ۇلتتىق مۋزەيدە ءداستۇرلى كورەي كيىمدەرىنىڭ كورمەسى اشىلادى
دەپ حابارلايدى قازاقپارات.
ۇلتتىق مۋزەيدىڭ باسپا ءسوز قىزمەتى تاراتقان مالىمەتتەرگە سايكەس، ەكسپوزيتسياعا تاقتا وتىرعان چوسون اۋلەتىنەن باستاپ، بۇگىنگى كورەيدىڭ ءداستۇرلى «حانبوك» كيىمىنىڭ ءار ءتۇرىن كورسەتەتىن 96 ەكسپونات قويىلادى. ۇسىنىلاتىن ەكسپوناتتاردىڭ اراسىندا كوپتەگەن قازاقستاندىق كورەرمەندەر ۇناتقان «حانزادا جۋمونگ» كورەي سەريالىنىڭ باس كەيىپكەرلەرىنىڭ ءتۇپنۇسقا كوستيۋمدەرى دە بار.
حانبوك - كورەي تىلىنەن اۋدارعاندا كورەي مادەنيەتىنىڭ ىسكە اسقان ءپالساپالىق كوزقاراستارىن، ەستەتيكاسىن جانە وزىندىك ەرەكشەلىگىن كورسەتەتىن «كورەي كيىمى» دەگەندى بىلدىرەدى. وسىدان 100 جىلداي ۋاقىت بۇرىن، كورەيادا باتىستىق ۇلگىدەگى كيىمدەر پايدا بولعانعا دەيىن، حانبوك كارىستەردىڭ كۇندەلىكتى كيىمى سانالعان.
بۇگىنگى تاڭدا حانبوكتى ادەتتە ۇلتتىق مەرەكەلەر (چۋسوك - ەگىن مەرەكەسى، جاڭا اي جىلى) جانە وتباسىلىق سالتاناتتار كەزىندە كيەدى. كورول اۋلەتىنىڭ حانبوكتارى قولايسىز ۇلكەندىگىمەن ەرەكشەلەندى، سولاي بولا تۇرا ولار اسەمدىگىمەن، تالعامدىلىعىمەن جانە ساندىلىگىمەن تاڭ قالدىردى. قىمبات ءارى كۇردەلى ويۋلار قولمەن كەستەلەۋ، بالاۋىزبەن بوياۋ سىندى تەحنيكا كومەگىمەن جاسالدى. ال، ەرەكشە سالتاناتتى كيىمدەرگە كۇمىستەن ساندىك اشەكەيلەر تىگىلدى. چوسون اۋلەتىنىڭ كيىمدەرىن ءداستۇرلى تۇردە ايەلدەر تىكتى جانە كۇردەلى زەر سالىنعان كيىمدى دايىنداۋعا بىرنەشە جىل كەتەتىن بولعان.
كارىستەر الەۋمەتتىك مارتەبەسىنە سايكەس كيىنگەن، سوندىقتان كيىم قوعامداعى ورنىنىڭ ايىرىم بەلگىسى قىزمەتىن اتقارعان. ۇستەم تاپ وكىلدەرى ءوز مارتەبەلەرىنە كوڭىل اۋدارتۋ ءۇشىن زەرگەرلىك اشەكەيلەردى دە پايدالانعان. ايەلدەر ءۇشىن تابيعات ەلەمەنتتەرىنىڭ بىرىنە ۇقساتىپ جاسالعان ءارى جىبەك لەنتامەن بەزەندىرىلگەن اسىل تاستاردان جاسالعان القا ءداستۇرلى اشەكەي سانالدى. كونفۋتسي قوعامى ايەلدەردىڭ كيىم مادەنيەتىنەن دە سەزىلىپ تۇراتىن يبالىلىقتى جانە تازالىقتى ولاردىڭ ەڭ جوعارعى ىزگىلىگى ساناعان. سوندىقتان ايەلدەر كوشەگە شىققان كەزدە جۇزدەرى مەن دەنەلەرىن ارنايى شالىمەن نەمەسە جامىلعىمەن جاباتىن بولعان. كيىمدە جانە اكسەسسۋارلاردا ۇزاق تا باقىتتى ءومىر، بايلىق جانە تانىمالدىلىق، قادىرلەي جانە سۇيە الاتىن ۇرپاق تىلەيتىندىگىن بىلدىرەتىن ءارتۇرلى گۇلدەردىڭ ساندىك ناقىشتارى قولدانىلدى.
«حانبوك سيقىرى» كورمەسى كورەرمەندەردى كورەي مادەنيەتىنىڭ تاڭعاجايىپ الەمىمەن تانىستىرادى جانە كورەيانىڭ سان عاسىرلىق داستۇرلەرىنىڭ ەرەكشەلىگىن سەزىنۋگە مۇمكىندىك بەرەدى.
