قازاق ءتىلى ءۇندىستانداعى الدىڭعى قاتارلى جوعارعى وقۋ ورىندارىندا وقىتىلا باستادى - اشوك سادجانحار

سول قۋانىشتى جاڭالىقتى وزدەرىڭىزبەن بولىسكىم كەلىپ وتىر، دەدى قازاقستانداعى ءۇندىستاننىڭ بۇرىنعى ەلشىسى اشوك سادجانحار بۇگىن الماتىدا وتكەن «قازاقستانداعى شىعىستانۋ زەرتتەۋلەرى: جەتىستىكتەر مەن كەلەشەك» تاقىرىبىنداعى حالىقارالىق عىلىمي- تاجىريبەلىك كونفەرەنسيادا.

جيىندا ءسوز العان ءۇندىستاننىڭ بۇرىنعى ەلشىسى قازاقستان مەن ءۇندىستان اراسىندا عىلىمي بايلانىستاردىڭ دامىپ كەلە جاتقانىن ايتتى.

«قازاقستان مەن ءۇندىستان عىلىمي بايلانىستارىنىڭ اياسى كەڭەيىپ كەلەدى. وسى كەزەڭدە قازاقستانداعى ماماندىقتار كافەدراسىن ءۇندىستاندا، ءۇندىتانۋ كافەدراسىن قازاقستاندا دامىتاتىن ۋاقىت كەلدى دەپ ويلايمىن. قازىرگى ۋاقىتتا قازاق ءتىلى دەلي قالاسىنداعى دجاۆاحارلال نەرۋ اتىنداعى مەملەكەتتىك زەرتتەۋ ۋنيۆەرسيتەتى سەكىلدى ءۇندىستانداعى الدىڭعى قاتارلى ءىرى جوعارعى وقۋ ورىندارىندا وقىتىلا باستاعانى قۋانىشتى»، - دەدى ءۇندىستاننىڭ قازاقستانداعى بۇرىنعى ەلشىسى.

ايتا كەتەيىك، بۇگىن الماتىدا ق ر ءبىلىم جانە عىلىم مينيسترلىگى عىلىم كوميتەتى ر. سۇلەيمەنوۆ اتىنداعى شىعىس تانۋ ينستيتۋتىنىڭ قۇرىلعانىنا 20 جىل تولۋىنا، ەل تاۋەلسىزدىگىنىڭ 25 جىلدىعىنا بايلانىستى الماتىداعى «عىلىم ورداسىندا» حالىقارالىق- تاجىريبەلىك كونفەرنسيا ءوتىپ جاتىر. حالىقارالىق جيىندى شىعىس تانۋ ينستيتۋتى مەن قازاقستان- ءۇندىستان قورى بىرىگىپ ۇيىمداستىردى. ەرتەڭ اتالعان كونفەرەنتسيا اياسىندا قازاقستاندىق جانە شەتەلدىك زەرتتەۋشىلەر قاتىساتىن «ۇلى جىبەك جولىنداعى رۋحاني مۇرا جانە مادەنيەتتەردىڭ ىقپالداستىعى» تاقىرىبىندا دوڭگەلەك ۇستەل وتەدى.

بۇگىنگى كونفەرەنتسيانىڭ ماقساتى قازاقستان مەن شىعىس ەلدەرى اراسىنداعى تاريحي- مادەني، الەۋمەتتىك، ەكونوميكالىق، ساياسي، ءدىني، سونداي- اق، وركەنيەتارالىق جانە مادەنيەتارالىق قارىم- قاتىناستاردىڭ اسپەكتىلەرىن جان- جاقتى تالداۋ بولدى. جيىندا بايانداما جاساعان اتالعان ينستيتۋت جانىنداعى تاريحي ماتەريالداردى زەرتتەۋ رەسپۋبليكالىق اقپارات ورتالىعىنىڭ ديرەكتورى مەرۋەرت ابۋسەيىتوۆا شىعىس تانۋ ينستيتۋتىنىڭ الدىندا ءبىرقاتار مىندەت تۇرعانىن ايتتى.

«بۇگىنگى كونفەرەنتسيا ر. سۇلەيمەنوۆ اتىنداعى شىعىس تانۋ ينستيتۋتىنىڭ 20 جىلدىق جۇمىسىن قورىتىندىلاۋ ماقساتىندا ۇيىمداستىرىلىپ وتىر دەسەك بولادى. عىلىمي ەڭبەكتەرىمىزدى، عىلىمي جەتىستىكتەرىمىزدى كورسەتىپ جاتىرمىز. ءبىزدىڭ ينستيتۋت قازاقستاندا شىعىستانۋ سالاسىندا عىلىمي زەرتتەۋ جۇرگىزەتىن جالعىز زەرتتەۋ ورتالىعى. ينستيتۋتتىڭ ەكى دامۋ باعىتى بار: كلاسسيكالىق شىعىستانۋ جانە قازىرگى زامانعى شىعىستانۋ. 20 جىلعى جۇمىستاردىڭ ىشىندە ينستيتۋتتىڭ قازاقستاننىڭ مۇسىلمان الەمىمەن بايلانىسى تۇجىرىمداماسىن دايىنداۋداعى ءرولى مەن قازاقستاننىڭ باتىس پەن شىعىس الەمىمەن قاتىناسىنىڭ عىلىمي نەگىزدەرىن ازىرلەۋدى ايتساق بولادى. سونىمەن قاتار، ينستيتۋت «مادەني مۇرا» مەملەكەتتىك باعدارلاماسى مەن جانە «حالىق تاريح تولقىنىندا» باعدارلاماسى تۇجىرىمداماسىن ازىرلەۋدە ەلەۋلى ءرول اتقارعانىن دا ايتا كەتپەسكە بولماس. «مادەني مۇرا» مەملەكەتتىك باعدارلاماسى اياسىندا ءبىز 30 كىتاپ شىعاردىق. تاريحي باعدارلاما بويىنشا قىتاي مۇراعاتتارىنان 17182 قۇجاتتان تۇراتىن 283 توم پاپكا الىپ كەلدىك. ونىڭ ىشىندە قازاق حاندارىنىڭ تەك قىتاي عانا ەمەس، وزگەدە مەملەكەت باسشىلارىمەن جازىسقان حاتتارى بار»، - دەدى م. ابۋسەيىتوۆا.

ءوتىپ جاتقان حالىقارالىق كونفەرەنتسيا نەگىزىندە قازاقستاننىڭ ازيالىق- تىنىق مۇحيتتىق ايماق، ازيا ەلدەرىمەن ەكىجاقتى ىنتىماقتاستىق، قاۋىپسىزدىكتى نىعايتۋ ش ى ۇ، ۇ ق ش ۇ، ە ق ى ۇ ءتارىزدى ۇيىمدارمەن سەرىكتەستىك قاتىناستاردى دامىتۋداعى باستامالارى تاقىرىبى بويىنشا عىلىمي زەرتتەۋلەر جيناعى شىقپاق.

اۆتور: الماس مۇقاش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى