كوپ سەريالى «قازاق ەلى» فيلىمىنىڭ ەكرانعا شىعارىلاتىن ۋاقىتى بەلگىلى بولدى
وتكەن تاريحىمىزدى كوز الدىمىزعا اكەلەتىن، ءادىل باعاسىن بەرۋى ءتيىس تۋىندىنىڭ ايعاي- شۋى كوپ بولدى. قازىنادان بولىنگەن قارجى جەتىسپەدى، ەلدەن جىلۋ جينادى. بىرنەشە مارتە قىسقارتىلىپ، سەناريى وزگەرىسكە ۇشىرادى.
كورسەتىلىم ۋاقىتى قايتا- قايتا كەيىنگە شەگەرىلدى. ايتەۋىر ءتۇسىرىلىپ بولدى جانە جاقىن ارادا ەكرانعا شىعارىلادى. بۇل تۋرالى مادەنيەت جانە سپورت ۆيتسە- ءمينيسترى اقتوتى رايىمقۇلوۆا مالىمدەدى، دەپ حابارلايدى «ايقىن» گازەتى.
ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ۆيتسە- مينيستر تاۋەلسىزدىكتىڭ 25 جىلدىعىنا وراي ەلىمىزدە 8 مىڭعا جۋىق شارا وتكەنىن جانە وعان قازىنادان 407 ميلليون تەڭگە قارجى بولىنگەنىن حابارلادى. سونداي- اق، تۇڭعىش پرەزيدەنت كۇنى مەن تاۋەلسىزدىك كۇنى قارساڭىندا قالىڭ كورەرمەنگە سىي رەتىندە «قازاق ەلى» سەريالى كورسەتىلەتىندىگىن مالىمدەدى.
1 - جەلتوقسان تۇڭعىش پرەزيدەنت كۇنى ەكەنى بەلگىلى. وسى ورايدا قازاق حاندىعىنىڭ 550 جىلدىعىنا ارنالعان 10 بولىمنەن تۇراتىن «قازاق ەلى» سەريالى ەكراننان كورسەتىلەدى. تەلەجوبا كينو رەتىندە دە جانە 10 بولىمنەن تۇراتىن سەريال رەتىندە دە تەلەارنالاردان بەرىلەدى. بۇل تاۋەلسىزدىكتىڭ 25 جىلدىعىنا ۇلكەن سىيلىق بولارى ءسوزسىز، - دەدى ۆيتسە- مينيستر.
