رينات زايىتوۆ اقيقات ءۇشىن ەمەس، كولىك ءۇشىن ايتىساتىن ارىپتەستەرىن سىناپ تاستادى
- بۇگىنگى ايتىستا ۇيىمداستىرۋشىلاردىڭ نەمەسە بىرەۋدىڭ كوڭىلىنە جاقپايتىن ءسوز ايتساڭ، ەرتەسىندە جينالىسقا سالادى نە «كەلەسى ايتىسقا قاتىستىرمايمىز» دەپ قورقىتادى، - دەدى ول وتكەن اپتادا الماتىلىق ستۋدەنتتەرگە «بۇگىنگى ايتىس» تاقىرىبىندا وقىعان قوعامدىق لەكسياسىندا.
ايتىس ونەرىن «قاي زاماننان بەرى تاۋەلسىز، ءوز قوعامىنىڭ كەمشىلىكتەرىن، جەتىستىكتەرىن، ىندەتتەرىن ايتاتىن ورتا بولعان» دەپ سيپاتتاعان رينات زايىتوۆ قازىرگى ايتىسكەرلەردى «الدىن الا بەلگىلەنگەن سەناري بويىنشا جىرلاپ شىعادى» دەپ ايىپتادى.
- ايتىستىڭ بۇگىنگى ەڭ باستى قاسىرەتى - اقىننىڭ جەكە ۇستامى بولماۋى، ايتىستاعى ويلاردى بىرەۋدىڭ قاداعالاپ وتىرۋى، ايتىستاعى ايتىلعان پىكىرلەرگە قارسى ساحنانىڭ سىرتىنا شىعىپ وزگە بىرەۋلەردىڭ پىكىرلەرىن ايتۋى. «ەل الىپ جاتقان كولىكتى مەن نەگە المايمىن» دەگەن ويمەن اقيقات ءۇشىن ەمەس، دۇنيە ءۇشىن ايتىساتىن اقىندار كوبەيىپ كەتتى، - دەيدى رينات زايىتوۆ.
ول «ايتىسكەرلەر ۇيىمداستىرۋشىلاردىڭ ىقپالىنان شىعا الماي، وسى بەتىمەن كەتە بەرسە، بەس جىلدان كەيىن ءۇش مىڭ ورىندىقتى سارايدا ءۇش ءجۇز ادام وتىراتىن دەڭگەيگە جەتەمىز» دەپ قاۋىپتەنەدى.
