تالدىقورعاندا جاڭا تەاتردىڭ العاشقى قازىعى قاعىلدى - فوتو
سالتاناتتى شاراعا ارنايى ارىپتەستەرىن قۇتتىقتاۋعا ق ر حالىق ءارتىسى دوسجان جولجاقسىنوۆ جانە بەلگىلى رەجيسسەر تالعات تەمەنوۆ ارنايى كەلدى. الماتى وبلىسىنىڭ اكىمى اماندىق باتالوۆ پەن ونەر مايتالماندارى ىزگى نيەت، اق تىلەكپەن كاپسۋلانى قۇرىلىستىڭ ىرگەتاسىنا سالىپ، العاشقى قازىعىن قاقتى. سونداي اق ءوز تىلەگىندە دوسجان جولجاقسىنوۆ جالپى ەلىمىز بويىنشا 50 دەن اسا تەاتر بولعانىمەن، ءبىرازىنىڭ عيماراتى ەسكى، زامانعا ساي ەمەستىگىن اتاپ ءوتتى. «ال بۇل تۇرعىدا جەتىسۋ جاستارى باقىتتى، رۋحاني بولمىستى قالىپتاستىرۋدا جاڭا تەاتردىڭ ۇلەسى زور بولادى» دەدى.
جاڭا تەاتر تالدىقورعان قالاسىنىڭ 7- ىقشام اۋدانىندا بوي كوتەرەدى. ءۇش قاباتتان تۇراتىن عيماراتتىڭ جالپى اۋدانى 10538 شارشى مەتر. كورەرمەن ورنى 510 ادامعا لايىقتالعان. تەاتردىڭ قۇرىلىسى جوسپار بويىنشا 2018 -جىلدىڭ 30 ماۋسىمىندا اياقتالۋى كەرەك. ءبىراق الماتى وبلىسىنىڭ اكىمى دراما تەاتردىڭ قۇرىلىسىن ەلىمىزگە تانىمال قۇرىلىس كومپانياسى سالاتىنىن اتاپ ءوتىپ، قۇرىلىستى مەرزىمىنەن بۇرىن اياقتايدى دەگەن ۇلكەن سەنىمىن ءبىلدىردى. سونداي اق اماندىق باتالوۆ بۇل دراما تەاتردى جەتىسۋ تورىندە سالۋعا ەلباسىنىڭ ءوزى قولداۋ بىلدىرگەنىن ايتتى. ال تالدىقورعان قالاسىنداعى ب. ريموۆا اتىنداعى دراما تەاتر ۇجىمى بۇل اقجولتاي حاباردى ۇلكەن قۋانىشپەن قابىلداپ، شەكسىز العىستارىن ءبىلدىردى.
ايتا كەتۋ كەرەك، قازىر تالدىقورعان قالاسىندا جاڭادان بوي كوتەرگەن التىنشى جانە جەتىنشى ىقشام اۋداندا قۇرىلىس قىزۋ ءجۇرىپ جاتىر. اتالعان ايماقتا نەكە سارايىنىڭ دا قۇرىلىسى باستالىپ كەتتى. ال جاقىن كۇندەرى جاڭادان بوي كوتەرگەن قوناق ءۇي پايدالانۋعا بەرىلمەك.
