الماتى تۇرعىنى ۇشقىشسىز اپپارات ويلاپ تاپتى - فوتو

جاس ونەرتاپقىش «قازاقپارات» تىلشىسىمەن اڭگىمەلەسە وتىرىپ، ءوزىنىڭ تىڭ جوباسى تۋرالى ايتىپ بەردى.

دانيلا دروزدوۆ پاۆلوداردا تۋىپ وسكەن، 9 -سىنىپتان كەيىن الماتىعا كوشىپ كەلگەن ەكەن. پاۆلوداردا جۇرگەندە، سول 9-سىنىپ كەزىندە ۇشقىشسىز ۇشاتىن اۆياتسيا قۇرالدارىنا قىزىعۋشىلىق تانىتقان. 2014 -جىلدان بەرى قالالىق، وبلىستىق كونكۋرستارعا قاتىسىپ، جۇلدەلى ورىندار يەلەنە باستاعان. 2015 -جىلى ا ق ش- تا وتەتىن ءداستۇرلى دۇنيەجۇزىلىك وقۋشىلار اراسىنداعى عىلىمي جانە ينجەنەرلىك كونكۋرستىڭ بەسىنشى ورنىن يەلەنگەن.

دانيلا ۇشقىشسىز ۇشاتىن اپپاراتتاردىڭ بەس ءتۇرىن ويلاپ تاپقان. تىڭ يدەياسىن قاراشا ايىندا ۋنيۆەرسيتەتىندە، كەيىن بۇكىل رەسپۋبليكا الدىندا تانىستىرماقشى.

 جوعارىدا ايتقان بەس مودەلدىڭ بىرەۋى - «ۇشاتىن قانات». ياعني، قۇيرىعى جوق ۇشاق فورماسىنداعى ەلەرون ارقىلى ۇشاتىن اپپارات. بۇنداي اپپارات 15 شاقىرىم راديۋستا پايداعا جارايتىن قۇرال، ونى اۋەدەن فوتو نەمەسە ۆيدەو تۇسىرۋگە پايدالانۋعا بولادى.

بۇدان بولەك، تالاپتى ونەرتاپقىش جىگىت اتقاراتىن فۋنكتسياسى كادىمگى ۇشاقتان كەم تۇسپەيتىن مودەل ويلاپ تاپقان. مىسالى، قاناتتارى ەكى مەتر، ەكى جاعىنا كامەرا ورناتىلعان، ءارتۇرلى اۋا- رايىندا جازبا جۇرگىزە الاتىن، 4 مىڭ مەتر بيىكتىككە دەيىن ۇشا الاتىن، وپەراتوردان 40 شاقىرىمعا دەيىن ۇزاپ كەتە الاتىن، قۋاتى 40 مينۋتقا جەتەتىن، 4 كەلى سالماعى بار كەز كەلگەن زاتتى كوتەرە الاتىن اپپارات - دانيلا ويلاپ تاپقان ەڭ تاڭقالارلىق قۇرالدىڭ ءبىرى. بۇل اپپاراتتى اۋىل شارۋاشىلىعىنا پايدالانۋعا ابدەن بولادى.

دانيلا مۇنداي اپپاراتتاردى قۇراستىرۋ ءۇشىن كوبىنە شەتەلدەن تاپسىرىس بەرەتىن كومىر پلاستيگىن، ءشىل پلاستيگىن پايدالانادى ەكەن. اپپاراتقا ورناتاتىن كامەرالاردى ۇشاققا سايكەستەندىرىپ، قايتا قۇراستىرعان. كامەرالاردىڭ 3D فورماتىندا سۋرەت تۇسىرەتىن مۇمكىندىگى بار.

 ەستەرىڭىزدە بولسا، ۇشقىشسىز ۇشىپ، اۋەدەن ءفوتوتۇسىرىلىم جاسايتىن قۇرىلعىنى شىعارۋشى رەسەيدىڭ «گەوسكان» كومپانياسى استانا قالاسىنىڭ 3D كارتاسىن ازىرلەۋ ءۇشىن ەلوردامىزدى اۋەدەن سۋرەتكە تۇسىرەتىنىن حابارلاعان بولاتىنبىز.

«رەسەيدىڭ ۇشقىشسىز اپپارات جاساۋ سالاسىندا تاجىريبەسى كوپ دەۋگە بولادى. ءبىراق، قازاقستاندا دا مول مۇمكىندىكتەر بار دەپ ويلايمىن»، - دەيدى دانيلا دروزدوۆ.

جاس ونەرتاپقىش وسى سالادا ءوز ونەركاسىبىن اشۋدى ارماندايدى ەكەن. «بۇل باعىتتا كوپ جۇمىس ىستەپ كەلەمىن، ءبىراق، بۇل ناتيجەسى بىردەن كورىنەتىن قىسقا جول ەمەس. قارجى جاعى دا قىسپاققا الادى»، - دەيدى دانيلا.

دەگەنمەن، دانيلانىڭ بۇل جوباسىنا ۋنيۆەرسيتەت تاراپى 5 ميلليون تەڭگە قارجى بولگەن. ءبىراق، ونەرتاپقىش جىگىت تۋرالى «قازاقستان عارىش ساپارى» ۇلتتىق كومپانياسىنىڭ باسشىلىعى ەستىپ، ءبىلىپ وتىرعانىن دا ايتا كەتۋ كەرەك.

«ۇشقىشسىز ۇشاتىن اپپاراتتاردى جاپونيا، كورەيا، رەسەي، ا ق ش، فرانسيا، گەرمانيا ەلدەرى وسىدان ون جىل بۇرىن پايدالانا باستاعان. قازىر بۇل سالادا وسى ەلدەر ۇزدىكتەر قاتارىندا. ارينە، باسەكەلەسىپ كورۋگە بولادى، ءبىراق ول ءۇشىن وتە كوپ ينۆەستيتسيا كەرەك. ءبىزدىڭ ۇلان- بايتاق جەرىمىز بار، سوندىقتان، كوشتەن قالماي تۇرىپ، اۋىل شارۋاشىلىققا قاتتى نازار ءبولۋ كەرەك. اۋىل شارۋاشىلىعىنا ارنالعان جەرلەردى سۋارۋعا، سۋرەتكە ءتۇسىرىپ، زەرتتەۋگە وسى اپپاراتتاردىڭ تيگىزەر كومەگى كوپ»، - دەيدى دانيلا دروزدوۆ.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى