قازاقستان وزبەكستانمەن بىرلەسىپ مۇناي ونىمدەرىن جەتكىزۋ بويىنشا كاسىپورىندار اشپاق
بۇل تۋرالى ق ر پارلامەنتى ماجىلىسىندەگى ۇكىمەت ساعاتىندا ق ر سىرتقى ىستەر ءمينيسترى ەرلان ىدىرىسوۆ ءمالىم ەتتى.
«ءبىز ورتالىق ازيا مەملەكەتتەرى ىنتىماقتاستىعىنىڭ ءوزارا قولايلى جولدارى مەن فورماتتارىن ىزدەستىرۋدى جالعاستىرۋدامىز. بيىلعى 12 -قىركۇيەكتە مەملەكەت باسشىسىنىڭ سامارقاندقا ساپارى ساۋدا- ەكونوميكالىق جانە باسقا دا سالالاردا ءوزارا ءىس- قيمىل بويىنشا جاڭا مۇمكىندىكتەردى اشتى. وسىدان كەيىن جالعاسقان ۇكىمەتتىك دەلەگاتسيالاردىڭ ءوزارا ساپارلارى جانە وتكىزىلگەن كەلىسسوزدەر ءبىزدىڭ وڭتۇستىك كورشىمەن ەكونوميكالىق ىنتىماقتاستىقتى ارى قاراي تەرەڭدەتۋدە وزىندىك ءوپتيميزمدى ۇيالاتادى. اتاپ ايتقاندا، مۇناي، مۇناي ونىمدەرىن، اۆتوكولىك، ماشينا قۇرىلىسى جانە باسقا دا سالالاردا بىرلەسكەن كاسىپورىندار نەمەسە ساۋدا ۇيلەرىن اشۋ تۋرالى كەلىسىمدەرگە قول جەتكىزىلدى»، - دەدى مينيستر.
مۇنىمەن قوسا ە. ىدىرىسوۆ قازاقستاندىق تاراپ 2017-2021 -جىلدارداعى كەزەڭگە وزبەكستانمەن ەكونوميكالىق ىنتىماقتاستىقتىڭ ۇكىمەتارالىق ستراتەگياسىن ازىرلەپ، وعان قول قويۋ قاجەتتىگىمەن كەلىسكەنىن اتاپ ءوتتى.
