قازاقستاندا ايەلدەر دەنساۋلىعىن قورعاۋدىڭ ون كۇندىگى باستالدى
بۇل تۋرالى قازاقپارات ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ سايتىنا سىلتەمە جاساپ حابارلايدى.
اقپاراتتىق ناۋقاننىڭ ماقساتى - تۇرعىنداردىڭ نازارلارىن ونكولوگيالىق اۋرۋلاردى ەرتە باستان انىقتاپ، ەمدەۋ، ايەلدەردىڭ سكرينينگتىك تەكسەرۋدەن مەزگىلىندە ءوتۋدىڭ ماڭىزدىلىعىنا اۋدارۋ. سونداي- اق شارا سالاماتتى ءومىر سالتىن ساقتاۋ مەن دەنساۋلىققا دەگەن بايسالدى كوزقاراس قالىپتاستىرۋ ماقساتىندا ۇيىمداستىرىلۋدا.
ون كۇندىك بارىسىندا رەسپۋبليكا وڭىرلەرىندە ءتۇرلى سەمينار، ترەنينگ، دوڭگەلەك ۇستەل تۇرىندە جيىندار ۇيىمداستىرىلادى. ولار اسىرەسە ءسۇت بەزى قاتەرلى ىسىگىمەن كۇرەسپەن ەندى عانا اينالىسىپ جۇرگەن جاس ماماندارعا ارنالادى. وسى شارا اياسىندا بىلىكتى مامانداردىڭ قاتىسۋىمەن اشىق ەسىك كۇندەرى ۇيىمداستىرىلادى.
ايتا كەتەيىك، بۇكىل الەمدىك ءسۇت بەزى قاتەرلى ىسىگىمەن كۇرەس كۇنى جىل سايىن 21 - قازاندا اتالىپ وتەدى.
