ەلوردادا «شابىت» حالىقارالىق فەستيۆالى اشىلدى
بۇل تۋرالى بۇگىن جۋرناليستەرمەن كەزدەسۋدە شىعارماشىلىق بايقاۋدىڭ ۇيىمداستىرۋشىلارى حابارلادى. «ۇمىتكەرلەردىڭ دەنى «بەينەلەۋ ونەرىندە» باعىن سىناماق - بۇل نوميناتسيادا 192 ءوتىنىم، «حورەوگرافيا» - 154 جانە «حالىق مۋزىكاسى» نوميناتسياسى بويىنشا 134 ءوتىنىم قابىلداندى. سوڭعى نوميناتسياعا قاتىساتىن جاستار دومبىرا، پريما- قوبىز، قىلقوبىز، شەرتەر- باس شەرتەر جانە پريما- دومبىرا اسپاپتارىندا شىعارمالار ورىنداۋعا ءتيىس. قازىلار القاسىنىڭ قۇرامىنا امەريكالىق كلارنەتشى يۋليان ميليكس جانە ارمەنيالىق كەسكىندەمەشى ۆاردگەس حاحاميان سياقتى الەم ەلدەرىنىڭ ونەر قايراتكەرلەرى ەندى»، - دەپ حابارلاندى استانا اكىمدىگىنىڭ رەسمي سايتىندا.
«فەستيۆالدىڭ تانىمالدىلىعى جىلدان- جىلعا ارتىپ كەلەدى. شەكاراسى جوق بۇل شارا ءتۇرلى مادەنيەتتەر مەن ەلدەر ادامدارىنىڭ باسىن قوسادى. بۇل جولعى فەستيۆال ەل تاۋەلسىزدىگىنىڭ مەرەيتويىنا ورايلاستىرىلىپ وتىر. بيىل كونكۋرسقا 33 جاسقا دەيىنگى ونەر يەلەرى قاتىسۋدا. ولارعا قويىلاتىن تالاپ جوعارى، ءبىر ورىنعا 4-5 ۇمىتكەردەن. ءبىرىنشى كەزەكتە، شىعارماشىلىق جۇمىستاردى باعالاۋدا تاۋەلسىزدىكتىڭ 25 جىلدىعى يدەولوگياسىنا باسا نازار اۋدارىلادى»، - دەيدى اقىن، قازاقستاننىڭ ەڭبەك سىڭىرگەن قايراتكەرى نەسىپبەك ايت ۇلى.
بيىلعى جىلى ەلوردالىقتار بەلسەندىلىك تانىتىپ وتىر، استانادان «شابىت» فەستيۆالىنە قاتىسۋعا 175 ادام نيەت بىلدىرگەن، قالعان وتىنىمدەر قازاقستاننىڭ باسقا قالالارىنان، سونداي- اق، ازەربايجان، قىتاي، قىرعىزستان، رەسەي، وزبەكستان جانە ۋكراينا ەلدەرىنەن تۇسكەن. كونكۋرسانتتاردى ىرىكتەۋ ءۇش كەزەڭمەن وتەدى. قاتىسۋشىلاردىڭ رەپەرتۋارى مەن ءاربىر مۋزىكالىق اسپاپقا ارنالعان شىعارما الدىن الا بەكىتىلگەن. ءاربىر نوميناتسيا بويىنشا بايقاۋدىڭ باعدارلاماسى مەن وتەتىن ورنى تۋرالى تولىق اقپارات www.shabyt.astana.kz سايتىندا جاريالانعان.
فەستيۆالدىڭ سالتاناتتى جابىلۋى قاراشانىڭ 8-ىندە بەيبىتشىلىك جانە كەلىسىم سارايىندا وتەدى، شارا اياسىندا گالا- كونسەرت پەن جەڭىمپازداردى ماراپاتتاۋ ءراسىمى ۇيىمداستىرىلادى. «شابىت» حالىقارالىق شىعارماشىل جاستار فەستيۆالى وسىمەن 19- رەت وتكىزىلىپ وتىر جانە بۇل - شىعارماشىل جاستارعا ۇلكەن ساحناعا شىعۋعا مۇمكىندىك بەرەتىن بىرەگەي الاڭ. نەگىزى قالانعان ۋاقىتتان بەرى فەستيۆالگە ونەردىڭ ءتۇرلى جانرلارىندا 10 مىڭنان اسا ونەر يەسى قاتىستى.
