استانادا «جىبەك جولى ەكونوميكالىق بەلدەۋ» اتتى قىتاي سۋرەتشىلەرىنىڭ كورمەسى ءوتىپ جاتىر
كورمەگە قىتاي مەملەكەتىنىڭ تانىمال سۋرەتشىلەرى گۋان حونچەن مەن شاو پۋدىڭ سۋرەتتەرى قويىلعان. «كورمەنىڭ ماقساتى - ەكى ەلدىڭ مادەني بايلانىستارىن نىعايتۋ، سۋرەتشىلەردىڭ ءوزارا تاجىريبە الماسۋىنا مۇرىندىق بولۋ. وتكەن جىلدارى قىتايدا قازاقستاندىق سۋرەتشىلەردىڭ كورمەسىن وتكىزگەنبىز» ، دەيدى شارانى ۇيىمداستىرۋشى «مۇرات جولى» مادەنيەت قوعامدىق بىرلەستىگىنىڭ ءتوراعاسى دۋمان امان ۇلى.
وسى شارا بارىسىندا وزگە دە بىرنەشە قىلقالام شەبەرلەرىنىڭ پىكىرىن بىلگەن ەدىك.
استانا سۋرەتشىلەر وداعىنىڭ ءتوراعاسى ەرمەكوۆ توحتار:
«قىتايدىڭ الەمگە ايگىلى ەكى سۋرەتشىسى كەلىپتى. ءبىزدىڭ سۋرەتشىلەرىمىز دە قىتايعا ءجيى بارىپ، كورمەلەرىن وتكىزىپ تۇرادى. قىتايلىق سۋرەتشىلەردىڭ سۋرەت سالۋ ءستيلى، كوزقاراسى، بەرىلۋى مۇلدە باسقاشا. بۇل سۋرەتشىلەردىڭ مايتالمان شەبەرلەر ەكەنى كورىنىپ تۇر. ولاردا سۋرەتشىلەر ءار سالاعا بولىنەدى ەكەن، ءبىر سۋرەتشىلەر تەك قانا گۇلدى سالادى، تاعى بىرەۋلەرى تەك جىلقىنىڭ، جان- جانۋاردىڭ سۋرەتىن سالادى. ال ءبىز امبەباپپىز، بارلىعىن سالا بەرەمىز، مۇمكىن سودان دا بولار، ءبىر سالانىڭ ناعىز تەرەڭدىگىنە جەتە المايمىز. ەستۋىمىزشە، قىتاي ەلىندە 15 ميلليونداي سۋرەتشى بار ەكەن. ءبىزدىڭ سۋرەتشىلەردىڭ سانى نەبارى 1000 نان استام. ول جاقتا مەملەكەت تاراپىنان دا سۋرەتشىلەرگە قولداۋ كوپ، سونىمەن بىرگە سۋرەتتەرىنىڭ بازارداعى باعاسى دا قۇندى. سوندىقتان دا ءبىزدىڭ سۋرەتشىلەردىڭ جاعدايى قىتايلىق سۋرەتشىلەرمەن سالىستىرعاندا وتە تومەن. جەكە شىعارماشىلىعىن دامىتۋدىڭ ورنىنا ءار جەردە وقۋشىلارعا ساباق بەرىپ، كۇن كورۋگە ءماجبۇر. جەكە سۋرەتتەر سالىپ، تابىسقا جەتكەن سۋرەتشىلەر ساناۋلى عانا.
شاو پۋ قىتايلىق سۋرەتشى:
قازاقستاندىق سۋرەتشىلەر رەاليزم باعىتى بويىنشا دامىپ كەلەدى. بۇل ءداستۇرلى باعىت بولىپ سانالادى. وسى باعىتقا بارىنشا باسىمدىلىق بەرىلەتىندىگى سەزىلەدى. قازاقستاننىڭ مۋزەيلەرىندە بولدىم. سونداعى سۋرەتشىلەردىڭ جۇمىستارىنان قازاقتىڭ سالت- ءداستۇرىن، ەتنوگرافياسىن، سونىمەن بىرگە 21 - عاسىردىڭ اياسىنداعى بۇگىنگى ءومىردىڭ اجارىن بەينەلەۋدە ۇلكەن ىزدەنىستەر بار ەكەندىگىن بايقاۋعا بولادى. بۇنىڭ ءبارى قازاقستاننىڭ ءداستۇرلى مادەنيەتىنىڭ جالعاسى، سونىمەن بىرگە الەمدىك دەڭگەيدەگى جاڭا ستيلدەرگە باعىت الۋ دەپ بىلەمىن. قىتايدا ۇلكەن شىعارماشىلىق كەڭىستىك، شىعارماشىلىق مۇمكىندىكتەر مول. ەلىمىزدە ورتا ەسەپپەن 15 ميلليوننان استام سۋرەتشىلەر بار. ناقتى سۋرەتشىلەر وداعىنا تىركەلگەندەرى 10 مىڭنان جوعارى. قازىر قىتايداعى سۋرەتشىلەرى ۇلكەن داعدارىس كەزەڭىندە تۇر. سۋرەتشىلەرىمىزدىڭ ءبىر توبى ءداستۇرلى جولدان ءبولىنىپ، ءوز الدىنا بولەك سوقپاق ىزدەۋدە. سول ارقىلى ەلىمىزدەگى جانە الەمدىك نارىققا شىعۋدىڭ جولدارىن قاراستىرىپ جاتىر.
قازاقستاننىڭ ەڭبەك سىڭىرگەن قايراتكەرى، سۋرەتشى كاميل مۋللاشيەۆ:
قىتايدا بىرنەشە رەت جەكە سۋرەت كورمەمدى وتكىزدىم. كوپتەگەن حالىقارالىق كورمەلەرگە قاتىستىم. قىتاي ۇلكەن ەل، ولاردىڭ سۋرەتتەرىنىڭ ەرەكشەلىگى - گو قۋا دەگەن ءداستۇرلى ءادىسىن ۇستانادى. ولاردىڭ مەكتەبى جوعارى. سۋرەتشىلەرگە ەركىندىك بەرىلگەن. بەيجىڭدە ارنايى سۋرەتشىلەر قالاشىعى بار ەكەنىن بايقادىم وندا جۇزدەگەن گالەرەيالار بار. سونداي- اق ءارتۇرلى ستيلگە ەركىندىك بەرىلگەن. كوپتەگەن مۋزەيلەرى، كورمە زالدارى ۇدايى اشىق تۇرادى. ءبىز دە نارىقتىق جولمەن العا جىلجىپ كەلەمىز. ءار سۋرەتشى ءوز مۇمكىندىگى مەن قولونەرىنىڭ شەبەرلىگىنە قاراي نارىققا شىعۋدا. مايلى بوياۋ مەن سۋرەت سالۋدا قازاقستاندىق سۋرەتشىلەردىڭ دەڭگەيى جوعارى.
اۆتور: ريزابەك نۇسىپبەك ۇلى
