مينسكىدە قولىنا ارا ۇستاعان ەر ازامات ادامدارعا تاپ بەردى
بۇل تۋرالى lenta.ru سايتىنا سىلتەمە جاساپ قازاقپارات حابارلادى.
پورتالدىڭ حابارلاۋىنشا، ەر ازامات شابۋىلداعان قىزداردىڭ ءبىرى دەنە جاراقاتتارىنىڭ سالدارىنان وقيعا ورنىندا مەرت بولدى. ەكىنشىسى اۋىر جاراقاتتارمەن اۋرۋحاناعا جەتكىزىلدى.
«كۇدىكتى ازامات ۇستالدى. بۇل 1988 -جىلى تۋعان سلاۆيان حالىقتارىنىڭ وكىلى. ۇلتى - بەلارۋس»، - دەدى بەلارۋس مەملەكەتى تەرگەۋ كوميتەتىنىڭ وكىلى يۋليا گونچاروۆا. قىلمىستىق ءىس قوزعالدى.
گونچاروۆانىڭ ايتۋىنشا، الدىندا ادامدارعا شابۋىلداعان ەكى ادام دەگەن اقپارات جالعان بولىپ شىقتى. ول سونىمەن قاتار، ب ا ق بەتتەرىندە جازىلعان شابۋىلداۋشى ولگەن ادامداردىڭ باستارىن كەسىپ العان دەگەن اقپاراتتى دا جوققا شىعاردى.
ر ي ا نوۆوستي اگەنتتىگىنىڭ مالىمەتتەرىنشە، ەر ازامات ساۋدا ۇيىنە شامامەن جەرگىلىكتى ۋاقىت بويىنشا 17-20 مينۋتتا كىرگەن. ونىڭ قولىندا گيتارانىڭ قالىبى بولعان. ساۋدا ۇيىنە كىرگەن سوڭ سول قالىپتان بەنزينمەن وتالاتىن ارانى شىعارىپ، ساۋدا ۇيىنە كەلگەن قىزعا تاپ بەرگەن. بۇدان سوڭ ول قولىنا بالتا الىپ، ەكىنشى قىزعا دەنە جاراقاتتارىن سالعان. بىرنەشە مينۋتتان سوڭ قىلمىسكەردى وقيعا ورنىنا جەتكەن ميليتسيا قىزمەتكەرلەرى توقتاتتى.
