اينۇر تۇرسىنبايەۆانىڭ قىزى كىناسىن مويىندادى
وقىس وقيعا استانا قالاسىندا بولعان. جۇرت وسى وقيعادان كەيىن «ايدانا وقيعا ورنىنان قاشىپ كەتتى» دەپ قاۋەسەت تاراتقان-دى. الايدا ايتىسكەر اقىن مۇنى جوققا شىعاردى. قىزى كەرىسىنشە جاپا شەككەن ازاماتقا كومەكتەسىپ، قازىردىڭ وزىندە ونىڭ ءومىرى ءۇشىن ۋايىمداپ جۇرگەن كورىنەدى. ال دارىگەرلەر 28 جاستاعى ازاماتتىڭ دەنساۋلىعى جاقسى ەكەنىن ايتىپ جاتىر.
بۇل تۋرالى 31 -ارنانىڭ «ايتا بەرسىن» باعدارلاماسىندا ايتىلدى.
سوڭعى كەزدە اينۇر تۇرسىنبايەۆانىڭ قاباعى سالىڭقى. سەبەبى، تۇلا بويى تۇڭعىشى ايدانا استانا قالاسىندا كولىگىمەن 28 جاستاعى ءبىرجان قاسىمعاليەۆتى قاعىپ كەتكەن. 18 جاستاعى بويجەتكەن Land Rover كولىگىن تىزگىندەپ ءجۇر ەكەن.
«بۇل جەردە مەن ءبىر-اق نارسە ايتا الامىن. بىرىنشىدەن، قىزىم ءوزىنىڭ كىناسىن مويىنداپ تۇر. ەكىنشىدەن، ءبىز جابىرلەنۋشىمەن تاتۋلاسۋ ءۇشىن كوپ قادام جاسادىق. بۇل ارەكەتىمىز ناتيجەسىن بەرمەدى. ولار زاڭ بويىنشا بولسىن دەسە، ايتقاندارى ورىندالادى. ويتكەنى، ولار - جابىرلەنۋشى تاراپ. ال وقيعانىڭ قالاي بولعانىن، ەكى تاراپتىڭ اراسىندا قانداي اڭگىمەلەر بولعانىن ايتۋعا ماعان تىيىم سالىندى. شىنىمدى ايتسام، قىزىم قاتتى قينالىپ ءجۇر. ومىردە كوپ نارسەنى جوعالتىپ العانداي كۇي كەشۋدە. جۇمىس جاعىنان بولسىن، وقۋ جاعىنان بولسىن «ەندى قولىمنان كەلمەيتىن شىعار، جولىم بولمايتىن شىعار» دەگەن ويمەن جۇرگەن سىڭايلى. ءوزى پوزيتيۆتى قىز ەدى. ءبىراق 100 پايىز بولماسا دا، 60-70 پايىزعا وزگەرىپ كەتتى. مىنەز- قۇلقىندا دا كوپ وزگەرىس پايدا بولدى»، - دەيدى اينۇر تۇرسىنبايەۆا.
الدەكىمدەر ايتىپ جۇرگەندەي قىزى ايدانا وقيعا ورنىنان قاشىپ كەتپەگەن. اقىننىڭ وتباسى جابىرلەنۋشىنىڭ تۋىستارىمەن كەلىسىمگە كەلىپ، ولارعا قول ۇشىن سوزباق بولعان. الايدا قاسىمعاليەۆتەردىڭ وتباسى بۇل ۇسىنىستان باس تارتقان. «ەڭ باستىسى، جىگىتتىڭ امان قالعانىنا شۇكىرشىلىك ەتىپ ءجۇرمىز» دەيدى اينۇر حانىم. دارىگەرلەر دە جىگىتتىڭ جاعدايىنىڭ جاقسى ەكەنىن ايتىپ جاتىر. ال قىزى ايدانا قازىر پسيحولوگيالىق كومەككە مۇقتاج كورىنەدى.
«ەندى وعان قانشالىقتى قادام جاساۋىم كەرەكتىگىن بىلگەن جوقپىن. قازىر ونى كىنالاسام، ول ءوزىن جەگىدەي جەپ جىبەرۋى مۇمكىن. كەرىسىنشە «سەنىكى دۇرىس» دەپ تە ايتا المايمىن. قىزىمنىڭ ءجونسىز قىدىرىپ، كلۋبقا بارىپ، تۇنگە دەيىن ءجۇرىپ، بىرەۋدىڭ ۇيىندە قونىپ قالعانىن كورگەن ەمەسپىن. قىزىمدا مۇنداي جامان ادەتتەر بولعان ەمەس.
ال بولسا، اڭگىمە مۇلدەم باسقا بولار ەدى. 18 جاسقا كەلسە دە، جىگىتتەرمەن حات الىسقانىن دا بايقاعان ەمەسپىن. مىنەزى اشىق، اقكوڭىل. سوندىقتان مۇنى قاتەلىگى دەپ ايتار ەدىم. بالكىم سىناق تا شىعار. باسىنا تۇسكەن جازىم عوي. وعان ءوزىم دە ساباق بولعان شىعارمىن دەپ ويلايمىن. كوبىنەسە قالاي ءتىل تابىسۋ كەرەكتىگىن ىزدەنەمىن. مۇنىڭ بارلىعى ادەيى ىستەلگەن جوق دەپ ايتار ەدىم. قازىر امالسىز پسيحولوگيالىق دارىستەرگە بارىپ ءجۇر. ويتكەنى، ودا «ادام ءولىپ كەتۋى مۇمكىن عوي» دەگەن وي ءالى دە بار سياقتى. جاپا شەككەن جىگىتكە دە ءدال وسىنداي كومەك كورسەتكەن بولاتىنبىز، ءبىراق كەلىسپەدى.
بالا تاربيەلەپ وتىرعان كەز كەلگەن اتا-انا قازىر اقىننىڭ جاعدايىن جاقسى تۇسىنەدى. ەشكىم مۇنداي سىناقتان ساقتاندىرىلعان ەمەس. وكىنىشتىسى، ءبىزدىڭ قوعام قاتەلەسكەن ادامدى ايامايدى. «جاعدايدىڭ اق- قاراسىن بىلمەي تۇرىپ سىناۋعا بولمايدى» دەيدى اقىن.
«الەۋمەتتىك جەلى قاتىگەز ادامدار ءۇشىن تاپتىرماس قۇرالعا اينالعان سياقتى. اگەنت پايدا بولعان كەزدە بارلىعىمىز قاتتى قۋانعان ەدىك قوي. ول دا قالدى. قازىر ول جەلىدە كىمدەردىڭ وتىراتىنى بەلگىسىز. سول سەكىلدى پىكىرگە نازار اۋداراتىن ادامداردىڭ دا قاتارى ازايعان سياقتى... الەۋمەتتىك جەلى مەن جاعىمسىز سايتتاردىڭ استىندا جازاتىن پىكىردى وزىنە بەرىلگەن بيلىك دەپ تۇسىنەتىن جاندار دا بار. ولار «مەن جازا الامىن. مەن كىمنەن قورقامىن» دەپ ويلايتىن ادامدار. ارينە، سەن ەشكىمنەن قورىقپايسىڭ، جازاسىڭ. ءبىراق بارلىعىن جازىپ تۇرعان ءبىر اللا بار ەكەنىن ۇمىتپاۋ كەرەك شىعار»، - دەيدى اينۇر تۇرسىنبايەۆا.
