باس پروكۋرور ستۋدەنت كەزىندە تاۋىق قورادا تۇنەگەن كۇندەرىن ەسىنە الدى
بۇل تۋرالى aktobetimes.kz حابارلايدى.
«مەن تۋعان اۋىلىمدى ون بەس جىل بويى تاۋىق ءوسىردىم. باسىندا ول التاۋ عانا بولعان، كەيىن سانى جۇزگە جەتتى. ول كەزدە ءجۇز تاۋىقتى ساتساڭ 3 مىڭ رۋبل بولاتىن ەدى»، - دەدى جاقىپ اسانوۆ.
باس پروكۋرور ومىرلىك قيىندىقتاردى قالاي وتكەرگەنىن، تابىسقا قالاي جەتۋ كەرەك دەگەن ويىمەن دە ءبولىستى.
«مەندە ستۋدەنتپىن. 80 -جىلدارى قاز ۇ ۋ- عا وقۋعا ءتۇستىم. جاتاقحانا بۇيىرماعاندىقتان تۋىسىمنىڭ ۇيىندە تۇرۋعا ءماجبۇر بولدىم. وندا دا بالكوننان عانا ورىن بۇيىردى. العاشقى تۇننەن كەيىن-اق ول جەرگە قايتا ورالمايمىن دەپ شەشتىم. ۆوكزال مەن اۆتوۆوكزالدا تۇنەدىم ءبىراز ۋاقىت. سوسىن ءوزىم سياقتى جىگىتتەرمەن بىرگە ءبىر اجەيدىڭ سارايىن(قوراسىن) جالداپ تۇردىق. ساراي دەگەن اتى بولماسا ول بۇرىنعى تاۋىق قورا ەكەن»، - دەيدى اسانوۆ.
ول وسى تاۋىق قوراعا كەلمەۋ ءۇشىن بار ۋاقىتىن كىتاپحانادا وتكىزەتىن بولعان.
«ساباق بىتكەن كەزدە ءبارى جىلى ۇيلەرىنە قاراي اسىعادى. ال ءبىز ەكەۋمىز تاۋىق قوراعا قايتقىمىز كەلمەيتىن. قالا ىشىندە ءارى-بەرى جۇرەتىنبىز. سوسىن كىتاپحاناعا بارايىق دەدىم. ول جەر جىلى ءارى تاماق تا قىمبات ەمەس. ءبىر جاعىنان ول جەردە سۇلۋ قىزدار جۇرەدى. جاقسى وقۋدىڭ ارقاسىندا ۇستازدارىمنىڭ كوزىنە تۇسە باستادىم. اقىرى ءبىر كۇنى ءبىر مۇعالىم قايدا تۇرىپ جاتقانىمدى سۇرادى. مەن باسپانامىزدىڭ تاۋىق قورا ەكەنىن ايتتىم. ول وسىدان سوڭ دەكانمەن سويلەسىپ ۇشەۋمىزگە جاتاقحانادان ورىن الىپ بەردى»، - دەدى ول.
پروكۋرور ەكى ۇلىن دا قاتاڭ تاربيەلەپ وسىرگەن. جاستارى 15 كە كەلگەننەن سوڭ-اق ولارعا بولەك تۇرۋدى ۇسىنعان. قازىر ەكى ۇلى دا ءوز سالاسىنىڭ ۇزدىكتەرى ەكەن.
