رىپاكوۆا رەسمي تۇردە بەيجىڭ وليمپياداسىنىڭ قولا جۇلدەگەرى اتاندى
ورتالىق كوممۋنيكاتسيالار قىزمەتىنىڭ بريفينگىنە قاتىسقان ولگا رىپاكوۆا جۋرناليستەردىڭ سۇراعىنا جاۋاپ بەرە وتىرىپ، بۇل اقپاراتتى راستادى.
«ءيا، بۇل راس اقپارات. وليمپيادا كوميتەتىنىڭ رەسمي سايتىندا رەسمي حاتتاماسىندا مەنىڭ كورسەتكەن ناتيجەم ءۇشىنشى ورىندا تۇر. بۇل رەسمي اقپارات»، - دەيدى چەمپيون.
ەستەرىڭىزگە سالا كەتەيىك، 2008 - جىلى بەيجىڭدە وتكەن جازعى وليمپيادا ويىندارىندا قازاقستاننىڭ جەڭىل اتلەتشىسى ولگا رىپاكوۆا ءتورتىنشى ورىن العان. ال، سول كەزدە ءۇش قارعىپ سەكىرۋدەن قولا مەدالدى جەڭىپ العان گرەك سپورتشىسى حريزوپيا ديەۆەتتسي دوپينگ داۋىنا ىلىككەن. ەكىنشى دوپينگ سىنامادان كەيىن گرەك سپورتشىسى قولا جۇلدەسىنەن ايىرىلعان بولاتىن.
ايتا كەتەيىك، ولگا رىپاكوۆا ءۇش مارتە وليمپيادا جۇلدەسىن ەنشىلەگەن العاشقى قازاقستاندىق سپورتشى اتانىپ وتىر.
اۆتور: كەنجەكەي توقتامۇرات قىزى
