ءاننىڭ كيەسىن بۇزىپ جۇرگەن انشىلەر كىمدەر؟
تەلەارنالاردى ارزانقول ءان مەن انشىلەردەن تازالاۋ، سونداي- اق ەل الدىندا ونەر كورسەتەتىن انشىلەردىڭ ارەكەتىن باقىلاۋعا الۋ ءۇشىن كوركەمدىك كەڭەس قۇرۋ كەرەك.
بۇل تۋرالى 365info.kz حابارلادى.
بۇل تۋرالى وسى اپتادا ماجىلىستە مادەنيەت تۋرالى زاڭعا وزەرىستەر مەن تولىقتىرۋلار ەنگىزەتىن زاڭ جوباسىن تالقىلاۋ كەزىندە بەلگىلى اقىن مۇحتار شاحانوۆ مالىمدەدى. ونىڭ پىكىرىنشە، قازىرگى كەزدە بىزدەگى انشىلەردىڭ ءانى مەن ارەكەتىن باقىلايتىن كوركەمدىك كەڭەس قۇرۋ وتە وزەكتى ماسەلەگە اينالىپ وتىر.
ال ءماجىلىس دەپۋتاتى نۇرتاي سابيليانوۆ، كەرىسىنشە، انشىلەردىڭ قۇقىقتارىن شەكتەۋدىڭ قاجەتى جوق دەگەن پىكىردە.
مۇحتار شاحانوۆتىڭ ايتۋىنشا، تەلەارنالارداعى بۇكىل ۋاقىت قالتاسى قالىڭ سازگەرسىماقتار مەن ءانشىسىماقتاردىڭ جەكەمەنشىگىنە اينالعان. سونىڭ سالدارىنان، قازاقتىڭ ماقتانىشىنا اينالعان ءابىلاحات ەسپايەۆ، ءشامشى قالداياقوۆ، نۇرعيسا تىلەنديەۆ، اسەت بەيسەۋوۆ سەكىلدى سازگەرلەردىڭ اندەرى نازاردان تىس قالىپ وتىر.
- بۇرىن كەڭەستەر وداعى كەزىندە راديولاردا، تەلەارنالاردا كوركەمدىك كەڭەستەر جۇمىس ىستەيتىن. اتالمىش كەڭەستەر قابىلدانۋعا ءتيىستى ءاننىڭ ءسوزىن، مۋزىكاسىن ۇلكەن تەكسەرىستەن، سىن ەلەگىنەن وتكىزەتىن. سول كوركەمدىك كەڭەستەر، جويىلعالى بەرى شيرەك عاسىرعا جۋىقتادى.
قازىر كەز-كەلگەن ادام تەلەارنالارعا بارادى دا، ءوز اقشاسىنا تۇسىرتكەن بەينەباياندى ۇسىنادى. قاسىنا (جاسىرىن تۇردە) 5 مىڭ نەمەسە ودان دا كوپ دوللاردى قويادى. ءبىتتى. بۇل زاماندا ساتىلمايتىن ەشتەڭە قالمادى.
الگى ماعىناسىز، كوركەمدىكتەن جۇرداي ءاندى ءبىر اي بويى، ءتىپتى، كۇنىنە ەكى- ءۇش رەتتەن تەلەارنادان قايتالاپ وتىرادى، - دەيدى مۇحتار شاحانوۆ.
مۇحتار شاحانوۆتىڭ «كوركەمدىك كەڭەس قۇرۋ كەرەك» دەگەن ۇسىنىسىن ءماجىلىس دەپۋتاتى نۇرتاي سابيليانوۆ تا قولدايدى. ونىڭ ايتۋىنشا، كوركەمدىك كەڭەسكە قوعامعا بەلگىلى زيالى قاۋىم وكىلدەرى مۇشە بولۋ كەرەك. ايتسە دە دەپۋتات كوركەمدىك كەڭەس قاندايدا ءبىر ءاننىڭ كەمشىلىگى بولاتىن بولسا، ونى تۇزەتىپ، ودان ءارى دامىتا ءتۇسۋ قاجەت دەپ وتىر.
بۇل ارينە كوركەمدىك كەڭەستىڭ پارمەنسىز بولاتىنىن اڭعارتادى. مىسالى، وزبەكستان ۇلتتىق قۇندىلىققا نەمقۇرايدى قارايتىن انشىلەردى تەلەارنا مەن ساحناعا جولاتپايدى. الايدا دەپۋتات وزبەكستان سياقتى، انشىلەرگە ليتسەنزيا بەرمەيتىندەي ەتىپ، قاتاڭ تالاپ قويۋعا بولمايدى دەگەن پىكىردە.
- مەنىڭ ويىمشا، ليتسەنزيا ارقىلى انشىلەردىڭ قۇقىقتارىن شەكتەمەۋ كەرەك. ءبىراق مينيسترلىك انشىلەردى قاداعالاپ، ۇسىنىستارىن ايتىپ وتىرۋى قاجەت.
سەبەبى، مينيسترلىك قانشا جەردەن تىيىم سالعانىمەن انشىلەر تويعا بارىپ، ءان سالا بەرەدى ەمەس پە؟
ال انشىگە «تويعا بارما» دەپ، ەشكىمدە تىيىم سالا المايدى. سوندىقتان دا بۇل ارادا بار ماسەلە ادامنىڭ ءوز دەڭگەيىنە بايلانىستى بولسا كەرەك. ءاربىر ءانشى ءوزىنىڭ جوعارى مادەني تۇلعا رەتىندە كورسەتە بىلسە، ونىڭ ونەرى دامىپ، قوعامدا ونى سىيلايتىن ادامدار كوپ بولادى، - دەيدى دەپۋتات.
سوڭعى كەزدەرى قوعامدا انشىلەردىڭ ماعىناسىز ءانى مەن ەرسى ارەكەتى ءجيى سىنالاتىن بولىپ ءجۇر. الايدا ولار سوعان قاراماستان، كيەلى ساحناعا شىعىپ، تەلەارنادان ءتۇسپايتىن بولىپ الدى. ەگەر كوركەمدىك كەڭەس قۇرىلاتىن بولسا، ءسوزىن ادام بالاسى ءتۇسىنىپ بولمايتىن اندەر ساحنا مەن تەلەارناعا جول تارتپاس ەدى. ايتسە دە دەپۋتاتتىڭ سوزىنە قۇلاق اسساق، كوركەمدىك كەڭەستەن كوپ نارسە كۇتۋدىڭ قاجەتى جوق سياقتى.
سەرعازى اسلانبەك
