الماتىدا كەرىكتىڭ ولىمىنە زووباق قىزمەتكەرى سەبەپ بولعان
زووباق باسپا ءسوز حاتشىسى توقتار اليەۆتىڭ ايتۋىنشا، كەرىك ولىمىنەن كەيىن باسشىلىق تاراپىنان كوميسسيا قۇرىلىپ، ىشكى قىزمەتتىك تەكسەرىس باستالعان. كوميسسيا قۇرامىنا قۇقىق قورعاۋ ورگانى قىزمەتكەرلەرى مەن حايۋاناتتار باعىنىڭ تاجىريبەلى ماماندارى كىردى.
«كاسىبي شەبەرلىك پەن تاجىريبەلى مامانداردىڭ ارقاسىندا كۇدىكتىلەر بەلگىلى بولدى. كەرىكتىڭ ولىمىنە زووباق قىزمەتكەرلەرىنىڭ ءبىرى كۇدىكتى بولىپ وتىر. حايۋاناتتار باعىنىڭ اكىمشىلىگى قالا تۇرعىندارىنا ەشقانداي قاڭقۋ سوزگە سەنبەي، رەسمي اقپاراتقا سۇيەنۋگە شاقىردى. اتالعان ماسەلە بويىنشا تەكسەرۋ جۇمىستارى جۇرگىزىلىپ جاتىر»، - دەدى ول.
ەسكەرتە كەتەيىك، 5 -قازان كۇنى الماتى حايۋاناتتار باعىندا ەكى جاسار كەرىكتىڭ ولگەنى حابارلانعان. زووباق قىزمەتكەرلەرى ونىڭ دەنساۋلىعى جاقسى بولعانىن، ءولۋ سەبەبىن انىقتاپ، قاجەت بولعان جاعدايدا قىلمىستىق ءىس قوزعالاتىنىن ايتقان.
