رۋمىنيا قۇراماسى قازاقستاندىقتاردىڭ دورەكى ويىنىنا نارازىلىق ءبىلدىردى
«جەڭىسكە قول جەتكىزە الماعانىمىز وتە وكىنىشتى. بىزدە گول سوعۋعا مۇمكىندىكتەر بولدى. ءبىراق جاساندى الاڭ مەن قازاقستان قۇراماسىنىڭ اگرەسسيۆتى ويىنىن ەسكەرسەك، تەڭ ءتۇسۋ - بۇل جاقسى ناتيجە. مەن پولشامەن بولعان ماتچتى كورگەن بولاتىنمىن. وندا دا تورەشى قازاقستاندىقتاردى دورەكى قيمىلدارى ءۇشىن جازالاعان جوق. ولار ءبىزدى اياقتارىمىزدان، بەتتەرىمىزدەن ۇردى، ءبىراق اربيتر ىسقىرمادى»، - دەدى رۋمىنيا قۇراماسىنىڭ شابۋىلشىسى نيكولاە ستانچۋ Digisport.ro-عا بەرگەن سۇقباتىندا.
ونىمەن رۋمىنيانىڭ وزگە دە ويىنشىسى كەلىستى. قورعاۋشى كوسمين موتسي قارسىلاستاردىڭ دورەكىلىگى قاساقانا بولعانىن ءمالىم ەتتى.
ەسكە سالايىق، 11- قازان كۇنى «استانا ارەنا» ستاديونىندا ءا چ-2018 ىرىكتەۋ تۋرىندا قازاقستان فۋتبول قۇراماسى رۋمىنيامەن وينادى.
تارتىستى بولعان كەزدەسۋ 0:0 ەسەبىمەن اياقتالدى.
ءبىرىنشى تايم ەكى كوماندانىڭ اڭدىسۋىنان باستالدى. الدىمەن بوگدان ستانكۋ 10-مينۋتتا قاقپانى كوزدەسە، كوپ ۇزاماي قازاقستاندىقتار ساپىنان سەرگەي حيجنيچەنكو قاۋىپتى ءسات تۋعىزدى.
30-مينۋتتارعا جاقىن رۋمىن فۋتبولشىسى ادريان پوپانىڭ گول سوعاتىن مۇمكىندىگى بار بولاتىن: الايدا، جارتىلاي قورعاۋشى قاقپادان قيىس كەتتى. ونىڭ ءىزىن الا الەكساندرۋ كريپچۋ قاۋىپتى سوققىمەن كوزگە ءتۇستى، ءبىراق دوپ قاقپادان ساناۋلى سانتيمەتردەن ءوتتى.
ەكىنشى تايم قازاقستاندىق فۋتبولشىلاردىڭ بەلسەندىلىگىمەن ەستە قالدى. سامات سماقوۆ پەن يسلامبەك قۋات كەزەكتەسە قاقپانى بەتكە الدى. دەگەنمەن سوڭعى مينۋتتاردا رۋمىندىقتار قاۋىپتى شابۋىلدار ۇيىمداستىرىپ، قازاقستان قۇراماسىن قاپىدا قالدىرا جازدادى. ءبىراق بوس قاقپادان دوپتى الىپ شىققان ستاس پوكاتيلوۆ ەسەپتىڭ اشىلۋىنا جول بەرمەدى.
وسىلايشا، قازاقستان قۇراماسى الەم چەمپيوناتىنىڭ ىرىكتەۋ كەزەڭىندە ءوز توبىندا ەكىنشى مارتە تەڭ ءتۇستى جانە ەكى ۇپايمەن كەلەدى. كەلەسى ماتچ تۋرا ءبىر ايدان سوڭ، دانيا قۇراماسىنا قارسى وتەدى.
