قازاقستاندىق اتبەگىلەر جىلقى باپتاپ قىمبات كولىك ۇتۋدى كاسىپكە اينالدىرعان
بۇل تۋرالى stan.kz حابارلايدى.
ءتىپتى، ەۋروپانىڭ ۇزدىك قىلقۇيرىقتارىن ەلىمىزگە الىپ كەلىپ سولاردىڭ تۇقىمدارىن شىعارىپ جاتىر.
ات بەگىلەر ءۇشىن اتتى باپتاۋ وڭاي شارۋا ەمەس. ونى كۇتۋ، جارىسقا جاراتۋ، جاقسىلاپ سۋىتۋدىڭ ءوزى ءبىر ۇلكەن ونەر. ال، جەيتىن جەم- شوپتەرى مەن ءتۇرلى دارۋمەندەرى ءوز الدارىنا. ارينە، ونىڭ ءبارى اقشاعا كەلىپ تىرەلەدى. ءبىراق، الامان بايگەدە باعى مەن بابى قاتار شاپسا وندا الاتىن جۇلدەلەرى دە قوماقتى بولماق. مىناۋ، ەسبول شىڭتاسوۆتىڭ اتاقتى شامالى. بۇل تۇلپاردىڭ سوڭعى ءىرى جەڭىسى بيىلعى جىلى جامبىل وبلىسى، قورداي اۋدانى، قاراكەمىر اۋىلىندا قۇسايىنوۆتار اۋلەتى ۇيىمداستىرعان الامان بايگەنىڭ جەڭىمپازى بولدى. ياعني، جول تالعامايتىن «تويوتا لەند كرۋزەر» اۆتو كولىگىن قانجىعالارىنا بايلادى.
ءومىرىنىڭ جارتى عۇمىرىن ات سپورتىنا ارناعان ەسبول شىڭتاسوۆ اتاقتى قوزىكۇرەڭنىڭ بالاسى سەگىز جاسار شامالدىڭ وسى كۇنگە دەيىن ۇتقان جۇلدەسى 100 مىڭ ا ق ش دوللارىنا جەتىپ جىعىلادى دەپ وتىر.
ال، الماتى وبلىسى، جامبىل اۋدانىنىڭ تۇرعىنى ءنۇرادىل جاڭاباي ۇلى دا وسى سايگۇلىكتەرىنىڭ ارقاسىندا بەرەكەسى مەن بايلىعىن قاتار ارتتىرىپ وتىر.
«مەن وسى جىلقىلارىمنىڭ ارقاسىندا اۆتوكولىكتى ساتىپ المايمىن. بۇلار ءبىر رەت دجيپ ۇتىپ بەرسە ءوز- وزدەرىن اقتايدى. سوندىقتان ات باپتاپ جاتىرمىز» ، - دەيدى ءنۇرادىل.
ەسكە سالا كەتسەك ، ءنۇرادىل نوقاتاي باپتايتىن «جاننۇر» اتتى 5 جاسار بايتالى III رەسپۋبليكالىق التىن تۇلپار الامان بايگەسىنىڭ جەڭىمپازى بولعان ەدى.
بۇگىندە سۇلتان جىلقى شارۋاشىلىعىندا باۋىرىن جازىپ كوسىلىپ شابۋعا دايىن قىرىق شاقتى سايگۇلىك بار.
«بۇل اتتاردى دايىنداۋ وڭاي ەمەس. اياقتارىنا دەيىن تازارتامىز. سەبەبى، تابانىنا تاس كىرىپ كەتپەۋى كەرەك. جارىسقا دايىن جىلقى ءوزى قىرشاڭقى كەلەدى» ، - دەيدى اتبەگى.
قازىر الەمنىڭ نازارىن اۋدارتقان اراب جىلقىسى، اعىلشىننىڭ تازا قاندى اتتارى، تۇركىمەننىڭ اقىلتەكەسىندەي سايگۇلىكتەرىمىز ءبىزدىڭ جەرىمىزدە دە جوق دەپ ايتۋعا بولماس. سەبەبى، ەلىمىزدىڭ ءاربىر- وڭىرىندە ات جالىن تارتىپ وسكەن ماماندار بۇل سالامەن قارقىندى تۇردە اينالىسىپ كەلەدى. راشيت قاسىمبەكوۆ توقىراۋ زامانىندا ەلىمىزدەگى ەڭ ءىرى «لۋگوۆوي» جىلقى زاۋىتىنان اتاقتى ابسەنتتىڭ سوڭعى تۇياقتارىن قوماقتى قاراجاتقا ساتىپ الىپتى. قازىرگى كەزدە تەكتى تۇياقتاردىڭ تۇقىمدارىن كوبەيتۋ ۇستىندە. ونىڭ ءاربىر اقىلتەكەلەرىنىڭ قۇنى بۇگىندە 000 50 ا ق ش دوللارىنا جەتىپ جىعىلادى. ايتۋىنشا، بايگەگە ات قوسپايدى ەكەن. ەسەسىنە ولاردىڭ تۇقىمدارىن ساتىپ، پايدا تۇسىرەدى.
