توكيوعا ساپارىم ەكى ەل قارىم- قاتىناسىن جاڭا دەڭگەيگە شىعارۋعا ىقپال ەتەدى دەپ سەنەمىن - ەلباسى

بۇگىن اقوردادا ءبىرقاتار شەتەل ەلشىسىنەن سەنىم گراموتالارىن قابىلداعان ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى، دەپ حابارلايدى قازاقپارات.

«قازاقستاننىڭ جاپونيامەن ىنتىماقتاستىعىنىڭ ستراتەگيالىق ماڭىزى بار. پرەمەر- مينيستر سيندزو ابەنىڭ بىلتىرعى قازانداعى استاناعا العاشقى ساپارى ايتۋلى وقيعا بولدى. مەنىڭ بيىلعى جىلعى توكيوعا ساپارىم قارىم- قاتىناستارىمىزدى جاڭا، ساپالى دەڭگەيگە شىعارۋعا ىقپال ەتەدى دەپ سەنەمىن»، - دەدى ەلباسى.

مەملەكەت باسشىسى قازاقستان- گرەكيا بايلانىسى دامۋىنىڭ پەرسپەكتيۆالارى بار ەكەندىگىن، گرەك ارىپتەستەرىنىڭ ساياسي، ساۋدا- ەكونوميكالىق، مادەني- گۋمانيتارلىق ءوزارا ءىس- قيمىلدى جانداندىرۋ نيەتىن قولدايتىندىعىن باسا ايتتى. سونىمەن قاتار گەرمانيامەن ءوزارا ءىس- قيمىل قازاقستان ءۇشىن ەۋروپالىق باعىتتاعى ىنتىماقتاستىقتىڭ ەرەكشە ماڭىزىنا يە ەكەندىگىن، 2012 جانە 2015 -جىلدارداعى بەرلينگە ساپارى جانە گەرمانيا كانتسلەرى انگەلا مەركەلدىڭ استاناعا ساپارى ەكىجاقتى قارىم- قاتىناستى جاڭا ساپالى دەڭگەيگە كوتەرگەنىن اتاپ ءوتتى.

 «قازاقستاننىڭ شۆەيتساريامەن ديالوگى قارقىندى دامۋ ۇستىندە. ەكونوميكا جانە ينۆەستسيا سالالارىندا ايتارلىقتاي الەۋەت بار. 2016 -جىلدىڭ 7 ايىنىڭ ىشىندە ەكىجاقتى تاۋار اينالىمى 2,5 ميلليارد ا ق ش دوللارىنا جەتتى. نيدەرلاندى ءبىزدىڭ ەكونوميكاداعى شەتەلدىك ينۆەستورلاردىڭ كوشىن باستاپ كەلە جاتقان ەل. گااگاعا 2014 -جىلعى ساپارىم جانە پرەمەر- مينيستر مارك ريۋتتەنىڭ بىلتىرعى جىلعى جەلتوقسانداعى استاناعا ساپارى ەكىجاقتى ءوزارا ءىس- قيمىلدى نىعايتۋعا تولىق سەرپىن بەردى. نيدەرلاندىنى ب ۇ ۇ قاۋىپسىزدىك كەڭەسىنىڭ 2018 -جىلعى تۇراقتى ەمەس مۇشەلىگىنە سايلانۋىمەن قۇتتىقتايمىز»، - دەدى نازاربايەۆ.

سونىمەن قاتار ەلباسى قازاقستان ۆاتيكانمەن اراداعى قارىم- قاتىناستاردى ايرىقشا باعالايتىندىعىن اتاپ ءوتتى. جاقىن ارادا وتەتىن قازاقستان مەن اۆستريانىڭ ۇكىمەتارالىق كوميسسياسى ىسكەرلىك كەڭەسىنىڭ كەزەكتى وتىرىسىندا ۇلكەن ىستەر كوتەرىلەتىلىگىنە سەنىم ءبىلدىردى.

«كاتاردى قازاقستاننىڭ سىرتقى ساياسي باستامالارىن ءاردايىم قولدايتىن مۇسىلمان الەمىندەگى ارىپتەسىمىز دەپ قابىلدايمىز. كاتار ءامىرىنىڭ 2014 -جىلعى استاناعا ساپارى، مەنىڭ بىلتىرعى دوحاعا ساپارىم ەكىجاقتى، ساپالى، ءوزارا ءىس- قيمىلدى نىعايتۋعا سەپتىگىن تيگىزدى. ەكونوميكالىق ىنتىماقتاستىق اياسىن كەڭەيتۋ ءتۇسۋ ءۇشىن شىعاناقپەن بايلانىستىراتىن قازاقستان، تۇركىمەنستان، يران تەمىر جولى مۇمكىندىگىن پايدالاناسىزدار دەپ سەنەمىن»، - دەدى قازاقستان پرەزيدەنتى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى