى اياسىندا جىردان شاشۋ-شاشىپ، ءبىر-بىرىنە وتكىر سۇراقتار قويىپ، ۇتىمدى جاۋاپتار قايتارىپ، ايتىس سۇيەر قاۋىمنىڭ كوڭىلىنەن شىعىپ، كورەرمەندەردى جەلپىندىرىپ وتىردى.
ناتيجەسىندە، «باس جۇلدەنى» سايرام اۋدانىنىڭ ازۋلى اقىنى ج. مىرزابەكوۆ قانجىعاسىنا بايلاسا، 1- ورىندى سوزاق اۋدانىنان ا. نيازبەك ەنشىلەدى. 2- ورىندى وتىرارلىق اقىن م. جاقىپ السا، 3- ورىن تولەبي اۋدانىنىڭ اقىنى ب. راحماتۋللايەۆقا بۇيىردى. ارىس قالاسى اكىمىنىڭ ارنايى سىيلىعىن شىمكەنتتىك اقىن ج. بالقاش جەڭىپ الدى. ال تۇركىستاندىق ى. دوسجانوۆا «ۇزدىك جاس اقىن» نوميناتسياسىمەن ماراپاتتالدى. ايتىسقا قاتىسقان جاس اقىنداردىڭ بارلىعى ارىس قالاسىنىڭ اكىمى م. قادىربەكتىڭ «العىس حاتىمەن» ماراپاتتالىپ، ءتۇرلى باعالى سىيلىقتارعا يە بولدى.
